Selemia 7:20 - Tosi Tapu

²⁰ Koia e folafola ai le Aliki, le Eteleno, o pati : Ko leinei, kua liligi loku sausau mo loku mafaia ki le ganea leinei, Ki tagata mo manu, Ki laakau o faisaga mo fua o le kele ; Kua mu loku sausau ti e leaise toe mate loa a ia.

Selemia 7:20 ပူးပေါင်းရင်းမြစ်များ

Lua tosi o Sau 22:17

Talie na lotou tiaki au ti na lotou momoli ni nea fakamanogi ki ni taulaatua, o tupu ke kau itaita ai ki gaoiaga fuli o olatou lima, e vilo loa loku itaita ki le ganea leinei, ti e leaise toe taofi loa a ia.

Esaia 10:17

E liliu loa le malama o Iselaele ko se afi, Ti ko lona Sagato ko se ula, Leia e tutu ia loa o okioki ona uluvao gaoa mo talatala I le aso fai e tasi ;

Esaia 42:25

Koia na liligi ai e ia ki Iselaele le vevela o lona ita, Ti mo le makeke o le tau ; Ti na tutu a ia e le tau mei potu fuli, kae na leaise matala fua a ia ; Na vela a ia i le tau, kae na leaise tokaga fua a ia ki ai.

Esaia 66:24

Ti ka mavae loa mei ai, e tio loa Ki mate o latou ala na agatuu kiate au ; Talie e leaise mamate loa olatou ilo, ti e leaise toe mate loa lolatou afi ; Ti e lotou liliu loa ko se nea fakalialia ki le kakai katoa.

Selemia 11:16

Oliveto mata, leia na mailoga kese i le fulumalie o lou fua, Ko lena lou igoa leia na soli atu kiate koe e le Eteleno : Kua tutu e ia a ia ki le afi i se logoa lasi, Ti kua fatifati ona laa.

Selemia 12:4

E kaku loa ki afea le tagi o le kele, Ti mo le gini o le vao o faisaga fuli ? O tupu ko le agaveli o latou e nonofo i ai. Kua pupuli a manu vae fa mo manu lele, Talie lotou pati : E leaise tio loa a ia ki lotatou ikuaga.

Selemia 14:16

Ti ko latou ala e lotou kikite ki ai, E tuku mamate loa i ala o Selusalemi, I le oge mo le seleta ; E leaise tasi loa ke tanu ia latou, Latou mo alatou avaga, mo olatou vosa, mo olatou taineliki ; E kau liligi loa kia latou lalatou agaveli.

Selemia 17:27

Kae kapau e leaise kotou fakalogo mo ka kau fakatotonu atu kia koutou Ke fakatapu le aso o le sapato, Ke aua na amo se amoga, Ke aua na fakaulu se amoga i matapa o Selusalemi i le aso o le sapato, Ti e kau tutu loa se afi i matapa o le kolo, Ti e kai loa e ia a fale fakaalialiki o Selusalemi, ti e leaise toe mate loa a ia.

Selemia 17:4

E ke sala loa i le tofiga leia na kau soli atu kiate koe o tupu ko lau agasala ; E kau tuku loa a koe ke popula ki lou fili, i se fenua leia e leaise ke iloa ; Talie na kotou tutu le afi o loku sausau, Ti e ula loa a ia o lee gato.

Selemia 18:23

Kae ko koe, Eteleno, e ke iloa alatou fonofono veveli fuli ke tamate au. Aua na ke fakamolemole lalatou agaveli, Aua na ke soloi lalatou agasala i ou mua ! Tautea latou i le aso o lou sausau !

Selemia 21:12

Fale o Tavite ! E folafola le Eteleno, o pati : Kotou kamata okoutou aso i le fai o ni fakamaau i le faitotonu, Kotou fakalauatea le tagata popula i lima o lona pule, Ke aua na vilo loku sausau ofaipe se afi, Ti ke aua na ula a ia kae e leaise mafai loa lona tamate, O tupu ko le agaveli o akoutou gaoi.

Selemia 42:18

Talie e folafola le Eteleno o kau tau, le Atua o Iselaele : E kau liligi loa loku sausau kia koutou ofaipe laku liligi a ia ki le kakai o Selusalemi, mo kapau e kotou ano loa ki Esipito ; e kotou liliu loa ko se nea fakalialia, mo fakaii, mo fakatupu malaia, mo fakalumaluma, ti e leaise kotou toe tio loa ki le ganea leinei.

