Taniela 4:37 - Tosi Tapu

³⁷ I le temi nei, ko au Nepukatenesale, e kau fakavikiviki, e kau atolasio, ti e kau fakakololiai le sau o le atu lagi, leia e maoki ana gaoi fuli ti e totonu ona ala, ti e mafai ke tuku ia ki lalo latou ala e saele i le fia nealasi.

Taniela 4:37 ပူးပေါင်းရင်းမြစ်များ

Lua tosi o Koloniko 33:19

Ko lana faikole mo le tali a le Atua kiate ia, ana agasala, mo ana agasala ti mo ana agatuu, mo ganea ala na laga ai loa e ia ni ganea taualuga ti na fakatuu ai loa e ia ni taulaatua mo ni fakatata togi i mua o lana fakasemala, e tosi le nea lena i le tosi a Osai.

Esitele 6:10

Na pati loa le sau kia Amane : Too nei le kofu mo le osi, ofaipe lau pati, ti ke fai fenaaki kia Maletoseo, le tagata Sutea, leia e tonatona i le matapa o le sau ; aua na ke tiaki se nea i nea fuli ala kua ke pati ki ai.

Pesalemo 119:75

E kau iloa, ei Eteleno ! e totonu au fakamaauaga ; Talie ko lou agatonu leia na ke fakamamae ai au.

Pesalemo 99:4

Ke fakamalo ki le makeke o le sau leia e alofa ki le faitotonu ! E ke fakamakeke le maokioki, E ke fai le faitotonu mo le maoki i le fale o Sakopo.

Ekesote 18:11

I le aso nei kua kau iloa e lasi ake le Eteleno i atua fuli ; talie kua toe vilo le agaveli a le kau Esipito kia latou.

Ekesote 8:4

Na kalagai loa e Falaone a Moisese mo Alone, o pati : Kolua kole ki le Eteleno ke fakamamao a kelenui meiate au mo loku kakai ; ti e kau tuku loa le kakai ke ano o momoli ni sakilifisio ki le Eteleno.

Esaia 23:9

Ko le Eteleno o kau tau, leia na fai ia le fakapapau lena, Ke taai ai le fia nealasi o nea fuli ala e gigila, Ke tuku ai ki lalo le kau lalasi fuli o le malama nei.

Esaia 5:16

Kae e siki loa ki aluga le Eteleno o kau tau i lana fakamaau, Ti e fakamaokioki loa le Atua maokioki i le faitotonu.

Selemia 50:29

Kotou kalagai ki Papilone le kau faikalolo, koutou fuli ala e poto i le kalolo ! Kotou takatakai a ia, ke aua na sao se tasi ! Kotou totogi kiate ia o mulimuli ki ana gaoi ! Kotou fai katoa kiate ia o mulimuli ki le nea na fai e ia ! Talie na malaga a ia i le fia nealasi ki le Eteleno, Ki le Sagato o Iselaele.

Esekiele 16:56

Pe na leaise ke masau veli ki lou taina ko Sotoma, i le temi o lou fia nealasi,

Esekiele 16:63

O tupu ke ke manatui le temi kua sili ti ke ke fakasemala, o tupu ke aua na toe fakamavaa loa lou gutu ti ke ke luma, mo ka e kau fakamolemole loa kiate koe a nea fuli ala na ke aga o fai, e pati le Aliki, le Eteleno.

Taniela 4:26

Ko le fakatotonu leia ke tuku le tafito leia e tuu ai a aka o le laakau : ko lona uiga e toe tuku loa lou puleaga kiate koe i le aso leia e ke iloa ai loa ko leia e pule e nofo i le atu lagi.

Taniela 4:3

E lalasi ai ana fakamailoga ! E makeke ai ana nea fakamanamana ! Ko lana fakatotonu ko se fakatotonu lee gato, ti e tuu lana pule i tautupu mo tautupu.

Taniela 4:34

I le oki o le temi leia na fakatuutuu ki ai, ko au, Nepukatenesale, na tio loa oku mata ki le lagi, ti na toe au loa loku atamai kiate au. Na kau fakafetai loa ki le Atua Taualuga. Na kau fakavikiviki mo fakakololia ki leia e mauli o lee gato, leia ko lana pule ko se pule lee gato, ti ko lona puleaga e tuu i tautupu mo tautupu.

Taniela 5:4

Na lotou inu loa se vino, ti na lotou fakavikiviki loa ki atua aulo, mo atua siliva, mo atua sila, mo atua ukamea, mo atua laakau, ti mo atua fatu.

Mateo 11:25

I le temi lena, na masau loa Sesu, o pati : E kau fakafetai kiate koe, Tamana, Aliki o le lagi mo le kele, i lau fufu a nea anei ki le kau poto mo le kau atamai, kae na ke fakasa latou ki toe liliki.

Gaoi 17:24

Ko le Atua leia na fakatupu ia le malama nei mo nea fuli i ai, leia ko le Aliki o le lagi mo le kele, e leaise nofo fua a ia i ni fale tapu ala e fau e le lima o le tagata ;

Tetelonome 32:4

Ko le Utu a ia ; e malie tukupau ana gaoi, Talie e agatonu ona ala fuli, Ko se Atua agatonu mo faitotonu a ia, E apele a ia i le agatonu mo le maokioki.

Apokalipisi 15:3

Ti na lotou sua loa le katiko a Moisese ko le tagata fakasausau a le Atua, ti mo le katiko o le Akeno, o pati : E lalasi ai mo fulumalie ai au gaoi, ei Aliki ko le Atua Mafimafi ! E maokioki mo maoki ou ala, Sau o atu puleaga !

Apokalipisi 16:7

Ti na kau logo loa ki se tasi ake aselo leia na pati mei le aletale : Io, Aliki ko le Atua Mafimafi, e agatonu mo maokioki au fakamaau.

Uluaki tosi a Samuele 2:3

Aua na kotou toe masau fia nealasi ; Ke aua na mapuna mai le masau makeke i lokoutou gutu ; Talie ko le Eteleno ko se Atua leia e iloa ia a nea fuli, Ti ko ia leia e fua ia a gaoi fuli.