Tetelonome 28:63 - Tosi Tapu

⁶³ O tatau mo le fiafia leia na maua e le Eteleno o fai kia koutou le nea malie ti mo liuliuga koutou, e toe tatau foki mo le fiafia leia e maua loa e le Eteleno o tamate koutou ti mo maumaui koutou. Ti e taaki loa e ia koutou mei le kele leia e ke ulu loa ki ai o maua tofiga.

Tetelonome 28:63 ပူးပေါင်းရင်းမြစ်များ

Senesi 6:7

Ti na pati loa le Eteleno : E kau fakapuli loa i aluga o le malama nei le tagata leia na kau fakatupu, mei le tagata o kaku ki manu lalasi, mo manu liliki, ti mo manu lele o le lagi ; talie kua kau fakasemala i laku fakatupu ia latou.

Pesalemo 119:68

E ke agamalie ti e ke fai nea malie ; Ako mai kiate au au fakatuutuu !

Taagapati 1:26

Ko au foki, e kau kata loa mo ka kotou nofo loa i le malaia ; E kau gologolo loa mo ka too loa koutou e le i,

Taagapati 2:22

Kae e tuuti loa le kau agasala i le fenua, E taaki loa le kau agaveli i ai.

Esaia 1:24

Koia ko leinei le nea e fakasa e le Aliki, le Eteleno o kau tau, Le Makeke o Iselaele : Io, e kau liufaki loa le veli kia latou ala na agatuu kiate au, Ti e kau totogi loa ki oku fili.

Esaia 6:11

Na kau pati : E kaku loa kiafea Aliki ? Ti na tali loa a ia : E kaku loa ki le maumaui o kolo Ti mo lolatou tuku ke lavaki ; E kaku ki le aso leia e leaise toe maua ai loa se tagata i fale, Ti e maumaui ai loa le fenua e le lavaki ;

Esaia 62:5

Ofaipe se tama tupulaga leia e pipiki ki se taine taupoou, E pipiki loa ou vosa kiate koe ; Ofaipe le taine feauaki leia e fai ia le fiafia o lona avaga, E ke fai ia loa le fiafia o lou Atua.

Selemia 18:7

E fokifa e kau masau, ki se kakai, ki se puleaga, Ke taaki, ke tuuti ti ke maumaui.

Selemia 24:6

E kau tio loa kia latou i loku alofa, ti e kau toe aumai loa latou ki le fenua leinei ; e kau fakanofo loa latou i le fenua, ti e leaise kau toe maumaui loa latou, e kau to loa latou ti e leaise kau toe taaki loa latou.

Selemia 31:28

Ti e faipe laku tokaga kia latou O taaki, mo fatii ki lalo, mo maumaui, mo fakamativa, ti mo fakaveli, E kau toe tokaga loa kia latou o fakatuu mo to, E pati le Eteleno.

Selemia 31:40

E fakatapu loa ki le Eteleno le vaivailiua katoa o le kau mate mo le mugalafu, Ti mo faisaga fuli o kaku ki le liua o Setolone, O kaku ki le matapa o osi i le potu esite, Ti e leaise toe taaki loa pe toe maumaui loa latou i se aso.

Selemia 32:41

E kau fiafia loa i le fai o le nea leia e malie kia latou, Ti e kau to fakamaokioki loa latou i le fenua leinei, I loku loto katoa mo loku laumalie katoa.

Selemia 42:10

Kapau e kotou nonofo i le fenua leinei, e kau fakanonofo oki loa koutou i ai, ti e leaise kau maumaui loa koutou, kae kau to loa koutou, ti e leaise kau toe taaki loa koutou ; talie kua kau fakasemala ki le veli leia na kau fai kia koutou.

Selemia 42:2

O pati kia Selemia, le polofeta : Tali malie amatou kole ! Ulufaki matou ki le Eteleno, lou Atua, mo latou fuli ala koi toe, talie na motou api ti kua motou lavaki, ofaipe le nea leia e ke tio ki ai ;

Selemia 45:4

Pati kiate ia : E folafola le Eteleno, o pati : Ko leinei, e kau maumaui loa le nea leia kua kau fakatuu ; ti e kau taaki loa le nea leia kua kau to, io, le fenua katoa leinei.

Tagi laulau a Selemia 2:9

Kua ogo ona matapa i le kele ; Ti na maumaui e ia mo fatifatii ona ukamea fakamaumau. Kua nofo lona sau mo ona pule i lotolotoga o atu puleaga ; e leaise koi i ai se lao. E leaise koi maua foki e le kau polofeta se nea mei le Eteleno.

Esekiele 33:11

Pati kia latou : E kau mauli ! e pati le Aliki, le Eteleno, ko le nea leia e kau loto ki ai, e leaise ko le mate o le tagata agasala, kae ke fetogi lona mauli ti ke mauli a ia. Kotou toe liliu mai, kotou toe liliu mai i lokoutou ala veli ; kolea e kotou mamate ai loa, fale o Iselaele ?

Esekiele 5:13

E kau fagai loa ke makona loku sausau, ti e kau fakavilo loa loku sausau kia latou o kaku ki loku fimalie ; ti e lotou iloa loa ko au, le Eteleno, kua kau masau i loku sausau, o liligi kia latou loku mafaia.

Taniela 7:8

Na kau tokaga loa ki tala, ti ko leinei na somo ake loa se ga tala ikiiki i loto malie o tala, ti na mataaki loa a tala e tolu o uluaki tala i mua o le ga tala lena. Ti ko leinei, na maua loa e le tala foou lena ni ona mata ofaipe se tagata, ti mo se gutu leia na masau matasoka.

Amosi 5:3

Talie e folafola le Aliki, le Eteleno, o pati : Ko le kolo leia na ave ia ki le tau ni tagata e tino afe E maua ia fai se tino lelau. Ti ko le kolo leia na ave ia ki le tau se tino lelau, E maua ia fai se tino agafulu, ki le fale o Iselaele.

Mikea 7:18

Ko le Atua fea leia e tatau mo koe, Leia e fakamolemole ia le agaveli, leia e galoi ia agasala O le toetoega o lou tofiga ? E leaise taupau e ia lona sausau o lee gato, Talie e fiafia a ia i le manava alofa.

Sofoni 3:17

E nofo le Eteleno, lou Atua i loto malie o ou, ofaipe se tagata toa leia e fakamauli ia a koe ; E maua loa lona fiafia lasi iate koe ; E fakalologo loa a ia i lona alofa ; E sua fakafiafia loa a ia kiate koe.

Luka 15:32

kae na tonu mua ke tou kai mo fakafiafia, talie ko lou taina leinei na mate kae kua toe mauli a ia, ti na puli kae kua toe maua a ia.

Tetelonome 30:9

E fakaapele loa a koe e le Eteleno, lou Atua, ki nea malilie, ti e fakamanuia loa e ia le gaoi katoa o ou lima, mo fua o lou manava, mo le fua o lau kau manu, mo le fua o lou kele, talie e toe maua loa e le Eteleno lona fiafia i le afa o lou manuia, ofaipe lana maua lona fiafia i le afa o le manuia o ou tamana,

Tetelonome 4:27

E fakamavetevete loa koutou e le Eteleno i atu puleaga, ti e toe loa se ga toka teiki fua i puleaga ala e ave loa koutou ki ai e le Eteleno.

Tetelonome 7:22

E kapu mamalie loa e le Eteleno, lou Atua, a puleaga ana o mamao mei ou mata. E leaise feala loa ke ke tamate latou i se temi e tasi, ke aua na tupu loa o lasi a manu o le vao kiate koe.