Esaia 19:21 - Tosi Tapu

²¹ Ti e iloa loa le Eteleno e le kau Esipito, Ti e iloa loa le kau Esipito e le Eteleno i le aso lena ; E lotou fai loa ni sakilifisio mo ni moliga, Ti e lotou fai loa ni fakapapau ki le Eteleno ti e lotou fakasoko loa latou.

Esaia 19:21 ပူးပေါင်းရင်းမြစ်များ

Uluaki tosi o Sau 8:43

ke ke tali a ia mei le atu lagi, mei le ganea o lou nofoaga, ti ke ke tuku loa ki le matapule lena a nea fuli ala e kole atu loa e ia kiate koe, o tupu ke iloa e kakai fuli o le malama nei lou suafa ti ke lotou i kiate koe, ofaipe lou kakai ko Iselaele, ti ke lotou iloa e fetapa ki lou suafa i le fale leinei kua kau fakatuu !

Pesalemo 61:8

Ke eke a ia i le ekeekeaga fakasau o lee gato i mua o le Atua ! Ke ke tuku ke tokaga lou agamalie mo lou agatonu kiate ia !

Pesalemo 67:2

Ke alofa le Atua kia matou ti ke tapuaki a ia kia matou, Ke fakagigila e ia ona mata kia matou. - Manava.

Pesalemo 68:31

Ke ke tautea le kolokotile, Mo le kau pipi tagata mo le kau pipi tagata muli o atu kakai, Ala e tulolo mo ni piesi paaga ! Ke ke fakamavete a kakai ala e fiafia i le tau !

Pesalemo 68:32

E au ni kau lalasi mei Esipito ; E makape mai Etiopia, o falo mai ona lima ki le Atua.

Ekelesiasi 5:4

E malie ake kiate koe ke aua na ke fai se fakapapau, i lau fai se fakapapau kae e leaise ke fai.

Esaia 11:11

I le aso lena, e toe falo loa e le Aliki o tua lua lona lima Ke toe totogi le toetoega o lona kakai, Leia na mavetevete i Asilia mo Esipito, I Patolosi mo Etiopia, I Elame, i Sineale ti mo Amate, Ti mo atu motu o le tai.

Esaia 11:9

E leaise toe fai loa se nea veli, pe ko se maumau I loku mauga maokioki katoa ; Talie e apele loa le malama nei katoa i le iloa o le Eteleno, Ofaipe le apele o le takele o le tai i vai ala e ufiufi ia a ia.

Esaia 27:13

I le aso lena, e pupusi loa le fakatagi pupusi lasi, Ti e toe liliu mai loa latou ala na ave popula ki Asilia, Pe na sosola ki Esipito ; Ti e lotou su loa ki le Eteleno, I le mauga maokioki, i Selusalemi.

Esaia 37:20

I le aso nei, Eteleno lomatou Atua, saofaki matou mei le lima o Sanekelipe, o tupu ke iloa e puleaga fuli o le malama nei ko koe toka tasi ko le Eteleno !

Esaia 44:5

E pati loa le tasi : Ko au a le Eteleno ; E loto loa le tasi ki le igoa o Sakopo ; E tosi loa e le tasi ake ki lona lima : ki le Eteleno ! Ti e puaki loa e ia i le alofa le igoa o Iselaele.

Esaia 45:14

Ko leinei le folafola a le Eteleno : Ko fua o gaoi a Esipito ti mo koloa o Etiopia, Ti mo koloa o le kakai o Sapa ala ko ni tagata lalasi, E aumai loa kiate koe, ti e ke maua loa latou ; E saele loa a kakai ana i ou muli, E lotou saele loa mo ni tini, E lotou punou loa i ou mua, o kolekole atu kiate koe : Ko le maoki e nofo le Atua iate koe toka tasi, E leaise tasi ake Atua i se tasi ake ganea.

Esaia 49:7

Koia e pati ai le Eteleno, le fakamauli, le Sagato o Iselaele, Ki leia e vesiainai, leia e fakalialia ki ai le kakai, Ki le tagata popula a le kau makeke : E tio loa ni sau kiate ia, ti e lotou tutuu loa ki aluga ; E tio foki ni aliki kiate ia, ti e lotou punou loa i ona mua, O tupu ko le Eteleno, leia e agatonu, O tupu ko le Sagato o Iselaele, leia na filifili ia a koe.

Esaia 55:5

Ko leinei, e ke kalagai loa ni puleaga ala e leaise ke iloa, Ti e feoso mai loa kiate koe ni puleaga ala e leaise iloa ia a koe, O tupu ko le Eteleno lou Atua, O tupu ko le Sagato o Iselaele leia e fakakololia ia a koe.

Esaia 56:7

E kau ave loa latou ki loku mauga maokioki, Ti e kau fakafiafia loa olatou loto i loku fale faikole ; E tali loa alatou failaulau mo alatou sakilifisio i loku aletale ; Talie e fakaigoa loa loku fale ko se fale faikole ki kakai fuli.

Esaia 60:7

E tanaki mai loa kiate koe a kau manu fuli o Ketale ; E fakalogo loa kiate koe a kau ovi tagata o Nepasote ; E lotou pale loa ki loku aletale ti e kau tali loa latou ; Ti e kau fakakololia loa le fale o loku kololia.

Esaia 66:23

I masina foou fuli ti mo sapato fuli, E au loa a kakai fuli o atolasio kiate au, e pati le Eteleno.

Sonasi 1:16

Ti na maua loa e le kau tagata lena se i lasi ki le Eteleno, ti na lotou momoli loa se sakilifisio ki le Eteleno, ti na lotou fai loa ni fakapapau.

Apakuki 2:14

Talie e apele loa le malama nei i le iloa o le kololia o le Eteleno, Ofaipe le takele o le moana leia e apele i le vai leia e uufi ia a ia.

Sofoni 3:10

Mei leia atu fetuu o vaitafe o Etiopia, E aumai loa e laku kau atolasio, laku kau mavetevete, ni moliga kiate au.

Malakia 1:11

Talie mei le sopo o le laa o kaku ki lona galo, E lasi loku suafa i lotolotoga o atu puleaga, Ti e tutu i ganea fuli le iseso ki loku suafa, Ti e fai mai kiate au ni failaulau mea ; Talie e lasi loku suafa i lotolotoga o atu puleaga, E pati le Eteleno o kau tau.

Soane 17:3

Ti ko leinei le mauli lee gato, ke lotou iloa a koe, leia ko le Atua maoki fai e tasi, ti mo leia na ke kakau ia mai, Sesu-Kilisito.

Uluaki tosi a Petelo 2:5

ti ko koutou totonu, ofaipe ni fatu mauli, kotou faufau koutou ke fakatuu se fale fakalaumalie, mo se gaoi fakapelepitelo maokioki, o tupu ke momoli ai ni vikitima fakalaumalie, ala e mata malie ki le Atua ia Sesu-Kilisito.

Uluaki tosi a Petelo 2:9

Kae ko koutou, ko se lanu filifiliia, ko se kau sau fai sakilifisio, ko se puleaga maokioki, ko se kakai kua totogi, o tupu ke kotou fakasa ia a naunau o leia kua kalagai ia koutou mei le fakapouli ki lona malama fulumalie,

Uluaki tosi a Samuele 17:46

I le aso nei, e tuku loa a koe e le Eteleno ki oku lima, e kau tamate loa a koe ti e kau tuuti ia loa lou ua ; i le aso nei e kau soli loa a mate o le solia a le kau Filisitini ki manu lele o le lagi mo manu o le kele. Ti e iloa loa e le malama nei katoa e i ai le Atua o Iselaele.