Esaia 51:11 - Tosi Tapu

¹¹ Koia e toe liliu loa le kau totogi a le Eteleno, E lotou ano loa ki Sione mo ni sua o le malo, Ti e lotou pala loa olatou ulu ki se fiafia lee gato ; E fakafeofi ake loa le nekenekea mo le fiafia, Kae sosola loa le mamae mo le tagi.

Esaia 51:11 ပူးပေါင်းရင်းမြစ်များ

Pesalemo 126:2

Koia na apele ai lomatou gutu i ni kalaga fakafiafia, Ti mo lomatou alelo i ni sua fakanekenekea ; Koia na pati ai i atu puleaga : Kua fai e le Eteleno kia latou ni nea lalasi !

Pesalemo 126:5

Ko latou ala e muluki ia le fakaili mo ni loimata E tuuti ia loa le fulumeto mo ni sua fakanekenekea.

Esaia 11:15

E fakamalo loa e le Eteleno le alelo o le tai o Esipito, Ti e siki loa e ia lona lima ki le vaitafe o Eufalate, o pupusi fakamakeke ki ai : E vaei loa e ia a ia i ni magai vai e fitu, Ti e fakalaka loa i ai i ni taka.

Esaia 25:8

E folo loa e ia le mate o talu oki ; Ti e solosolo loa e le Aliki, le Eteleno, a loimata i mata fuli ; Ti e fakapuli loa e ia i le fenua katoa le luma o lona kakai ; Talie kua masau le Eteleno.

Esaia 35:10

Ko latou ala na totogi e le Eteleno e toe liliu loa, E lotou ano loa ki Sione mo ni sua o le malo, Ti e fakapala loa olatou ulu ki se fiafia lee gato ; E fakafeofi loa kia latou le fiafia mo le nekenekea, Kae e sosola loa le mamae mo tagi.

Esaia 44:23

Atu lagi, kotou fakafiafia ! talie kua gaoi le Eteleno ! Potu loloto o le kele, kotou kalaga fakanekenekea ! Mauga lalasi, kotou fai ni kalaga fakafiafia ! Mo koutou foki, vaomatua ti mo okoutou laakau fuli ! Talie kua toe totogi e le Eteleno a Sakopo, Kua fakasa e ia lona kololia i Iselaele.

Esaia 48:20

Kotou mavae i Papilone, kotou sosola i loto malie o le kau Kaletea ! Kotou fakasa i ni kalaga fakafiafia le logo malie leinei, Kotou fakasa a ia o kaku ki le potupotu o le malama nei, Kotou pati : Kua toe totogi e le Eteleno lana tagata fakasausau ko Sakopo !

Esaia 49:13

Atu lagi, kotou fakafiafia ! Kele, kotou nekenekea ! Atu mauga, kotou kalaga fakafiafia ! Talie e fakapelepele e le Eteleno lona kakai, Ti kua alofa a ia ki lona kakai na mamae.

Esaia 55:12

Io, e kotou mavae loa i le fiafia, Ti e takitaki loa koutou i le tokamalie ; E fakamapaa loa e mauga lalasi mo mauga liliki ni sua fakafiafia i okoutou mua, Ti e pasipasi loa a lima o laakau fuli o le vao.

Esaia 61:7

Talie e fetogi loa lokoutou luma ki se vaega liuga lua ; E fetogi loa lokoutou mamae ki se fiafia i lokotou vaega ; Io, e kotou maua loa se vaega liuga lua i lokoutou fenua, Ti e lee gato loa lokoutou fiafia.

Esaia 65:14

Ko leinei, e sua loa aku tagata fakasausau i le fiafia o olatou loto ; Kae e kotou tagi loa i le mamae o lokoutou laumalie, Ti e kotou tagi laulau loa i le mamae okoutou loto.

Esaia 65:19

E kau fai loa ki Selusalemi loku nekenekeaaga, Ti ki loku kakai ko loku fiafiaaga ; E leaise toe logo loa i ai Ki le logoa o ni tagi ti mo le logoa o kalaga.

Selemia 31:13

Ti e mako fiafia loa taineliki, E toe fiafia foki a kau tupulaga mo kau matua ; E kau fetogi loa lolatou mamae ki le nekenekea ti e kau fakapelepele loa latou ; E kau soli loa kia latou le fiafia i le oki o mamae.

Selemia 33:11

Ki kalaga fakafiafia mo kalaga nekenekea, Ki sua a le tama feauaki ti mo sua a le taine feauaki, Ki le leo o latou ala e pati : Kotou fakafetai ki le Eteleno o kau tau, Talie e agamalie le Eteleno, talie e lee gato lona manava alofa ! Ki le leo o latou ala e momoli ia ni sakilifisio fakafetai I le fale o le Eteleno. Talie e kau toe aumai loa le kau popula o le fenua, E kau toe fakanofo loa latou ofaipe le temi mua, E pati le Eteleno.

Lua tosi ki le kau Tesalonika 2:16

Ko lotatou Aliki ko Sesu-Kilisito totonu, ti mo le Atua ko lotatou Tamana, leia na alofa kia tatou, ti na soli ia kia tatou i lona kalasia se fakapelepele lee gato ti mo se amanaki malie,

Suta 1:24

Ki leia e mafai ke taupau ia koutou mei sigaaga fuli ti mo fakasa ia koutou, i mua o lona kololia, lee mele mo apele i le fiafia,

Apokalipisi 21:1

Ti na oki a ia, na kau tio loa ki se lagi foou mo se kele foou ; talie kua puli loa le uluaki lagi mo le uluaki kele, ti kua puli foki le tai.

Apokalipisi 21:4

E solosoloi loa e ia a loimata fuli mei olatou mata, ti e leaise toe maua loa le mate : e leaise toe maua loa se tagi, mo se lauga, mo se mamae, talie kua puli loa a uluaki nea.

Apokalipisi 22:3

E leaise toe maua loa i ai se tasi leia e malaia : talie e tuu loa i le loto kolo le ekeekeaga fakasau o le Atua ti mo le Akeno ; ti e tausi loa kiate ia ana tagata fakasausau :

Apokalipisi 7:17

Talie ko le Akeno leia e nofo i loto malie o le ekeekeaga fakasau e fagai ia loa latou ti mo taki ia loa latou ki matapuna o le vai mauli, ti e solosoloi loa e le Atua a loimata fuli i olatou mata.