Efeso 5:8 - Tosi Tapu

⁸ talie i mua na kotou fakapouli, kae i le temi nei kua kotou malama i le Aliki. Kotou saele ofaipe ni fanau o le malama !

Efeso 5:8 ပူးပေါင်းရင်းမြစ်များ

Pesalemo 74:20

Ke ke tokaga ki le sai ! Talie kua apele a poko fuli o le fenua i nofoaga o le kau tukipo.

Esaia 2:5

Fale o Sakopo, Kotou au, ti ke tou saele fakatasi i le malama o le Eteleno !

Esaia 42:16

E kau fakasaele loa a kivi i se ala leia e leaise lotou iloa, E kau taki loa latou i ni ala ala e leaise lotou lave ki ai ; E kau fetogi loa i olatou mua le fakapouli ko le malama, Ti mo ganea pikopiko ko ni potu laumalie : Ko lena le nea leia e kau fai loa, ti e leaise kau tiaki loa latou.

Esaia 49:6

E pati a ia : Ko se nea noa ke ke liliu ko laku tagata fakasausau O toe lagai a faasiga o Sakopo, Ti mo toe aumai a toetoega o Iselaele : E kau fakanofo a koe ke liliu ko le malama o atu puleaga, Ke ave ia loku fakamauli o kaku ki potupotu o le malama nei.

Esaia 49:9

Ke fakasa ia ki le kau popula : Kotou mavae ! Ti mo latou ala e nonofo i le fakapouli : Kotou au ki le malama ! E lotou fai loa pe se kau manu leia e kai i ala, Ti e lotou maua loa ni faisaga mutie sesega i mauga fuli.

Esaia 50:10

Ko ai ia koutou e i ki le Eteleno, Ke fakalogo a ia ki le leo o lana tagata fakasausau ! Ko leia e saele i le fakapouli ti e sala malama, Ke fanaki a ia ki le suafa o le Eteleno, Ti ke pipiki a ia ki lona Atua !

Esaia 9:2

Kua ke fakaliliu le kakai o toka api, Kua ke tuku kiate ia se fiafia lasi ; Kua fiafia a ia i ou mua, ofaipe le fiafia i le tuuti o le fulumeto, Ofaipe le kalaga fakafiafia i le vae o koloa o le tau.

Selemia 13:16

Kotou tuku le kololia ki le Eteleno, lokoutou Atua, I mua o lana kakau mai kia koutou le fakapouli, I mua o le tukia o okoutou vae ki atu mauga o le pouli ; E kotou talitali loa ki le malama, Kae e fetogi loa e ia a ia ki le malu o le mate, E fakaliliu loa e ia a ia ko se fakapouli matotolu.

Mateo 3:8

Kotou fakatupu mua se fua leia e gali ti mo feauga mo le fakasemala,

Mateo 4:16

Ko le kakai lena, na tonatona i le fakapouli, Kua tio ki se malama lasi ; Ti kua sopo le malama Kia latou ala na nonofo i le fenua ti mo le malu o le mate.

Luka 1:79

Ke fakamalama latou ala e tonatona i le fakapouli mo le malu o le mate, Ke taki otou vae i le ala o le tokamalie.

Luka 16:8

Na vikiviki loa e le pule le tagata taupau koloa lee agatonu lena, i lona poto i le fai o ni puleaki kaka. Talie e poto ake a fanau o le sekulo leinei i le fai koloa mo olatou tautagata i fanau o le malama.

Soane 1:9

Ko le malama lena ko le malama maoki, leia na au ki le malama nei, ke fakamalama ia a tagata fuli.

Soane 12:35

Na pati loa Sesu kia latou : Koi nofo fua le malama i se ga temi ikiiki ia koutou. Kotou saele koi kotou maua le malama, talie ke aua na maua koutou e le fakapouli : ko leia e saele i le fakapouli e leaise iloa e ia pe ano a ia kifea.

Soane 12:36

Kotou tui ki le malama koi kotou maua a ia, o tupu ke kotou liliu ko ni fanau o le malama. Na fakasa loa e Sesu a nea ana, ti na ano loa a ia, o mumuni mamao meia latou.

Soane 12:46

Na kau au ofaipe se malama ki le malama nei, o tupu ke aua na nofo i le fakapouli leia e tui mai kiate au.

