Selemia 11:10 - Tosi Tapu

¹⁰ Kua lotou toe liliu ki agasala o olatou uluaki tamana, Ala na leaise fia fakalogo ki aku folafola, Ti na lotou ano ki ni iki ake atua kese, o tausi latou. Na maumaui e le fale o Iselaele mo le fale o Suta laku sai, Leia na kau fai mo olatou tamana.

Selemia 11:10 ပူးပေါင်းရင်းမြစ်များ

Pesalemo 78:57

Na lotou fakamamao loa ti na leaise lotou agatonu loa ; ofaipe olatou tamana, Na lotou toe liliu loa ki muli ofaipe se kalolo kaka.

Esaia 24:5

Na fakakelekele le fenua e lona kakai ; Talie na lotou maumaui a lao, ti na lotou fetogi ia a fakatotonu, Na lotou maumaui le sai lee gato.

Selemia 13:10

Ko le kakai agaveli lena, leia e leaise fia fakalogo ki aku folafola, Leia e mulimuli ki oli o lona loto, Leia e ano ki ni iki atua kese O tausi kia latou ti mo tulolo i olatou mua, Ke liliu a ia ofaipe le kilipipi leinei, Leia e leaise koi aoga ki se nea !

Selemia 17:23

Na leaise lotou fakalogo, na leaise tokaga olatou taliga ; Na lotou fakafefeka olatou ua, Ke aua na fakalogo mo tali le akonaki.

Selemia 22:9

Ti e tali loa kia latou : Talie na lotou tiaki Le sai a le Eteleno, lolatou Atua, Talie na lotou punou i mua o ni atua kese, ti na lotou tausi kia latou.

Selemia 31:32

E leaise faipe le sai leia na kau fai mo olatou tamana, I le aso leia na kau too ai latou i le lima o fakamavae latou i le fenua o Esipito, Sai leia na lotou maumaui, Logo ko au ko lolatou pule, e pati le Eteleno.

Selemia 44:16

E leaise motou fakalogo loa ki se nea i nea ala kua ke fakasa mai kia matou i le suafa o le Eteleno.

Selemia 44:5

Kae na leaise lotou fakalogo, na leaise tokaga olatou taliga, na leaise lotou tafoki mei alatou agaveli, ti na leaise gato lalatou momoli le iseso ki ni iki ake atua kese.

Selemia 7:28

Koia pati kia latou : Ko leinei le kakai leia e leaise fakalogo ki le leo o le Eteleno, lona Atua, Ti e leaise loto ke tali ia se akonaki ; Kua puli le maoki, kua mavae a ia i lolatou gutu.

Selemia 9:6

E tuu lou nofoaga i loto malie o le kaka ; E leaise lotou fia iloa au, o tupu ko le fai kaka, E pati le Eteleno.

Esekiele 16:59

Talie e folafola le Aliki, le Eteleno, o pati : E kau fai loa kiate koe o mulimuli ki le nea leia na ke fai, a koe leia na nukinuki ki le fakapapau o motusi le sai.

Esekiele 44:7

Talie kua kotou fakaulu ki loto o loku sagatualio ni kau matapule lee silikosisio i le loto ti lee silikosisio i le kanofi, ke kelekele ai loku fale ; ti kua kotou momoli laku pane, le gako mo le toto, ki akoutou nea fakalialia fuli, ti kua kotou motusi laku sai.

Esekiele 5:6

Kua maumaui e ia aku lao mo aku fakatotonu, ti kua agasala a ia o lasi ake i atu puleaga mo fenua i ona takatakai ; talie kua tiaki e ia aku lao, ti na leaise mulimuli a ia ki aku fakatotonu.

Oseo 6:4

Kolea e kau fai loa kiate koe, Efalaimi ? Kolea e kau fai loa kiate koe, Suta ? Ko lokoutou alofa kiate au e faipe le kokofu i le usu, Pe le sasau leia e puli vave !

