Taniela 5:8 - Tosi Tapu

⁸ Na ulu ake loa ki fale le kau poto fuli a le sau ; kae na leaise mafai ke lotou lau le fai tosi ti mo fakamatala lona uiga ki le sau.

Taniela 5:8 ပူးပေါင်းရင်းမြစ်များ

Senesi 41:8

I le usu, na mamae loa le laumalie o Falaone, ti na kalagai loa e ia a tagata fainea fakatalatupua fuli mo le kau poto fuli o Esipito. Ti na fakamatala loa e ia kia latou ana moe miti. Kae na leaise mafai ke fakamatala e se tasi a moe miti kia Falaone.

Esaia 47:9

Ko nea ana e lua e soko fakapunamauli loa kiate koe, i le aso e tasi, Lau nofo sala fanau ti mo lau nofo lokonui ; E la vilo fakaagatonu loa kiate koe, Logo ai le mauke o au puleaki fakatemonio fuli, Logo ai le lasi o au fakalaulaakau.

Selemia 50:35

E pati le Eteleno : Ke siki le seleta ki le kau Kaletea, Ki le kakai o Papilone, mo ona pule, mo ona poto !

Taniela 2:27

Na tali loa Taniela i mua o le sau, o pati : Ko le nea leia e kole e le sau ko se nea fakafufu, ti e leaise mafai e le kau poto, mo le kau sivi fetuu, mo le kau masi, mo le kau kikite, ke fakamatala ia ki le sau.

Taniela 4:18

Ko lena le moe miti leia na kau fai, e au, sau ko Nepukatenesale. Ti ko koe, Pelesatesale, fakasa mai kiate au lona uiga, talie na leaise mafai e le kau poto fuli o loku puleaga ke lotou tuku mai a ia. Ko koe, e ke mafai a ia, talie e iate koe le laumalie o atua maokioki.

Taniela 4:4

Ko au, Nepukatenesale, na kau mauli fimalie i loku fale, mo fiafia i loku fale sau.

Taniela 4:7

Ti na au loa le kau fai nea fakatalatupua, mo le kau sivi fetuu, mo le kau Kaletea, ti mo le kau kikite. Na kau fakamatala loa kia latou le moe miti, kae na leaise lotou fakasa mai kiate au lona uiga.

Taniela 5:15

Ko le oki leinei o le aumai ki oku mua o le kau poto ti mo le kau sivi temi, o tupu ke lotou lau ia le faitosi leinei ti ke lotou fakamatala mai kiate au lona uiga ; kae na leaise mafai ke lotou tuku mai le uiga o kupu.