Hisaaya 14:2 - Kifuliiru

² Yabo Bahisiraheeri, ibinyamahanga byonyene bigakizi bagalula, binabatwale imwabo. Kundu byo byâli kizi vindagaza Abahisiraheeri, haliko leero, Abahisiraheeri bo bagabitwala imbohe mu kihugo kya Nahano, binahinduke baja baabo, naꞌbaja-kazi baabo, halinde banakizi bikoleesa.

Hisaaya 14:2 ပူးပေါင်းရင်းမြစ်များ

Hizira 2:65

Bâli gweti abakozi bashosi, naꞌbakazi, bihumbi birinda na magana gashatu na makumi gashatu na balinda. Hâli naꞌbimbi magana gabiri, abashosi naꞌbakazi.

Zaburi 68:18

Nahano akalyoka ku mugazi Sinaayi, anayiji beera ahandu haage heeru, akulikiirwi naꞌmagaare gaage goꞌkubululwa, ganali kandaharuurwa.

Hisaaya 18:7

Ku yikyo kyanya, birya bifigisi byaꞌbandu bigayijaga, binatange ituulo imwa Nahano woꞌbushobozi bwoshi! Yibyo bifigisi, umwego gwabyo gukeruusiri. Naꞌbandu baꞌmahanga gooshi, bayamiri babiyobohiri. Ee! Biryagagi bilangi ngana, binali mu minika abagoma. Ikihugo kyabyo, kiri mu golomba mweꞌnyiiji. Kundu kwokwo, balya bala bagayiji kizi tuula Nahano woꞌbushobozi bwoshi, ku mugazi Sayuni.

Hisaaya 31:8

Abahasuriya boohe, bagayitwa ku ngooti. Neꞌyo ngooti itagaaba yaꞌbandu, si igaaba ya Rurema, bwo ye gabaminika. Yabo Bahasuriya, ikyanya bagagibona, bagatibita. Kundu kwokwo, imisore yabo igagwatwa, banakizi koleesibwa ku kahaati mu buja.

Hisaaya 45:14

Nahano adetaga kwokuno: «Abamiisiri bagaaba bandu baawe, kuguma naꞌBahendyopiya, naꞌBasheeba. Ibindu byabo, we bigayegukira. Bagakizi yija bakushalagiiri nga mbohe ízishwesirwi neꞌmigufu, banakizi kufukamira, iri banadeta: “Ku kasiisa mutuliinwi na Rurema. Ndaanaye gundi úli ho.”»

Hisaaya 49:22

Nahano Rurema adetaga kwokuno: «Lolagi! Ngayeheza, mu kuhamagala ibinyamahanga. Ngashinga irembera, kabe kalangikizo imwabo booshi. Bagayija batengetiiri abaana biinyu boꞌbutabana, banabe babetwiri abanyere ku bitugo.

Hisaaya 49:23

Yabo baana biinyu, abaami bagamùlerera bo. Abagoli bagakizi bahahalira. Yabo baami bagayiji mùfukamira, banahise amalanga haashi mu kulamba ulukungu ku magulu giinyu. Haaho, mugaamenya kwo nie Nahano. Ábambiisiri kwoꞌmulangaaliro, yugwo mulangaaliro gwabo gutâye be gwa busha.»

Hisaaya 49:25

Kundu kwokwo, Nahano adetaga kwokuno: «Leero, imbira igaanyagwa mu maboko geꞌndwani. Na ngiisi byaꞌbasirikaani bakashahulaga, bigagalulwa. Ngiisi ábali mu kulwisa, nienyene ngabalwisa, halinde na ngize abaana baawe.

Hisaaya 54:3

Buno, ukola ugatabika uluhande noꞌlundi. Abaana ba mu kibusi kyawe, bakolaga bagahyana utwaya tweꞌbinyamahanga. Na kundu utwaya twabo twâli sigiiragi mushaka, si bakola bagayiji tutuula mwo.

Hisaaya 60:14

Abagoma biinyu, kundu bâli kizi mùlibuza, halikago, bagakizi yija bagosiri imbere liinyu. Ee! Ngiisi ábâli kizi mùneguraga, leero bagakizi mùfukamira. Bagakizi mùbuuza Kaaya ka Nahano, banamùbuuze Sayuni, kaaya koꞌMutaluule waꞌBahisiraheeri.

Hisaaya 60:4

Muyinamulage amasu, munalegamire imbande zooshi! Abandu bakola mu mùkuumanira. Bagala biinyu bakola mu lyoka mu mahanga. Kiri na banyere biinyu, bali mu yija babegesirwi.

Hisaaya 61:5

Ibinyamahanga bigakizi mùragirira ibitugwa, binakizi mùlimira, iri binakuya-kuya imizabibu yinyu.

