Epelo 11:16 - Tosi Tapu

¹⁶ Kae ko leinei e lotou oli ki se fenua malie tukupau ake, leia i le lagi. Koia na leaise luma ai le Atua i lona fakaigoa a ia ko lolatou Atua, talie na teuteui e ia se kolo mo latou.

Epelo 11:16 ပူးပေါင်းရင်းမြစ်များ

Senesi 26:24

Ti na sa loa le Eteleno kiate ia i le pouli, o pati : Ko au ko le Atua o Apalaamo, lou tamana ; aua na ke i, talie e kau nofo mo koe ; e kau tapuaki loa kiate koe, ti e kau liuliuga loa lou sakoga, o tupu ko laku tagata fakasausau ko Apalaamo.

Senesi 28:13

Ti ko leinei na nofo le Eteleno i aluga o le kakega ; ti na pati loa a ia : Ko au ko le Eteleno, ko le Atua o lou tamana ko Apalaamo, ti ko le Atua o Isaake. Ko le kele lena e ke moe ai, e kau soli loa a ia kiate koe mo lou sakoga.

Ekesote 3:15

Na toe pati foki le Atua kia Moisese : E ke masau loa ki fanau a Iselaele, o pati : Ko le Eteleno, le Atua o okoutou tamana, le Atua o Apalaamo, le Atua o Isaake, ti mo le Atua o Sakopo, e kakau ia mai au kia koutou. Ko lena loku suafa ki le lee gato, ko lena loku suafa ki tautupu mo tautupu.

Ekesote 3:6

Ti na toe soko atu loa a ia : Ko le Atua au o lou tamana, ko le Atua o Apalaamo, ko le Atua o Isaake, ti ko le Atua o Sakopo. Ti na uufi loa e Moisese ona mata, talie na i loa a ia i le tio ki le Atua.

Ekesote 4:5

Na pati loa le Eteleno : Ko lena le nea leia e tonu ke ke fai, ke lotou tui loa na sa kiate koe le Eteleno, le Atua o olatou tamana, le Atua o Apalaamo, le Atua o Isaake, le Atua o Sakopo.

Selemia 31:1

E pati le Eteleno : I le temi lena, e kau liliu loa ko le Atua o famili fuli o Iselaele, Ti e lotou liliu loa ko loku kakai.

Mateo 25:34

Ti e pati loa le sau kia latou ala e tutuu loa i lona fetuu atamai : Kotou au, koutou ala na tapuaki e loku Tamana ; kotou maua le puleaga leia na teuteui atu kia koutou talu mei le kamataaga o le malama nei.

Maleko 12:26

Ki le toe tuuake o le kau mate, pe na leaise kotou lau i le tosi a Moisese, le nea leia na fakasa e le Atua kiate ia i le ga ulu vao : Ko au ko le Atua o Apalaamo, ko le Atua o Isaake, ti ko le Atua o Saakopo ?

Maleko 8:38

Talie ko leia e luma loa kiate au mo aku folafola i loto malie o le tautupu fai feauaki mo agasala leinei, e luma loa le Vosa o le tagata kiate ia, mo ka au loa a ia i le kololia o lona Tamana, mo le kau aselo maokioki.

Luka 12:32

Aua na kotou i, ga kau manu ikiiki ; talie kua malie ki lokoutou Tamana ke tuku atu kia koutou le puleaga.

Luka 20:37

Ki le toe tuuake o le kau mate, na fakasa le nea lena e Moisese, mei le ulu vao ulaula, i lana fakaigoa le Aliki, ko le Atua o Apalaamo, ko le Atua o Isaake, ti ko le Atua o Sakopo.

Soane 14:2

E lasi a nofoaga i le fale o loku Tamana. Kanapau e leai, kua kau fakasa atu a ia kia koutou. E kau ano o teuteui se nofoaga kia koutou.

Gaoi 7:32

Ko le Atua au o ou tamana, ko le Atua o Apalaamo, mo Isaake, ti mo Sakopo. Ti na lulu katoa Moisese, ti na leaise mafai ke tio a ia.

Filipe 3:20

Kae kia tatou, e tuu lotatou kolo i lagi, leia e tou talitali foki mei ai ki lotatou fakamauli, le Aliki ko Sesu-Kilisito,

Lua tosi kia Timoteo 4:18

Ti e saofaki loa au e le Aliki mei gaoi veveli fuli, ti e fakamauli loa e ia au, o fakaulu ki lona puleaga i le lagi. Kiate ia le kololia i sekulo mo sekulo ! Amene !

Epelo 10:34

Io, na kotou maua le manavaalofa kia latou ala na pilisoni, ti na kotou tali i le loto fiafia ke too o okoutou koloa, talie e kotou iloa e kotou maua loa ni koloa malilie tukupau mo tologa tuumau.

Epelo 11:10

talie na talitali a ia ki le kolo leia e maua ia ni fakatafito makeke, le kolo leia na laga ti na gaoi e le Atua totonu.

Epelo 11:14

E fakasa e latou ala e masau fenaaki e lotou afa se fenua.

Epelo 11:40

O tupu na teuteui e le Atua se nea leia e malie tukupau ake kia tatou, o tupu ke aua na lotou kaku ki le malie tukupau sala mo tatou.

Epelo 12:22

Kae kua kotou fakafeofi ki le mauga o Sione, ki le kolo o le Atua mauli, ki le Selusalemi i Selo, ki miliate mo miliate o le kau aselo,

Epelo 13:14

Talie e leaise tou maua i lalo nei se kolo leia e tuu mau, kae e tou afa le kolo leia ka au.

Epelo 2:11

Talie ko leia e fakamea ia, ti mo latou ala kua fakamea, e lotou au fuli mei le toka tasi. Koia e leaise luma ai a ia i lolatou fakaigoa ko ona fetaina,

Apokalipisi 21:2

Ti na kau tio loa e ifo mei le lagi, mei tafa o le Atua, le kolo maokioki, le Selusalemi foou, ti kua teuteu a ia ofaipe se taine feauaki leia kua teuteui ki lona avaga.