12 E ano loa a kolo o Suta mo le kakai o Selusalemi, O tagi ki atua ala na lotou momoli ki ai le iseso, Kae e leaise lotou fakamauli loa latou i le aso o lolatou malaia.
Kotou fakatasi ti kotou au, kotou fakafeofi fakatasi mai, Koutou ala na sao i atu puleaga ! E leaise lotou maua ia se atamai, latou ala e amo ia olatou taulaatua laakau, Ala e faikole ki se atua leia e leaise mafai ke fakamauli ia latou.
E lotou amo a ia, ti e lotou teki a ia ki olatou tuauma ; E lotou fakatuu a ia ki lona tuuaga, ti e nofo a ia i ai ; E leaise taugaoi a ia i lona tuuaga ; Ti e lotou kalaga ki ai, kae e leaise tali a ia, E leaise fakamauli e ia i le mamae.
Kae kua galoi au e loku kakai, e momoli e ia le iseso ki ni taulaatua. Kua taki a ia ke siga i ona ala, ke tiaki a ala afea, Kae ke mulimuli i ni ala gaoa, ala na leaise fakalauatea.
Kofea ou atua ala na ke fau ia kiate koe ? Ke lotou tutuu ki aluga, mo kapau e mafai ke lotou fakamauli a koe i le aso o le malaia ! Talie kua tatau le lasi o ou atua mo ou kolo, ei Suta !
Kolea e kotou fakatupu ai loku sausau ki gaoiaga o okoutou lima, o kotou momoli le iseso ki ni iki ake atua kese i le fenua o Esipito, leia kua kotou ano o nonofo i ai, ke tupu ai lokoutou mamate ti ke kotou liliu ai ko se nea fakatupu lauveli mo fakalumaluma i puleaga fuli o le kele ?
A atua ala na kai ia a gako o alatou sakilifisio, Ti na inu ia a vino o alatou moliga ? Ke lotou tutuu mai ki aluga, ti ke lotou saofaki koutou, Ke lotou puipui koutou !