Lua tosi o Sau 24:2 - Tosi Tapu

² Koia na kakau ai loa e le Eteleno kia Sosakimi ni fa solia Kaletea, mo ni fa solia Silia, mo ni fa solia Moape, mo ni fa solia o vosa o Amone, ke au o taui Sosakimi ; na kakau mai latou e le Eteleno ke au o maumaui a Suta, o mulimuli ki le folafola leia na fakasa e le Eteleno i ana tagata fakasausau le kau polofeta.

Lua tosi o Sau 24:2 ပူးပေါင်းရင်းမြစ်များ

Lua tosi o Sau 20:17

Ko leinei, e soko mai loa le temi leia e ave ai loa ki Papilone a nea fuli ala e tuku i lou fale, ti mo nea ala na tanaki e ou tamana o kaku mai ki le aso nei ; e folafola le Eteleno : E leaise toe loa se nea fua e tasi.

Lua tosi o Sau 22:16

Ko leinei le folafola a le Eteleno : E kau aumai loa le malaia ki le ganea leinei mo lona kakai, o mulimuli ki folafola fuli o le tosi leia na lau e le sau o Suta.

Lua tosi o Sau 23:27

Ti na pati loa le Eteleno : E kau toe sau foki mo Suta mei oku mua ofaipe laku sau Iselaele, ti e kau tiaki loa le kolo leinei ko Selusalemi leia na kau filifili, ti mo le fale leia na kau pati ki ai : E kau agai loa i ai.

Lua tosi o Sau 6:23

Na kakau loa e le sau o Iselaele ke fai kia latou se kai lasi, ti na lotou kai loa mo inu ; ti na tuku loa latou e le sau ke ano, ti na lotou toe liliu loa ki lolatou pule. Ti na leaise toe au loa a solia a le kau Silia ki le kele o Iselaele.

Lua tosi o Koloniko 33:11

Koia na kakau ai loa e le Eteleno kia latou a pule solia a le sau o Asilia, ala na too ia loa Manase o tuku ki ukamea, o fakapiki ni ukamea ki lona gutu mo saisai a ia ki ni tini o ave ki Papilone.

Sopo 1:17

Koi lolotoga masau a ia, kae kaku mai se tasi ake tagata avelogo, o pati : Ko se kau Kaletea, na vaega tolu, na osoi ia a kamelo o ave, kae lotou tamate ki le seleta a tagata fakasausau. Ti na kau sao, au toka tasi, o aumai le logo kiate koe.

Esaia 13:5

Kua lotou au mei se fenua mamao, Mei potupotu o le lagi : Ko le Eteleno mo nea gaoi o lona sausau ka maumau ia loa le fenua katoa.

Esaia 28:19

I temi fuli e mapaa ai loa a ia, e kukumi loa e ia koutou ; Talie e natu loa a ia i usu fuli, i le ao mo le pouli ; Ti ko le logo fai ki lona gugulu e fakatupu ia le i lasi.

Esaia 7:17

E kakau mai loa e le Eteleno kiate koe, Mo lou kakai ti mo le fale o lou tamana, Ni aso ala e leikiaise maua ni ona tatau, Talu mei le mavae a Efalaimi ia Suta, (Le sau o Asilia).

Selemia 12:9

Na fai loku tofiga kiate au pe se manu lele kaikai, pe se lupo ; Koia e au ai loa a manu lele fekai fuli kiate ia mei potu fuli. Kotou ano, kotou tanaki mai a manu fuli o le vao, Kotou aumai latou, o tupu ke lotou kai a ia !

Selemia 25:1

Na tuku loa le folafola kia Selemia ki le kakai katoa o Suta, i le fetuu fa o Sosakimi, sau o Suta, vosa o Sosiasi, - ko le uluaki fetuu a ia o Nepukatenesale, sau o Papilone, -

Selemia 25:9

E kau kakau loa ke ano o afa mai a atu puleaga fuli o le potu noleto, e pati le Eteleno, ti e kau kakau loa ke au laku tagata fakasausau ko Nepukatenesale, sau o Papilone : E kau kakau mai loa a ia ke au o taui le fenua leinei mo lona kakai, mo puleaga fuli i ona tafatafa, o tupu ke maumaui fuli latou, ti ke fakaliliu le fenua leinei ko se kele maumau, leia ka kata loa ki ai mo mapu loa ki ai i lona fakaii.

Selemia 26:20

Na i ai foki se tagata leia na kikite i le suafa o le Eteleno, ko Uli, vosa o Semaesa, mei Kiliate-Sealimi. Na kikite loa a ia ki le kolo leinei mo le fenua leinei o tatau oki mo le nea leia na fakasa e Selemia.

Selemia 26:6

Ti e kau tautea loa le fale leinei ofaipe Silo, ti e kau fakaliliu loa le kolo leinei ko se nea fakatupu malaia ki puleaga fuli o le kele.

Selemia 32:28

Koia e folafola ai le Eteleno, o pati : Ko leinei, e kau tuku le kolo leinei ki lima o le kau Kaletea, Ti mo lima o Nepukatenesale, sau o Papilone, Ti e too loa e ia a ia.

Selemia 35:11

I le temi leia na pale mai ai Nepukatenesale, sau o Papilone, o taui le fenua leinei, na motou pati : Tou ano, tou mavae o ano ki Selusalemi, o mamao mei le solia a le kau Kaletea, mo le solia a le kau Silia. Ko le tupuaga lena o lomatou nonofo i Selusalemi nei.

Selemia 52:28

Ko leinei le kakai leia na ave popula e Nepukatenesale : I le fetuu fitu, ko se kau Sutea e tino afe e tolu tino lua tupu tolu ;

Tagi laulau a Selemia 1:17

Na folasi e Sione ona lima, Kae na leaise fakapelepele a ia e se tasi ; Na kakau e le Eteleno kia Sakopo a fili i ona tafatafa ; Na fai Selusalemi pe se nea fakalialia i loto malie o latou.

Esekiele 19:8

Na fakatasi loa a atu puleaga i ona tafatafa o tau kiate ia. Na lotou folasi loa lolatou kupega kiate ia, Ti na maua loa a ia i lolatou popoko.

Esekiele 23:23

A fanau o Papilone ti mo le kau Kaletea fuli, A kakai o Pikoti, mo Soa, mo Koa, Mo fanau fuli o Asilia, Ala tupulaga mo tauleleka, Ala e kovana mo pule tau fuli, Ala ko ni pule lalasi mo logologona, Ala ko ni tagata ekeosi fuli.

Mikea 3:12

Koia leia, o tupu ko koutou, E kenu ai loa Sione ofaipe se faisaga, E liliu ai loa Selusalemi ko se tuuga fatu, Ti mo le mauga o le fale tapu ko se tumutumu apele i le vao.

Apakuki 1:6

Ko leinei, e kau lagai loa le kau Kaletea, Se kakai itaita mo makeke, Leia e saele i ni fenua lalasi o too ni nofoaga o ni iki.