Selemia 44:6

Ti na kau liligi loa loku sausau mo loku mafaia, ti na tutu loa a kolo o Suta, mo ala o Selusalemi, ala kua liliu ko ni kolo maumau ata ti ko se toafa, ofaipe le nea e tio ki ai i le aso nei.

Selemia 6:11

Kua kau apele i le sausau o le Eteleno, e leaise koi mafai ke kau taofi a ia i loku loto. Liligi a ia ki le toe ikiiki i le ala, Ti mo le fakatasiga a le kau tupulaga. Talie e too loa le tagata mo le fafine, Le matua ti mo leia kua mafaia i fetuu.

Selemia 6:12

E tuku loa olatou fale ki ni iki, Mo olatou faisaga ti mo alatou avaga, I le aso leia e falo ai loa loku lima ki le kakai o le fenua, E pati le Eteleno.

Selemia 8:13

E kau loto ke fakapuli latou fuli, e pati le Eteleno ; E leaise toe maua loa se fa vite i le vite, Pe ko se fa fiki i le fiki, Ti e gini loa a lau ; Ti e sola loa ia latou le nea leia na kau soli kia latou.

Tagi laulau a Selemia 4:11

Kua fakakatoa e le Eteleno lona sausau, Kua liligi e ia lona sausau lasi ; Kua tafu e ia i Sione se afi, Leia e kai ia ona fakatafito.

Esekiele 22:22

Ofaipe le paaga leia e susua loa i le gutuumu, e kotou susua fenaaki loa i loto malie o Selusalemi. Ti e kotou iloa ai loa ko au, le Eteleno, kua kau liligi loku sausau kia koutou.

Esekiele 7:12

Kua soko mai le temi, kua ofi mai le aso ! Ke aua na fiafia leia e totogi, Ke aua na mamae leia e fakatau ! Talie kua mapaa le sausau ki le kakai katoa.

Esekiele 7:14

Kua pupusi le fakatagi pupusi, kua tokamalie nea fuli, Kae e leaise saele se tasi ki le tau ; Talie e vilo loku sausau ki le kakai katoa.

Taniela 9:11

Kua maumaui e Iselaele katoa lau lao, ti kua lotou mafuli kese talie ke aua na lotou fakalogo ki lou leo. Koia kua liligi ai kia matou a malaia ala na tosi i le lao a Moisese, le tagata fakasausau a le Atua, talie kua motou agasala ki le Atua.

Levitiko 26:28

e kau toe soko atu aifai laku fakatutuu makeke kia koutou, ti e kau toe liuga loa kia koutou o tua fitu le tautea o lakoutou agasala.

Naume 1:6

Ko ai e tuu loa i mua o lona sausau ? Ko ai e tuu loa i mua o lona sausau lasi ? E mafola lona sausau ofaipe le afi, Ti e mafaafaa a utu i ona mua.

Sofoni 1:2

E kau maumaui loa a nea fuli i aluga o le malama nei, E pati le Eteleno.

Sofoni 1:3

E kau maumaui loa tagata mo manu, A manu lele o le lagi mo ika o le tai, A nea fakatupu siga mo le kau agaveli mo latou ; E kau tuuti loa a tagata i aluga o le malama nei, E pati le Eteleno.

Sakalia 7:12

Na lotou fakafefeka olatou loto ofaipe se fa taimane, ke aua na lotou fakalogo ki le lao mo folafola ala na fakasa kia latou e le Eteleno o kau tau i lona Laumalie i ana kau polofeta mua. Koia na ula ai le sausau lasi o le Eteleno.

Malakia 4:1

Talie ko leinei, e au le aso, Kaka ofaipe se gutuumu. Ko le kau fia nea lasi fuli mo le kau agaveli fuli e fai loa pe le penu ; E tutu loa latou e le aso leia e au, E pati le Eteleno o kau tau. E leaise toe loa ia latou se aka pe ko se taulu.

Mateo 3:12

E too e ia i lona lima lana laakau sasa fulumeto, ti e fakamea loa e ia lona sasaaga fulumeto, ti e tanaki loa e ia lana fulumeto ki le fale tanaki magiti, kae e tutu loa e ia a kaui fulumeto i se afi leia e leaise toe mate.

Apokalipisi 14:10

ti e inu loa e ia totonu le vino o le sausau o le Atua, leia kua liligi fakataufua ki le ipu o lona sausau ; ti e fakamamaei loa a ia i le afi mo le sulifa, i mua o le kau aselo maokioki ti mo mua o le Akeno.