Esaia 45:14 - Tosi Tapu

¹⁴ Ko leinei le folafola a le Eteleno : Ko fua o gaoi a Esipito ti mo koloa o Etiopia, Ti mo koloa o le kakai o Sapa ala ko ni tagata lalasi, E aumai loa kiate koe, ti e ke maua loa latou ; E saele loa a kakai ana i ou muli, E lotou saele loa mo ni tini, E lotou punou loa i ou mua, o kolekole atu kiate koe : Ko le maoki e nofo le Atua iate koe toka tasi, E leaise tasi ake Atua i se tasi ake ganea.

Esaia 45:14 ပူးပေါင်းရင်းမြစ်များ

Senesi 27:29

Ke fakalogo ni kakai kiate koe, Ti ke punou ni puleaga i ou mua ! Ke ke pule ki ou fetaina, Ti ke punou a vosa o lou tinana i ou mua ! Ke malaia leia e tutuku ia a koe, Ti ke tapuakina leia e tapuaki loa kiate koe.

Lua tosi a Samuele 21:20

Na toe fai foki se tasi ake a tau i Kate. Na kau loa i ai se tagata taualuga, leia na maikao ono ona lima taki tasi mo ona vae taki tasi, ti na au foki a ia mei Lafa.

Esitele 8:17

I le fenua taki tasi, mo le kolo taki tasi, ti mo ganea fuli ala na kaku ki ai le fakatotonu a le sau, na maua loa e le kau Sutea se fiafia lasi mo se nekenekea, ni kaitasi mo ni fakafiafia. Ti na liliu loa o Sutea se toka api i la ake kakai, talie na vilo loa kia latou le i ki le kau Sutea.

Sopo 1:15

ti na oso mai loa ni tagata Sapesi, o ave latou, kae na lotou tamate loa ki le seleta a tagata fakasausau. Ti ko au fai toka tasi na sola, ke aumai kiate koe le logo.

Sopo 11:19

E ke moe loa kae e leaise toe fakamamae a koe e se tasi, Ti e amoamo loa ou mata e se toka api.

Pesalemo 149:6

Ke nofo i olatou gutu a fakafetai o le Atua, Ti mo le seleta mata lua i olatou lima,

Pesalemo 149:8

Ke sai olatou sau ki ni tini, Ti mo olatou kau lalasi ki ni ukamea,

Ekesote 11:8

Ti e ifo mai loa au tagata fakasausau fuli anei kiate au, ti e lotou punou loa ki le kele i oku mua, o pati : Mavae, a koe mo le kakai katoa leia e muli iate koe ! Ka oki loa le nea lena, e kau mavae loa. Ti na mavae loa Moisese mei le fale o Falaone i se ita lasi ai.

Esaia 10:33

Ko leinei, ko le Aliki, le Eteleno o kau tau, E fatifatii ia a laa o laakau i se makeke lasi : Kua tuuti a laa lalasi, Kua tuku ki lalo a laa taualuga.

Esaia 18:1

A koe, ko le fenua leia e fetati ai a masafu, I leia atu fetuu o vaitafe o Etiopia !

Esaia 18:7

I le temi lena, e aumai loa ni moliga ki le Eteleno o kau tau, E le kakai makeke mo tagata lalasi, E le kakai fakaii talu mei lona tupu, E le puleaga makeke leia na takatakafi ia a nea fuli, E le fenua leia e tafe ai a vaitafe. E aumai loa latou ki le ganea leia e agai ai le suafa o le Eteleno o kau tau, Ki le mauga o Sione.

Esaia 19:21

Ti e iloa loa le Eteleno e le kau Esipito, Ti e iloa loa le kau Esipito e le Eteleno i le aso lena ; E lotou fai loa ni sakilifisio mo ni moliga, Ti e lotou fai loa ni fakapapau ki le Eteleno ti e lotou fakasoko loa latou.

Esaia 19:22

Koia e taai ai loa e le Eteleno le kau Esipito ; E taai loa e ia latou, kae e toe fakamauli loa e ia latou ; Ti e lotou tafoki loa ki le Eteleno, Leia e tali ia loa alatou kole ti e fakamauli ia loa latou.

Esaia 23:18

Kae e fakatapu loa ona koloa mo lona totogi kelekele ki le Eteleno. E leaise toe tanaki loa latou, pe taupau loa latou ke tologa, Talie e fakaaoga loa lona totogi kia latou ala e nonofo i mua o le Eteleno Ke totogi ai ni nea kai malilie ti mo ni kofu fulumalilie.

