Oseo 2:13 - Tosi Tapu

¹³ E kau fakagato loa lona fiafia katoa, mo ona aso lalasi, mo ona masina foou, mo ona sapato, ti mo ona katoaga fakaalialiki fuli.

Oseo 2:13 ပူးပေါင်းရင်းမြစ်များ

Lua tosi o Sau 1:2

Ti na vilo loa Akasia mei le katupa o lona kogafale fata i Samalia, o masaki. Na kakau loa e ia ni tagata avelogo, o pati kia latou : Kotou ano o afa kia Paale Sepu, atua o Ekeloni, pe kau mauli loa mei le masaki leinei.

Lua tosi o Sau 10:28

Na fakapuli loa e Seu le tausi kia Paale i Iselaele ;

Lua tosi o Sau 21:3

Na toe fakatuu loa e ia a ganea taualuga, ala na maumaui e Esekiasi, lona tamana ; na fakatuu loa e ia ni aletale kia Paale, ti na fai loa e ia se fakatata o Asetalate, ofaipe le fai e Akapo, sau o Iselaele, ti na atolasio loa a ia ki le kau tau katoa o le lagi mo tausi ki ai.

Sopo 8:13

Ko lena le nea leia e soko kia latou fuli ala e galoi ia le Atua ; E puli loa lena le amanaki malie a le tagata agaveli.

Pesalemo 106:13

Kae na lotou galoi vave loa ana gaoiaga, Na leaise lotou talitali loa ki le fakasoko o ana fakatuutuu.

Pesalemo 106:21

Na lotou galoi loa le Atua, lolatou fakamauli, Leia na fai ia ni nea lalasi i Esipito,

Pesalemo 78:11

Na lotou tuku loa ke galo a ana gaoi, Ana nea fulumalilie ala na fakatio e ia latou ki ai.

Ekesote 32:34

Ano, taki le kakai ki le ganea leia na kau pati atu ki ai. Ko leinei, e saele loa loku aselo i ou mua, kae i le aso o laku lagavaka, e kau tautea loa latou i lalatou agasala.

Esaia 17:10

O tupu na ke galoi le Atua o lou fakamauli, Na leaise ke manatui le utu o lou ulufaga. Koia na ke fai ai ni oloto malolo, Ti na ke to ai ni tafito vite matapule.

Esaia 65:7

O akoutou agaveli, e pati le Eteleno, ti mo agaveli o okoutou tamana, Ala na tutu ia le iseso i aluga o mauga, ti na nukinuki kiate au i aluga o mauga liliki ; E kau fuafua loa kia latou le totogi totonu o alatou gaoi i le temi kua sili.

Selemia 11:13

Talie e mauke tatau ou atua mo ou kolo, ei Suta ! Ti e lasi tatau a ala o Selusalemi Mo aletale ala na kotou fakatuu ki taulaatua, Ke momoli ai le iseso kia Paale…

Selemia 18:15

Kae kua galoi au e loku kakai, e momoli e ia le iseso ki ni taulaatua. Kua taki a ia ke siga i ona ala, ke tiaki a ala afea, Kae ke mulimuli i ni ala gaoa, ala na leaise fakalauatea.

Selemia 2:32

Pe galoi e le taine taupoou ona teu ? Pe galoi e le taine feauaki lona kilipipi ? Kae na galoi au e loku kakai Talu mei fualoa.

Selemia 23:2

Koia e folafola ai le Eteleno, le Atua o Iselaele, o pati Ki tagata tausi manu ala e fagai ia loku kakai : Na kotou fakamavete laku kau ovi, na kotou kapu latou, Na leaise kotou tokaga kia latou. Ko leinei, e kau tautea loa koutou o tupu ko le agaveli o akoutou gaoi, E pati le Eteleno.

Selemia 7:34

E kau fakagato loa i kolo o Suta ti mo ala o Selusalemi A kalaga fakafiafia, mo kalaga nekenekea, A sua a le tama feauaki ti mo sua a le taine feauaki ; Talie e liliu loa le fenua ko se toafa.

Selemia 7:9

Kolea ! Kaia, tukipo, tono avaga, Fakapapau loi, momoli iseso kia Paale, Tausi ki ni atua kese ala e leaise kotou iloa !…

Tagi laulau a Selemia 1:4

Kua tagi a ala fuli o Sione, talie e leaise koi ano ki aso lalasi ; Kua lavaki ona matapa fuli, Kua lauga ona tagata faisakilifisio, Kua loto gaegae ona taine taupoou, Ti kua apele i le mamae kona.

Tagi laulau a Selemia 5:14

E leaise koi ano le kau matua ki le matapa, E leaise koi sua le kau tagata tupulaga.

Esekiele 16:12

Ti na kau fakapiki loa se fa sau ki lou isu, mo se sa sau ki ou taliga, mo se pala fulumalie ki lou ulu.

Esekiele 16:17

Na ke too loa lou teu fulumalie leia na fai ki le aulo mo le siliva, leia na kau soli atu kiate koe, ti na ke fai loa ki ai ni fakatata o ni tagata, ti na ke faiaga loa kia latou.