Oseo 6:7

Kua lotou maumaui laku sai ofaipe la ake tagata ; Koia leia kua lotou agatuu ai kiate au.

Oseo 7:16

E leaise ko le Taualuga leia e lotou tafoki ki ai ; E lotou pikopiko ofaipe se gasau kaka. E mamate loa olatou pule i le seleta, O tupu ko le matasoka o lolatou alelo. Ko le nea lena e katai ai loa latou i Esipito.

Levitiko 26:15

Ti kapau e kotou tiaki loa aku fakatotonu, ti kapau e vesia loa okoutou laumalie ki aku fakatotonu, o leaise kotou mulimuli loa ki aku folafola fuli ti e kotou motusi loa laku sai,

Sofoni 1:6

Mo latou ala na maliu kese i le Eteleno, Ti mo latou ala e leaise afa ia le Eteleno, Latou ala e leaise afa ia lona finegalo.

Sakalia 1:4

Aua na kotou faipe okoutou tamana, ala na masau ki ai le kau polofeta i mua, o pati : E folafola le Eteleno o kau tau : Kotou maliu mei okoutou ala veveli, ti mo akoutou gaoi veveli ! Kae na leaise lotou fakalogo, ti na leaise lotou tokaga fua kiate au, e folafola le Eteleno.

Sakalia 7:11

Kae na lotou patigataa o leaise lotou fakalogo, ti na lotou titua o tapono olatou taliga ke aua na lotou logo.

Sakalia 7:13

Ka kalaga loa le Eteleno, na leaise lotou fakalogo : Koia e pati ai le Eteleno : na leaise kau fakalogo kia latou mo ka lotou kalaga mai kiate au.

Tetelonome 31:16

Na pati loa le Eteleno kia Moisese : ko leinei ka ke mate loa. Ti ko le kakai leinei e malaga ake loa ki aluga o faiaga mo atua kese o le fenua leia ka ulu loa a ia ki ai. E tiaki loa e ia au ti e maumaui loa e ia laku sai, leia na kau fakamaoki mo ia.

Tetelonome 9:7

Ke ke manatui, ti ke aua na galo iate koe le aso leia na ke fakatupu ai le sausau o le Eteleno, lou Atua, i le toafa. Na ke fakafesagai ki le Eteleno mei le aso leia na ke mavae ai i le fenua o Esipito o kaku ki le aso leia na ke kaku mai ai ki le ganea leinei.

Epelo 8:9

O leaise faipe le sai leia na kau fai loa mo olatou tamana, Ile aso leia na kau too ai latou i le lima Ke fakamavae latou i le fenua o Esipito ; Talie na leaise lotou kataki fualoa i laku sai, Ti ko au foki na leaise kau tokaga kia latou, e pati le Aliki.

Tuifakamaau 2:11

Ti na fai loa e fanau a Iselaele le nea leia e veli ki mata o le Eteleno, ti na lotou tausi loa ki Paale.

Tuifakamaau 2:17

Kae na leaise lotou fakalogo foki ki olatou tui fakamaau, talie na lotou tausi loa ki ni atua kese, ti na lotou punou loa i olatou mua. Na lotou maliu vave ai mei le ala leia na saele ai olatou tamana ala na fakalogo ki folafola a le Eteleno : Na lotou fai loa ni nea faikese.

Tuifakamaau 2:19

Kae i le mate o le tui fakamaau, na lotou toe liliu loa o veli ake i olatou tamana. Na lotou toe pipiki loa ki ni atua kese, o tausi loa kia latou ti mo atolasio loa kia latou. Na leaise lotou tiaki loa alatou aga fakalialia mo alatou agatuu.

Uluaki tosi a Samuele 15:11

Kua kau fakasemala i laku fakanofo Saulo ke sau, talie kua maliu kese a ia iate au ti e leaise tausi e ia aku folafola. Na mamae ai a Samuele, ti na tagi loa a ia ki le Eteleno i le po katoa.