Selemia 22:3 - Tosi Tapu

³ E folafola le Eteleno, o pati : Kotou fai le faitotonu mo le agatonu ; kotou saofaki leia kua fakamakeke mei lima o leia e fakamakeke ake kiate ia. Aua na kotou fakavelivelii le matapule, mo le fanau sala matua, mo le fafine lokonui. Aua na kotou agaveli, ti aua na kotou liligi le toto o le tagata agatonu i le ganea leinei.

Selemia 22:3 ပူးပေါင်းရင်းမြစ်များ

Lua tosi a Samuele 23:3

Na masau le Atua o Iselaele, Na pati mai kiate au le utu o Iselaele : Ko leia e pule ki le kakai i le faitotonu, Ko leia e pule i le fakaapaapa ki le Atua,

Lua tosi o Sau 24:4

ti mo le toto leia na liligi noa e Manase, ti mo tukipo ala na fakaapele e ia ki ai a Selusalemi. Koia na leaise loto ai le Eteleno ke fakamolemole kia latou.

Sopo 22:9

Na ke kakau ke ano le fafine lokonui mo ona lima ata, Ti na ke fatifatii a lima o toe sala matua.

Sopo 24:9

E tosoi le toe sala tamana i le u o lona tinana. E too le taupulupulu o le tagata mativa kae fakagaoi a ia.

Pesalemo 68:5

Kotou sua ki le Atua ! kotou fakafetai ki lona suafa ! Kotou tofa le ala ki leia e saele mai i le toafa ! Ko le Eteleno lona suafa : Kotou fiafia i ona mua !

Pesalemo 82:4

Kotou fakamauli leia e mamae mo le tagata e maimoa, Kotou saofaki latou i le lima o le kau agaveli.

Pesalemo 94:21

E lotou fakatasi ki le mauli o le tagata agatonu, Ti e lotou tautea noa le tagata saosaoa.

Pesalemo 94:6

E lotou tamate le fafine lokonui mo le matapule, E lotou tukipooi a toe sala matua.

Ekesote 22:21

Aua na ke fai fakaveliveli loa le matapule, pe ke fakagaoi fakamakeke loa a ia ; talie na kotou matapule i le fenua o Esipito.

Ekesote 22:22

Aua na ke fai fakaveliveli loa le fafine leia kua mate lona avaga, pe ko le toe leia kua sala matua.

Taagapati 23:10

Aua na ke siki le koiga mago, Ti aua na ke ulu ki le faisaga o ni fanau sala matua ;

Taagapati 6:17

Ko mata ala e fia nealasi, mo le alelo leia e loi, Mo lima ala e liligi ia le toto saosaoa,

Esaia 1:23

Kua agatuu ou pule ti kua lotou kau mo le kau kaia : Kua lotou manako fuli ki nea alofa ti kua lotou makape i muli o fakapale ; E leaise lotou fai le nea e totonu ki le toe sala matua, Ti e lotou fakatulituli ki le tagi a le fafine lokonui.

Esaia 58:6

Ko leinei le sesunio leia e kau fiafia ai : Vevete a tini o le agaveli, Tatala a sai o le popula, Tuku ke lauatea latou e mafaia, Ti ke motusi a amoga kesekese fuli.

Esaia 58:7

Vaevae lau pane mo leia e fia kai, Fakaulu ki lou fale latou e fakaaloalofa mo sala nofoaga ; Ka ke tio ki se tagata telefua, uufi a ia, Kae aua na ke maliu kese i leia e tatau mo koe.

Selemia 19:4

O tupu kua lotou tiaki au, ti kua lotou fakakelekele le ganea leinei, Kua lotou momoli i ai le iseso ki ni atua kese Ala na leaise lotou iloa, e latou, mo olatou tamana, mo sau o Suta, Ti kua lotou fakaapele le ganea leinei ki le toto mea ;

Selemia 21:12

Fale o Tavite ! E folafola le Eteleno, o pati : Kotou kamata okoutou aso i le fai o ni fakamaau i le faitotonu, Kotou fakalauatea le tagata popula i lima o lona pule, Ke aua na vilo loku sausau ofaipe se afi, Ti ke aua na ula a ia kae e leaise mafai loa lona tamate, O tupu ko le agaveli o akoutou gaoi.

Selemia 22:17

Kae kua ke tuku ata ou mata mo lou loto Ki le manumanu koloa, Ke liligi le toto mea, Ke fai le fakaveliveli mo le fakamakeke.

Selemia 26:16

Na pati loa le kau pule mo le kakai katoa ki le kau faisakilifisio mo le kau polofeta : E leaise tonu ke mate le tagata leinei ; talie kua masau a ia kia tatou i le suafa o le Eteleno, lotatou Atua.

Selemia 5:28

Kua lotou pepeti, ti kua lotou gigila ; Kua lotou fakalaka i fuafua fuli o le veli ; E leaise lotou fakamaau i le faitotonu, E leaise lotou fakamaau i le faitotonu le toe sala matua, leia e tonu ke malo i lona fakamaau ; E leaise lotou fai le nea e totonu ki le kau mativa.

Selemia 7:23

Kae ko leinei le fakatotonu leia na kau tuku kia latou : Kotou fakalogo ki loku leo, Ti e kau liliu loa ko lokoutou Atua, Ti e kotou liliu loa ko loku kakai ; Kotou saele i ala fuli ala na kau fakatotonu atu kia koutou, O tupu ke kotou manuia.

Selemia 9:24

Kae ko leia e loto ke fakakololia, ke fakakololia a ia O tupu ko lana maua se atamai ti mo lana iloa au, Lana iloa ko au ko le Eteleno Leia e fai ia le agamalie, mo le lao, mo faitotonu i le malama nei ; Talie ko lena le nea e kau fiafia ai, e pati le Eteleno.