Esekiele 22:12

Kua tali i lou fale ni nea alofa ke liligi ai le toto ; ti kua ke fakamaua fakavale se tupu o lau paaga, mo se tupu o lau nea gaoi, ti kua ke kaia fakamakeke lou oloi, kae ko au, kua ke galoi au, e pati le Aliki, le Eteleno.

Esekiele 23:35

Koia e folafola ai le Aliki, le Eteleno, o pati : O tupu na ke galoi au, O tupu na ke tiaki au ki ou muli, Koia e ke amo ai loa le tua o au aga fakalialia mo au faiaga.

Oseo 11:2

Kae na lotou fakamamao ia latou ala na kalagai ia latou ; Na lotou fai ni sakilifisio kia Paale, Ti na lotou momoli se iseso ki taulaatua.

Oseo 13:1

Ka masau Efalaimi, ko se nea fakaii ai. Na malaga a ia ki aluga i Iselaele. Kae na agasala a ia ia Paale, ti na mate a ia.

Oseo 13:6

Na lotou kai makona i ni faisaga sesega ; Na lotou kai makona, ti na makita loa olatou loto i le fia nealasi ; Koia na lotou galoi ai au.

Oseo 2:5

Talie ka leai, e kau fakatelefua loa a ia, ti e kau tuku loa a ia pe le aso leia na fanaui ai a ia, ti e kau fakaliliu loa a ia o tatau mo se toafa, mo se kele kaka, ti e kau tuku loa a ia ke mate i le fia inu.

Oseo 2:7

Talie na faiaga lolatou tinana, ti ko leia na fakatupu ia latou na fai nea fakalumaluma, o pati : E kau ano loa ki aku feauaki, latou ala na soli ia mai kiate au laku pane, mo laku vai, mo laku fului manu, mo le kie tea, mo le lolo, ti mo laku vino.

Oseo 4:13

Kua lotou fai ni failaulau i tumutumu o mauga, Kua lotou tutu le iseso i aluga o mauga liliki, I lalo o laakau lalasi, mo sene, mo popelie, mo telepate, Ala e malie olatou malu. Koia leia e faifeauaki ai okoutou taineliki, Ti e tono tagata okoutou fugao.

Oseo 4:6

Kua maumau loku kakai, talie e puli iate ia loku iloa. O tupu na ke tiaki loku iloa, E kau tiaki loa a koe, ti e too loa iate koe laku tuulaga fakapelepitelo ; O tupu na ke galoi le lao o lou Atua, E kau galoi loa au fanau.

Oseo 8:14

Talie kua galoi e Iselaele leia na fakatupu ia a ia, Ti na fakatuu e ia ni fale sau, Ti na liuliuga e Suta a kolo tau ; Kae e kau kakau loa le afi ki olatou kolo, Ti e tutu loa e ia olatou fale sau.

Oseo 9:7

Kua lotou soko mai, a aso o le tautea, Kua lotou kaku mai, a aso o le totogi o gaoi : E tonu ke iloa a ia e Iselaele ! Kua valea le polofeta, kua ulu vale le tagata tio malama ! O tupu ko le lasi o au agaveli mo au agatuu.

Amosi 8:10

E kau fetogi loa okoutou aso lafeti ki ni aso mamae, Ti mo akoutou sua fakafiafia ki ni tagi laulau, E kau fakasulu loa ki vakavaka fuli ni taga, Ti e kau fakatula loa a ulu fuli ; E kau tuku loa le fenua ke tagi mamae ofaipe ki se vosa fuatasi, Ti e fai loa lona fakaoki pe se aso kona.

Tetelonome 32:18

Io, Iselaele, na ke tiaki loa le Utu leia na fakatupu ia a koe, Ti na ke galoi loa le Atua leia na fanaui ia a koe.

Tetelonome 6:12

Ka ke kai loa lau nea kai o ke makona, ke ke tokaga ai na galo le Eteleno, leia na fakamavae ia a koe mei le fenua o Esipito, leia na ke popula ai.

Tuifakamaau 10:6

Na toe fai loa e fanau a Iselaele le nea leia na veli ki mata o le Eteleno : Na lotou tausi loa Paale mo Asetalate, ko atua o Silia, mo atua o Sitone, mo atua o Moape, mo atua o Amone, ti mo atua o le kau Filisitini. Na lotou tiaki loa le Eteleno ti na leaise lotou toe tausi loa kiate ia.

Tuifakamaau 3:7

Na agaveli loa fanau a Iselaele ki le Eteleno, ti na lotou galoi ia loa le Eteleno, lolatou Atua, kae na lotou atolasio loa kia Paale mo Akelase.

Uluaki tosi a Samuele 12:9

Kae na lotou galoi loa le Eteleno, lolatou Atua ; ti na tuku loa e ia latou ki lima o Sisela, pule solia o Atesoa, mo lima o le kau Filisitini, mo lima o le sau o Moape, ala na tau loa kia latou.