Esaia 43:3

Talie ko au ko le Eteleno, lou Atua, Le Sagato o Iselaele, ko lou Fakamauli ; E kau soli Esipito ko lou totogi, Etiopia mo Sapa ko lou fetogi.

Esaia 44:8

Aua na kotou i, ti aua na kotou lulu ; Pe na leaise kau fakasa atu a nea fuli ana talu mei mamao kiate koe ? Ko aku tagata fakamaoki koutou : Pe i ai se tasi ake Atua iate au ? E leaise tasi ake a utu, e leaise kau iloa se tasi ake.

Esaia 45:24

E lotou pati mai loa kiate au : Ko le Eteleno toka tasi leia e maua ai le faitotonu mo le makeke ; Ko latou fuli ala na itaita kiate ia E toe liliu mai loa kiate ia i le luma.

Esaia 49:23

E liliu loa ni sau ko ou tagata taupau toe, ti e liliu loa olatou fafine aliki ko au fafine taupau toe ; E lotou punou loa o kaku ki le kele i ou mua, Ti e lotou epo loa le efu i ou vae, Ti e ke iloa loa ko au ko le Eteleno, Ti ko latou ala e tuku ia lalatou amanaki malie kiate au e leaise luma loa.

Esaia 54:3

Talie e ke mafolafola loa ki le fetuu atamai mo le fetuu sema ; E maua loa e lou sakoga ni puleaga, Ti e fakakakai ia loa ni kolo lavaki.

Esaia 55:5

Ko leinei, e ke kalagai loa ni puleaga ala e leaise ke iloa, Ti e feoso mai loa kiate koe ni puleaga ala e leaise iloa ia a koe, O tupu ko le Eteleno lou Atua, O tupu ko le Sagato o Iselaele leia e fakakololia ia a koe.

Esaia 60:3

E saele ni puleaga i lou malama, Ti mo ni sau i le gigila o lou kololia.

Esaia 61:9

E iloa loa lolatou lanu i atu puleaga, Ti e logo loa lolatou sakoga i lotolotoga o kakai ; Ti ko latou fuli ala e tio loa kia latou e fakamaoki loa Ko latou ko se lanu tapuakina e le Eteleno.

Selemia 16:19

Eteleno, ko koe ko loku makeke, ko loku fanakiaga, ko loku mumuniaga i le aso o le mamae ! E au loa kiate koe a atu puleaga mei potupotu o le kele, Ti e lotou pati loa : Ko loi ata a lotu o omatou tamana, E leaise uiga fua ti e leaise aoga fua a taulaatua.

Esekiele 23:42

Na logo ki ni kalaga a se kakai toka api leia na fakafiafia mo ia ; Ti na maua i le kakai toka api lena ni tagata mei le toafa o Sape, Ala na velo ia ni matemate ki lima o le tautaina, Ti mo ni pala fulumalilie ki ola ulu.

Esekiele 31:3

Ko leinei, ko Asilia ko se sete lasi o Lipane ; Na fulumalilie ona laa, Na matotolu ona lau, ti na taualuga a ia, Ti na fakalaka lona tumutumu i laakau fuli.

Soele 3:8

E kau fakatau loa okoutou vosa mo okoutou taineliki ki fanau o Suta ; Ti e lotou toe fakatau loa latou ki le kau Sapea, puleaga mamao. Talie kua masau le Eteleno.

Numelo 13:32

Ti na lotou kamata lauveli loa ki le fenua leia na lotou ano o tioi. Na lotou pati loa : Ko le fenua leia na matou taka ai, o tioi, ko se fenua leia e tamate ia latou ala e nonofo i ai ; e tagata lalasi fuli le kakai katoa leia na motou tio ki ai.

Uluaki tosi ki le kau Kolinto 14:25

ti e fakasa loa a manatu fakapulipuli o lona loto ; ti e fakamapee loa a ia ki le kele, o atolasio ki le Atua, mo fakasa e nofo maoki ai le Atua ia koutou.

Uluaki tosi ki le kau Tesalonika 1:9

Talie e fakamatala, o uiga mo matou, pe na feaki lakotou tali matou ti mo lakotou tafoki ki le Atua, o tiaki a taulaatua, kae ke tausi le Atua mauli mo maoki,

Apokalipisi 3:9

Tio, e kau soli kiate koe ni iki o le sinakoka o Satana, ala e pati ko le kau Sutea, kae e leai, e lotou loi ; tio, e kau fakamakeke loa latou ke lotou au o punou i ou vae, ti ke lotou iloa kua kau alofa kiate koe.