Lua tosi o Sau 18:3 - Tosi Tapu

³ Na fai loa e ia le nea leia e malie ki mata o le Eteleno, ofaipe le fai katoa a Tavite, lona tamana.

Lua tosi o Sau 18:3 ပူးပေါင်းရင်းမြစ်များ

Uluaki tosi o Sau 11:38

Kapau e ke fakalogo ki nea fuli ala e kau fakatotonu loa kiate koe, kapau e ke saele i oku ala, ti kapau e ke fai le nea leia e totonu i oku mua, o tausi aku lao mo aku fakatotonu, ofaipe lona fai e Tavite, laku tagata fakasausau, e kau nofo loa mo koe, ti e kau fakamakeke loa lou sakoga ofaipe laku fakamakeke le sakoga o Tavite, ti e kau soli loa kiate koe Iselaele.

Uluaki tosi o Sau 11:4

I le temi matua o Salomone, na fakatafoki loa e ona avaga lona loto ki ni iki ake atua ; ti na leaise katoa loa lona loto ki le Eteleno, lona Atua, ofaipe le loto o Tavite, lona tamana.

Uluaki tosi o Sau 15:11

Na fai loa e Asa le nea leia e totonu ki mata o le Eteleno, ofaipe Tavite, lona tamana.

Uluaki tosi o Sau 15:5

Talie na fai e Tavite le nea leia e totonu i mua o le Eteleno, ti na leaise mafuli kese a ia mei se fakatotonu e tasi a le Eteleno i lona mauli katoa, gato fai ki le faiganea o Uli, le tagata Eti.

Uluaki tosi o Sau 3:14

Ti kapau e ke saele i oku ala, o mulimuli ki aku lao mo aku fakatotonu, ofaipe Tavite, lou tamana, e kau fakatologa loa lou mauli.

Lua tosi o Sau 12:3

Kae na leaise puli loa a ganea taualuga ; na soko atu e le kakai lalatou momoli ni sakilifisio mo ni nea fakamanogi i ganea ana.

Lua tosi o Sau 14:3

Na fai loa e Amatesia le nea leia na totonu ki mata o le Eteleno, kae na leaise tatau mo Tavite, lona tamana ; na fai katoa loa e ia a nea ala na fai e Soasi, lona tamana.

Lua tosi o Sau 20:3

Ei Eteleno ! Ke ke manatui na kau saele i ou mua i le maokioki mo le agatonu, ti na kau fai le nea leia e malie ki ou mata ! Ti na tagi mamae loa Esekiasi.

Lua tosi o Sau 22:2

Na fai loa e Sosiasi le nea leia e malie ki le Eteleno, ti na saele loa a ia i le ala katoa o Tavite, lona tamana ; na leaise toe se loa a ia ki tafa.

Lua tosi o Koloniko 29:2

Na fai loa e Esekiasi le nea leia e totonu ki mata o le Eteleno, o mulimuli ki le nea katoa leia na fai e Tavite, lona tamana.

Sopo 33:27

E sua loa a ia o fakasa ki tagata fuli : Na kau agasala, na kau maumaui le lao, kae na leaise fakatua au o mulimuli ki laku agaveli ;

Pesalemo 119:128

Koia e kau pati ai e totonu au fakatotonu fuli ; Ti e kau vesia ai ki ala fuli o le loi.

Ekesote 15:26

Na pati loa a ia : Kapau e ke tokaga malie ki le leo o le Eteleno lou Atua, kapau e ke fai le nea leia e totonu ki ona mata, kapau e fakalogo lou taliga ki ana fakatotonu, kapau e ke tausi ana lao fuli, ti e leaise kau tautea loa a koe ki se masaki i masaki ala na kau tautea ki ai le kau Esipito ; talie ko au ko le Eteleno leia e fakamauli ia a koe.

Esaia 38:3

Ei Eteleno ! ke ke manatui na kau saele i ou mua i le agatonu mo le loto saosaoa, ti na kau fai le nea leia e malie ki ou mata ! Ti na tagi loa Esekiasi i le lasi o lona mamae.

Loma 7:12

Koia e maokioki ai le lao, ti e maokioki le fakatotonu, mo totonu, ti mo malie.

Efeso 6:1

Fanau, kotou fakalogo ki okoutou matua i le Aliki, talie e totonu le nea lena.

Tetelonome 10:12

I le aso nei, Iselaele, kolea le nea leia e kole atu kiate koe e le Eteleno, lou Atua ? Ke ke i ki le Eteleno, lou Atua, o saele i ona ala fuli, o alofa mo tausi ki le Eteleno, lou Atua, i lou loto katoa mo lou laumalie katoa.

Tetelonome 6:18

Ke ke fai loa le nea leia e totonu mo le nea leia e malie ki mata o le Eteleno, o tupu ke ke manuia loa, ti mo ke ulu loa o maua tofiga le fenua malie leia na fakapapau e le Eteleno ki ou tamana ke soli atu kiate koe,