Lua tosi o Sau 21:3 - Tosi Tapu

³ Na toe fakatuu loa e ia a ganea taualuga, ala na maumaui e Esekiasi, lona tamana ; na fakatuu loa e ia ni aletale kia Paale, ti na fai loa e ia se fakatata o Asetalate, ofaipe le fai e Akapo, sau o Iselaele, ti na atolasio loa a ia ki le kau tau katoa o le lagi mo tausi ki ai.

Lua tosi o Sau 21:3 ပူးပေါင်းရင်းမြစ်များ

Uluaki tosi o Sau 18:21

Ti na fakafeofi ake loa Elia ki le kakai katoa, o pati : E kaku loa ki afea lakotou loto vaelua ? Kapau e Atua le Eteleno, kotou mulimuli iate ia ; ti kapau ko Paale, kotou mulimuli iate ia ! Na fakalologo loa le kakai.

Uluaki tosi o Sau 18:26

Na lotou too loa le pipi tagata leia na soli loa kia latou, o lotou teuteui loa a ia ; ti na lotou kalaga loa ki le igoa o Paale, mei le usu o kaku ki le lalatea, o pati : Paale, tali mai kia matou ! Kae na leaise logo loa ki se leo, pe tali mai loa se tasi. Ti na lotou soposopo loa i mua o le aletale leia na lotou fai.

Lua tosi o Sau 13:6

Kae na leaise lotou tiaki loa a agasala o le fale o Selopoamo, leia na fakaagasalai ia Iselaele ; ti na lotou toe muli loa i ai ; ti na tuu foki le fakatata o Asetalate i Samalia.

Lua tosi o Sau 17:16

Na lotou tiaki loa a fakatotonu fuli a le Eteleno, lolatou Atua, ti na lotou fai loa kia latou ni pipi e lua ki le ukamea na saka, ti na lotou fau loa ni fakatata o Asetalate, ti na lotou atolasio loa ki le kau tau katoa o le lagi, ti na lotou tausi loa kia Paale.

Lua tosi o Sau 18:22

E lagi kotou pati mai loa : Ko le Eteleno, lomatou Atua, leia e motou fanaki ki ai. Pe leaise ko ia leia na fakapuli e Esekiasi ona ganea taualuga mo ona aletale, o pati ki Suta mo Selusalemi : E kotou punou loa i mua o le aletale leinei i Selusalemi ?

Lua tosi o Sau 18:4

Na fakapuli loa e ia a ganea taualuga, ti na maumaui loa e ia a fakatata, ti na sele loa e ia ki lalo a pou tapu, ti na momoi loa e ia le gata sila leia na fai e Moisese, o tupu na tutu e fanau o Iselaele ni nea fakamanogi i ona mua o kaku mai ki le aso lena.

Lua tosi o Sau 8:18

Na saele loa a ia i le ala o sau o Iselaele, ofaipe le fale o Akapo, talie na avaga a ia mo se taine o Akapo, ti na fai loa e ia le nea leia e veli ki mata o le Eteleno.

Lua tosi o Sau 8:27

Na saele loa Akasia i le ala o le fale o Akapo, ti na fai loa e ia le nea leia e veli ki mata o le Eteleno ofaipe le fale o Akapo, talie na avaga a ia ki le fale o Akapo.

Lua tosi o Koloniko 32:12

Pe leaise ko ia, Esekiasi, leia na fakapuli ia a ganea taualuga mo aletale o le Eteleno, ti na tuku ia le fakatotonu ki Suta mo Selusalemi : Ke kotou punou loa i mua o le aletale e tasi, ti ke kotou momoli loa i ai a nea fakamanogi ?

Lua tosi o Koloniko 34:3

I le fetuu valu o lana sau, koi muli foki a ia, na kamata afa loa e ia le Atua o Tavite, lona tamana ; i le fetuu kau agafulu tupu lua o lana sau, na kamata fakamea loa e ia a Suta mo Selusalemi mei ganea tapu, mo taulaatua, mo fakatata laakau, ti mo fakatata ukamea.

Sopo 31:26

Kapau na kau tio ki le laa i lona gigila, Ti mo le masina i lona sopo ake i lona fulumalie katoa,

Esaia 65:11

Kae ko koutou, ala e tiaki ia le Eteleno, Ala e galoi ia loku mauga tapu, Ala e fakatuu ia se aletale kia Kate, Ti e fakaapele ia se ipu kia Meni,

Selemia 7:30

Talie na fai e fanau a Suta le nea leia e veli ki oku mata, E pati le Eteleno ; Na lotou fakatuu alatou nea fakalialia i le fale leia e fetapa ai ki loku suafa, O tupu ke fakakelekelei ai latou.

Mikea 6:16

E tausi a agai fenua a Omeli Ti mo aga fuli o le fale o Akapo, Ti e kotou saele i alatou tokoi ; Koia leia e kau tuku ai loa a koe ki le maumau, Ti e kau fakaliliu loa lou kakai ko se nea fakakata, Ti e ke amo loa le luma o loku kakai.

Tetelonome 16:21

Ke aua na ke fakatuu loa se taulaatua i tafa o le aletale leia e ke fakatuu ia loa ki le Eteleno, lou Atua.

Tetelonome 17:2

E feala loa i se aso ke maua i se kolo o kolo ala e soli atu loa kiate koe e le Eteleno, lou Atua, se tagata pe ko se fafine leia e fai ia loa se nea veli ki mata o le Eteleno, lou Atua, o maumaui loa lana fakapapau ;

Tetelonome 17:3

talie na ano loa a ia, o tausi ki ni iki ake atua kese ti mo atolasio kia latou, pe ko le laa, pe ko le masina, pe ko le fuatau katoa o le lagi. E leaise ko le nea lena na kau fakatotonu.

Tetelonome 20:18

o tupu ke aua na lotou ako ia loa kia koutou ke fakatautau o nea fakalialia fuli ala e lotou fai ki olatou atua, ti ke aua na kotou agasala ai loa ki le Eteleno, lokotou Atua.

Tetelonome 4:19

Ke ke tokaga ai ki lou laumalie, ke aua na ke siki ake ou mata ki le lagi o tio ki le laa, mo le masina, mo fetuu, mo nea fuli o le lagi, ti ke siga loa ki le agasala, o atolasio kia latou ti mo tausi kia latou : kua tuku latou e le Eteleno lou Atua ki atu puleaga fuli o le malama nei katoa ;