Tagi laulau a Selemia 3:36

Ka fakalakasala se tasi i lona fakamaau, Pe leaise tio le Aliki ki ai ?

Esekiele 18:12

ti kapau e fakamakeke e ia le tagata fakaaloalofa mo le tagata mativa, ti kapau e kaia a ia, ti kapau e leaise liufaki e ia le koloa o leia na gaoi kiate ia, ti kapau e tausi a ia ki taulaatua, o fai ni nea fakalialia,

Esekiele 18:7

Leia e leaise fakamakeke ia se tasi, leia e liufaki ia ki le tagata tuu maua lana nea fakamaoki, leia e leaise kaia ia se tasi, leia e soli ia lana pane ki leia e fia kai ti e fakalava ia leia e telefua,

Esekiele 22:7

Kua tiaki iate koe le tamana mo le tinana, ti kua fai fakamakeke ki leia e matapule iate koe, ti kua fakapopulai le toe sala matua mo le fafine lokonui.

Esekiele 45:9

E folafola le Aliki, le Eteleno, o pati : Kua feauga, tama aliki o Iselaele ! Ke kotou tuku la le agamakeke mo le kaia, kae ke kotou fai la le nea leia e sako mo le maoki, ke kotou tuku la le kaia o koloa o loku kakai, e pati le Aliki, le Eteleno.

Soele 3:19

E maumau loa Esipito, E liliu loa Etome o toafa, O tupu ko agamakeke ki fanau o Suta, Ala na lotou liligi le toto saosaoa i lolatou fenua.

Levitiko 19:15

Aua na ke fai loa se tonu sala i au fakamaau : aua na ke tio loa ki le mativa o se tagata, ti aua na ke tio loa ki le mauiga o se tagata, kae e ke fakamaaui loa lou oloi o mulimuli ki le lao totonu.

Amosi 5:15

Kotou vesia ki le veli ti kotou alofa ki le malie, Kotou fakamaau i le faitotonu ; Ti e lagi alofa loa le Eteleno, le Atua o kau tau, Ki toetoega o Sosefo.

Amosi 5:24

Kae ke fai le loto sako pe se tafe, Ti mo le faitotonu pe se liua makeke leia e leaise toe masa i se aso.

Mikea 3:11

E fakamaau ona pule ki ni nea alofa, Ona tagata faisakilifisio ki se totogi, Ti e kikite ona polofeta ki se paaga ; Ti e lotou toa i le fanaki ki le Eteleno, o pati : Pe leaise nofo le Eteleno i loto malie o tatou ? E leaise kaku mai loa le malaia kia tatou.

Mikea 6:8

Na fakasa kiate koe, ei tagata, le nea leia e malie ; Ti ko le nea leia e kole atu e le Eteleno kiate koe, Ke ke fai le nea leia e totonu, Ke ke alofa ki le manava alofa, Ti ke ke saele mo lou Atua i le agamalu.

Malakia 3:5

E kau fakafeofi loa kia koutou ki le fakamaau, Ti e kau fakatavili loa o fakamaoki ki le kau faikikite loi mo le kau tono fafine, Kia latou ala e fakapapau loi, Kia latou ala e taofi ia le totogi o le tagata gaoi, Latou ala e fakamamae ia le fafine sala avaga mo le toe sala matua, Mo latou ala e agaveli ki le matapule, ti mo latou ala e leaise i kiate au, E pati le Eteleno o kau tau.

Mateo 23:23

Malaia kia koutou, kau sekelipa mo kau faliseo malualoi ! Talie e kotou totogi le vaega kau agafulu o le menete, mo le aneti, mo le kumini, kae e kotou tuku kese a nea mauiga o le lao, le faitotonu, mo le manavaalofa, ti mo le maokioki : Ko na a nea ala e tonu ke fai, ti e leaise fakanoai foki mo la ake a nea.

Tetelonome 10:18

E fakamaaui e ia i le faitotonu le fanau sala matua mo le fafine sala avaga. E alofa a ia ki le matapule leia e nofo i lou fenua, o soli kiate ia le nea kai mo le nea lava.

Tetelonome 24:17

Ke aua na ke fakasalai ia loa se fakamaau ke veli ki le matapule mo le fanau leia kua mate lona tamana, ti ke aua na ke too ia loa a kofu o se fafine leia kua mate lona avaga ke fakamaoki ai le totogi o se maua.

Tetelonome 24:7

Kapau e maua loa se tagata leia na kaia ia se tasi i ona fetaina, se tasi o fanau totonu a Iselaele, leia na fakaliliu e ia lona taina ko se tagata popula pe na fakatau ia a ia, e tautea loa le tagata lena ki le mate. E ke too loa i ai le veli i loto malie o Iselaele.

Tetelonome 25:1

Ka fefele loa ni tagata, ti na la ano loa ki mua o le fakamaau ke fakamaaui laua e le tui fakamaau, e fakamatatonu loa leia e mea, kae fakatuaa loa leia e sala.

Tetelonome 27:19

Ke malaia le tagata leia e fakasalai ia loa le fakamaau o se matapule, pe ko se fanau leia e sala tamana, pe ko se fafine leia e sala avaga ! Ti e pati loa le kakai katoa : Amene !

Sakopo 1:27

Ko le lotu leia e mea mo lee mele i mua o le Atua ko le Tamana, ko le fakatele ki fanau sala matua mo lokonui i olatou mamae, ti mo le fakamamao mei nea kelekele fuli o le malama nei.