Soane 8:12

Na toe masau loa Sesu kia latou, o pati : Ko au ko le malama o le malama nei ; ko leia e muli mai iate au e leaise toe saele loa a ia i le fakapouli, kae e maua loa e ia le malama o le mauli.

Gaoi 17:30

Kae na leaise fakaaoga e le Atua a temi ala na nofo ai a tagata i le fakapouli, kae kua fakasa e ia i le temi nei ki tagata fuli i ganea fuli, e tonu ke lotou fakasemala,

Gaoi 26:18

o tupu ke ke fakamavaa olatou mata, ke lotou tafoki mei le fakapouli ki le malama, mei le pule a Satana ki le Atua, ti ke lotou tali, i le tui kiate au, le fakamolemole o agasala ti mo le tofiga o fakatasi mo latou ala kua fakamaokioki.

Loma 1:21

Talie kua lotou iloa le Atua, kae na leaise lotou fakakololia kiate ia ko le Atua, ti na leaise lotou fakafetai kiate ia ; kae na lotou sese i ni fakakaukau vaiga, ti kua apele olatou atamai valelea i le fakapouli.

Loma 13:12

Kua vave fua le oki o le pouli, kua ofi fua le ao. Koia ke tou tiaki ai a gaoi o le pouli, kae ke tou tui a masafu o le malama.

Loma 2:19

e ke pati ko le tagata takitaki a koe o le kau kivi, ko le malama a koe o latou ala e nonofo i le fakapouli,

Uluaki tosi ki le kau Kolinto 1:30

Kae kua fakapipiki koutou kia Sesu-Kilisito, leia i le finegalo o le Atua, kua liliu kia tatou ko le poto, mo le faitotonu, mo le maokioki, ti mo le totogi,

Lua tosi ki le kau Kolinto 3:18

Ti ko tatou fuli ala e tio i ni mata sala pulou ki le kololia o le Aliki ofaipe i se tiloata, e tou liliu ko se paaki e tasi mo ia, mei se kololia ki se kololia, i le Laumalie o le Aliki.

Lua tosi ki le kau Kolinto 4:6

Talie ko le Atua leia na pati, ke mu le malama i le fakapouli ! ti kua fakamu le malama lena i otatou loto ke fakagigila ai le iloa o le kololia o le Atua i mata o Kilisito.

Lua tosi ki le kau Kolinto 6:14

Aua na kotou kau fakatasi mo le kau lee agatonu i lalo o se laakau taki kese. Talie e fakatasi feaki le maokioki mo le agasala ? Pe fakatasi feaki le malama mo le fakapouli ?

Kalate 5:25

Kapau e tou mauli i le Laumalie, tou saele foki i le Laumalie.

Efeso 2:2

ala na kotou saele ai i mua, o mulimuli ki le teka o le malama nei, o mulimuli ki le aliki o le makeke o le aele, o le laumalie leia e gaoi nei i vosa o le patigataa.

Efeso 4:18

E lotou maua se atamai fakapouli, e lotou matapule ki le mauli o le Atua, o tupu ko le fakapouli leia e maua ia latou, o tupu ko le fakafefeka o olatou loto.

Efeso 5:2

ti kotou saele i le alofa, o faifaitaki kia Kilisito, leia na alofa kia tatou, ti na soli a ia totonu ki le Atua o tupu ko tatou, ofaipe se moliga mo se sakilifisio manogi ki le Atua.

Efeso 6:12

Talie e leaise tou fepoko mo le kanofi mo le toto, kae mo le kau pule, mo le kau makeke, mo le kau pule lalasi o le fakapouli, mo le kau laumalie veli i potu fakalagi.

Kolose 1:12

Kotou fakafetai ki le Tamana, leia kua mafai ai ke kotou kau i le tofiga o le kau sagato i le malama ;

Kolose 1:13

leia kua saofaki ia tatou mei le makeke o le fakapouli ti kua siki ia tatou ki le puleaga o lona Alo alofaina,

Tito 3:3

Talie ko tatou foki, na tou valelea i mua, mo patigataa, mo sese, mo popula ki olioli noa mo manumanu fuli, na tou mauli i le agaveli mo le loto veli, ti na tou vesia ti na vesia mai foki kia tatou.

Uluaki tosi a Soane 1:7

Kae kapau e tou saele i le malama, ofaipe ia totonu e nofo i le malama, e tou fekomunioaki tuumau, ti e fakamea tatou e le toto o Sesu lona Alo i agasala fuli ai.