Hisaaya 66:12

Nahano adetaga kwokuno: «Akaaya keꞌYerusaleemu, ngakaleeta mwoꞌmutuula, gukizi hinga nga lwiji. Ubugale bweꞌmahanga, bugakizi mùyijira, nga lwiji úluyijuliiri. Ngakizi mùkuya-kuya, nga kwoꞌmukazi ali mu kuya-kuya umwana mwanuke. Ali mu múbiika ha kambokwa, anamúlere, iri anamúshaasa.

Yeremiya 30:16

Kundu kwokwo, ngiisi ábali mu mùjanganula, nabo ngabajanganula. Abagoma biinyu booshi, nabo kandi bagatwalwa imbohe mu mahanga. Na ngiisi ábakamùshahula ibindu, nabo bagayiji bishahulwa. Na ngiisi ábakamùteera, nabo bagayiji teerwa.

Yeremiya 49:2

Nahano anashubi detaga kwokuno: «Mu siku ízigayija, kiri naꞌBahamooni ba mu kaaya keꞌRaba bagayuvwa akaluulu kiꞌzibo. Ikyanya ligaamala, hagasigala ibiguuka naaho. Kiri noꞌtwaya tweꞌbutambi, tugasingoolwa ku muliro. Yabo bandu, kundu bakayimula Abahisiraheeri mu kihugo kyabo, halikago leero Abahisiraheeri bo bagabayimula.» Kwokwo, kwo Nahano adesiri.

Hezekyeri 39:10

Yabo Bahisiraheeri batagaki ba niꞌgoorwa, mbu bagendi looza ishaali mu ndalo, kandi iri bagendi sheenya mu kishuka. Mukuba yizo siribo ízigaaba zasigwa, zo bagakizi koleesa zibe ngongeezo. Balya bagoma booshi ábakashahula ibya beene, nabo bagabishahulwa. Kwokwo, kwo nie Rurema Nahamwinyu ndesiri.

Danyeri 7:18

Kundu kwokwo, abataluule ba Rurema úli hiꞌgulu lya byoshi, bagayimikwa mu bwami bwage, banakizi twala, halinde imyaka neꞌmyakuula!”

Balaawi 25:44

«Iri wangalooza abaja, kandi iri baja-kazi, ugendi bagulira mu mahanga.

Hobadiya 1:17

Mu bandu baani, baguma bagafushukira ku mugazi Sayuni. Ho hagashubi ba handu haani heeru. Abandu ba mu kibusi kya Yakobo bagashubi galukira mu kihugo kyabo.

Zakariya 2:13

«Yibyo binyamahanga, ngamùyihoolera byo. Si abaja baabo, nabo bo bagayiji bashahula ibindu!» Haaho, lyo mugaamenya kwo Nahano woꞌbushobozi bwoshi, ye kandungika.

Zakariya 2:9

«Nahano adesiri kwokuno: “Niehe nienyene, ngababeera nga luzitiro lwoꞌmuliro, úluzungulusiri akaaya. Kiri na mu kati kaabo, ngayerekana mwoꞌbulangashane bwani!”»

Luka 12:45

«Haliko, tudetage ngoꞌyo mukozi angayigamba, ti: “Si Nahamwitu, keera atinda bweneene!” Ulya mukozi, anatondeere ukulimbagula abaabo bakozi, abashosi naꞌbakazi. Anakizi lya noꞌkunywa, halinde analaluke.

Barumi 15:27

Bakasiima boonyene, kwo batabaalane kwokwo. Kuguma na yibyo, kukaba nga kuyishula umwenda. Mukuba, Abayahudi bo bakatee gwanwa bashangiira naꞌbandu beꞌgindi milala ku bugashaane bwoꞌmutima. Kyo kitumiri abe gindi milala, nabo bakwiriiri batabaale Abayahudi ku bibagooziri ku magala gaabo.

2 Bakorindo 10:5

Tunahongole na ngiisi byaꞌbandu bali mu yiheemya kwo, mu kuhangirira abaabo kwo batamenye Rurema. Inzaliro zooshi, tuli mu zigwata imbira, halinde zikizi simbaha Kirisito.

Bagalatiya 5:13

E beene witu! Rurema keera akamùhamagala kwo mukizi yama mushwekwirwi. Kundu kwokwo, yukwo kushwekuulwa, kutali kudeta kwo mukoli hangwirwi ukukizi koleesa amifwije giinyu mabi. Si mukwiriiri mukizi kolerana mu kati koꞌrukundo.

Bahefeso 4:8

Kyo kitumiri biyandisirwi mu Mandiko Meeru kwokuno: «Ikyanya akazamuukiraga mwiꞌgulu, anatwala abandu bo akagwata imbira, abuli heereza abandu ibigabi.»

Bwigule 3:9

«Yuvwagwi! Abandu ba mu kiso kya Shetaani bagweti bagabeesha mbu bali Bayahudi. Kundu kwokwo, ngabafukamya imbere liinyu, banayemeere kwo nimùkuuziri.