Hezekyeri 7:7 - Kifuliiru

⁷ Mwe mutuuziri mu kino kihugo, mukola mugashereezibwa! Ikyanya kiinyu, kyahikaga. Ku migazi yinyu, mutagaki banda akabuuli koꞌbushambaale, si mukola mugashenguka!

Hezekyeri 7:7 ပူးပေါင်းရင်းမြစ်များ

Ndondeko 19:15

Iri hakaba shesheezi kare-kare, balya baganda banashubi yinginga Luutu, ti: «Kano kaaya, si kagayiji hanwa. Aahago! Vwaruka, uyabiire mukaawe, na banyere baawe bombi, gira mutayiji shereezibwa.»

Ndondeko 19:24

Lyeryo ngana mwiꞌgulu, Nahano anatibulira imbigi zoꞌmuliro mu kaaya keꞌSoodoma na mu keꞌGomora.

Hisaaya 13:22

Indama-kumulinga zigakizi yanira mu nyaala zaamwo. Na kundu inyumba zishubi limbiri bweneene, haliko, imirunga igakizi zimokera-mokera mwo. Akaaya keꞌBabeeri kakolaga kagaahera lwoshi-lwoshi! Isiku ízikasigiriiri, zikola nga ndaakizo.

Hisaaya 16:10

Batagaki shambaala ku kisegengo. Mu yizo ndalo zeꞌmizabibu, ndaakibwo bushambaale, kandi iri malega, kandi iri kuyimba, kandi iri kubanda akabuuli. Ndaanaye úkiri mu kanda ha kikandiro. Batanakiri mu banda utubuuli, mukuba Rurema keera akabahulisa.

Hisaaya 17:14

Kabigingwe, Abahisiraheeri bagakizi yoboha bweneene. Haliko, ikyanya butazi tejuukana, banagwane abagoma bakoli fwiri. Kundu abagoma bagayiji tuteera, ndaabyo bagaagira!

Hisaaya 22:5

Luno lusiku lwatutwisa indege ngana-ngana! Nahano woꞌbushobozi bwoshi atubiisiragi mwaꞌkalugi, anatushengusa lwoshi-lwoshi! Mu ndekeera yaꞌmabone, abandu bagweti bagalibatana mwo. Inzitiro zaꞌkaaya, keera bakazihongolera haashi, banakola mu tabaaza imweꞌmigazi.

Yeremiya 20:7

E Nahano! Si ukandeba, nanayemeera kwo bibe kwokwo. Bwo we mbimiri imisi, ndaakwo kundi. Kwokwo, abandu bakola mu mbonyoleza ubwakya-ubwayira, iri bananjekeereza.

Yeremiya 50:27

Muminikage abasirikaani baamwo booshi. Mubayite nga kwo muli mu yita ibitugwa. Yayewe imwabo! Si ulwabo keera lwahikaga! Kikola kyanya kyoꞌkubahaniiriza.

Hezekyeri 12:28

Ku yukwo, ubabwire kwo Rurema Nahamwinyu adetaga kwokuno: Amagambo gaani gatagaki tinda. Ngiisi byo nꞌgamùkengula kwo, ngabigira bwobuno-bwobuno. Kwokwo, kwo nie Rurema Nahamwinyu ndesiri.»

Hezekyeri 30:3

Ee! Yulwo lusiku keera lwayegerera. Nie Nahano ngola ngatwira abandu ulubaaja. Ku yulwo lusiku, ibibungu bigazinga, neꞌbinyamahanga binashenguke.

Hezekyeri 7:12

Ikyanya keera kyahikaga! Ee! Lulya lusiku lukoli yegiiri. Umuguzi, mutamúleke mbu ashambaale. Umudandaza naye, atakwaniini ajengeerwe. Si yabo booshi, uburaakari bwani bugabatibukira kwo.

Yuheeri 1:15

Lulya lusiku lwa Nahano woꞌbushobozi bwoshi, keera lwayegerera, Lunali lusiku lwo agayiji shereeza kwo. Lulya lusiku, lugaleeza abandu mweꞌkihuumula.

Hamoosi 4:13

Nahano ye kalema imigazi. Ye nali mu husiisa imbuusi. Ngiisi byo ali mu ba ashungisiri ukugira, ali mu gwanwa abimenyeesa abandu. Ali mu hindula izuuba lyoꞌmusasa, bube bushigi. Anali mu hinyata-hinyata ku marango. Iziina lyage, ye Nahano Rurema woꞌbushobozi bwoshi!

1 Peturu 4:17

Kikola kyanya kyoꞌkutwibwa kweꞌmaaja. Kuganatondeerera imwitu, twe bandu ba Rurema. Na bwo twe tugatondeererwa kwo, kutagi kwo bigaaba imwa ábali mu lahira ukusimbaha Imyazi Miija ya Rurema?