Esaia 36:6 - Tosi Tapu

⁶ Ko leinei, na ke tuku lau fanaki ki Esipito, na ke too ia le fa u fati lena ke tokoi atu kiate koe, leia e puui ia le lima o leia e fanaki ki ai : Ko lena le anoaga o Falaone, sau o Esipito, kia latou fuli ala e fanaki kiate ia.

Esaia 36:6 ပူးပေါင်းရင်းမြစ်များ

Lua tosi o Sau 17:4

Kae na iloa loa e le sau o Asilia se agatuu kiate ia i le fale o Ose, ti na kakau loa e ia ni tagata avelogo ki le sau o Esipito ko So, leia na leaise koi soli ia le tukusau i le fetuu ki le sau o Asilia. Na sai loa e le sau o Asilia a Ose ki ni tini, o tuku ki le pilisoni.

Lua tosi o Sau 18:21

Ko leinei, na ke tuku lau fanaki ki Esipito, na ke too ke tokoi atu kiate koe le fa u fati lena, leia e puui ia le lima o se tasi fua e fanaki ki ai : Ko le anoaga lena o Falaone, sau o Esipito, kia latou fuli ala e fanaki kiate ia.

Pesalemo 146:3

Aua na kotou fanaki ki le kau lalasi, Ki vosa o le tagata, ala e leaise mafai ke fakamauli ia.

Taagapati 25:19

Ofaipe se nifo leia kua fati ti mo se vae leia e kito, E fenaaki le fanaki ki se tagata veli i le aso o le malaia.

Esaia 31:1

Malaia kia latou ala e ifo ki Esipito o afa se tokoi i ai, Latou ala e fanaki ki ni osi, Ti e tui ki le lasi o saliote mo le makeke o le kau solia ekeosi, Kae e leaise lotou tio ki le Sagato o Iselaele, Ti e leaise lotou afa le Eteleno !

Esaia 31:3

Ko le tagata Esipito e tagata, kae e leaise Atua ; E kanofi ana osi kae e leaise laumalie. Ka falo loa e le Eteleno lona lima, E siga loa leia e tokoi, Ti e vilo loa ki lalo leia e fai ki ai le tokoi, Ti e la mamate loa toka lua.

Esekiele 17:17

Ti e leaise ano loa Falaone mo se solia lasi ti mo se kakai toka api o saofaki a ia i le tau, mo ka laga loa ni palepale tau ti mo kenu loa ni popoko ke tamate ai se kakai toka api.

Esekiele 29:16

E leaise toe liliu loa le puleaga lena ko se fanakiaga ki le fale o Iselaele ; E fakamanatu loa e ia ki Iselaele lana agasala, i le aso leia na tuku ai lana fanaki kiate ia. Ti e lotou iloa loa ko au ko le Aliki, le Eteleno.