Fillitagol 7:8 - Dewtere Laamɗo Fulfulde Burkina Faso

⁸ Ammaa wo saabe Joomiraaɗo na yiɗi on, wooɗi du, na haajaa tabintinde hunayeere nde hunaninoo maamiraaɓe mooɗon. O rimɗini on, o wurtiniri on semmbe mawɗo leydi Misira, ley suudu maccungaaku e junngo kaananke Fira'awna.

Fillitagol 7:8 ပူးပေါင်းရင်းမြစ်များ

Fuɗɗoode 19:16

Ammaa Luudu wonnoo na sikkitira. Ndeen maleyka'en ɓeen nanngi junngo muuɗum e junngo jom suudu muuɗum e juuɗe ɓiɓɓe muuɗum rewɓe ɗiɗo ɓeen, sabo Joomiraaɗo yurmake mo. Ɓe mburtini ɓe, ɓe ɗowi ɓe faa e caggal wuro ngoon.

Fuɗɗoode 19:29

Nde Laamɗo halkannoo gure gonɗe ley naɗɗol ngool ndeen, miccitii Ibrahiima de danni Luudu. O itti ɗum e halkere ndeen. Nii o halkiri gure ɗo Luudu hoɗunoo ɗoon.

2 Samuwiila 22:20

O yaari kam to ɓillaare walaa, o hisini kam, sabo o korsinɗo kam.

1 Kaanankooɓe 10:9

Yettoore woodanii Joomiraaɗo, Laamɗo maaɗa ceyortooɗo ma de joƴƴini ma dow jooɗorgal laamu Israa'iila. Saabe njinngu ngu Laamɗo woodanii Israa'iila nguun, saabii de o waɗi ma kaananke faa caroroɗaa laaɓal e fonnditaare.

1 Kabaaruuji Laamiiɓe 16:16

Taa njeggitee amaana mo o haɓɓidi e Ibrahiima, taa njeebee hunayeere nde o hunanii Isiyaaka.

Wurtagol 13:14

Ndeen le, ley ko warata, si ɓiɓɓe mooɗon ƴamii on maanaa majjum fu, mbi'on ɗum'en: «Wo Joomiraaɗo wurtiniri min e baawɗe muuɗum mawɗe ley leydi Misira nder wuro maccungaaku.

Wurtagol 13:3

Ndeen Muusaa wi'i yimɓe ɓeen: — Miccoɗon nyalaande nde, wo nyalaande nde mburtiɗon Misira, ley leydi maccungaaku, sabo wo junngo Joomiraaɗo semmbiɗingo wurtini on. Taa nyaamon huunde fuu ko jillaa rabilla.

Wurtagol 20:2

— Miin woni Joomiraaɗo, Laamɗo maaɗa, wo miin wurtini ma leydi Misira ley suudu maccungaaku.

Wurtagol 32:13

Miccita Ibrahiima e Isiyaaka e Israa'iila maccuɓe maaɗa ɓe kunaniɗaa e innde maaɗa de mbiiɗaa a waɗan lenyol muɓɓen ɗuuɗa hono koode kammu. Ciwtoraa a wi'ii a hokkan lenyol maɓɓe leydi ndiin fuu, ndi laatoo ndongu maɓɓe faa abada.

Wurtagol 6:6

Saabe ɗuum mbi'aa yimɓe Israa'iila: Miin woni Joomiraaɗo, mi wurtinan on ley golleeji tiiɗɗi ɗi Misirankooɓe ngatti on ɗiin. Mi dannan on e maccungaaku maɓɓe, mi rimɗiniran on junngo semmbiɗinngo e sariyaaji mawɗi ɗi ngaɗammi.

Matta 11:26

Ayyo, noon jaati Baaba, sabo ɗum weli maa.

Romankooɓe 11:28

Ko Alhuudiyankooɓe ɓeen njaɓaay Kabaaru Lobbo oon ɗuum, ɓe laatorii wayɓe Laamɗo, ammaa wo ɗum saabe mooɗon faa keɓon Kabaaru oon. De ko Laamɗo suɓii ɓe ɗuum, ɓe laatake ɓe o yiɗi saabe maamiraaɓe maɓɓe.

Fillitagol 1:8

Ndaaron, mi hokkii on ndi. Njehee njeytowee ndi. Kayri woni ndi Joomiraaɗo huninoo hokkan maamiraaɓe mon Ibrahiima e Isiyaaka e Yaakuuba laatoo ndongu muɓɓen, kam'en e ƴuwdi muɓɓen fuu.

Fillitagol 10:15

Wo e maamiraaɓe mooɗon tan Joomiraaɗo takkondiri de yiɗi ɗum'en, gaɗa muɓɓen du, wo onon taaniraaɓe muɓɓen ɓeen o suɓii hakkunde lenyi keddiiɗi fuu hono no worri hannden noon.

Fillitagol 23:6

Ammaa Joomiraaɗo, Laamɗo mooɗon salake hettindanaade Balaama. O loomtinirii kuddi ndiin e barke saabe imo yiɗi on.

Fillitagol 33:3

Sikke walaa, Joomiraaɗo na horsini yimɓe muuɗum, seniiɓe makko fuu na ngoni ley juuɗe makko. Iɓe kofoo ɗakkol koyɗe makko, iɓe kettindoo ko o jannginta ɓe.

Fillitagol 4:20

Ammaa onon kaa, Joomiraaɗo nanngii on wurtinii leydi Misira, duɗal taayinoowal njamndi ngaal faa laatoɗon ndongu muuɗum, yimɓe muuɗum, hono no laatoriɗon hannden ni.

Fillitagol 4:34

Yalla woodii alla ennduɗo warude hooƴira lenyol hakkunde lenyol gonungol ley torraaji e maandeeji e kaayeefiiji e konu e semmbe mawɗo e kujje mawɗe kulɓiniiɗe, hono no Joomiraaɗo, Laamɗo mooɗon waɗiri ley leydi Misira e gite mooɗon noon naa?

Fillitagol 4:37

O yiɗii maamiraaɓe mooɗon de o suɓii ƴuwdi muɓɓen. Wo kanko e hoore makko wurtiniri on leydi Misira e semmbe mawɗo.

Fillitagol 5:6

— Miin woni Joomiraaɗo, Laamɗo maaɗa, wo miin wurtini ma leydi Misira, ley suudu maccungaaku.

1 Yuhanna 4:19

Enen le, eɗen njiɗunduri sabo kanko artii yiɗude en.

1 Samuwiila 12:22

Joomiraaɗo du muuyii waɗude on yimɓe muuɗum. O yeebataako on, saabe manngu innde makko.