Amosi 4:13 - Tosi Tapu

¹³ Talie ko leinei leia na fau ia a mauga ti na fakatupu ia le matagi, Leia e fakasa ia ki le tagata ana manatu, Leia e fetogi ia le mafoata o fakapouli, Ti e saele i potu taualuga o le kele : Ko lona igoa ko le Eteleno, le Atua o kau tau.

Amosi 4:13 ပူးပေါင်းရင်းမြစ်များ

Sopo 9:7

E lagiaki a ia ki le laa, ti e leaise toe sopo a ia, Ti e tapono e ia ki le kalavi a fetuu o le lagi.

Pesalemo 135:7

E fakapale ake e ia ki aluga a ao i potupotu o le malama nei ; E fakatupu e ia a uila mo le ua ; E too e ia le matagi mei ona koloa fufu.

Pesalemo 139:2

E ke iloa mo ka kau tonatona ki lalo, ti mo ka kau tuu ki aluga, E ke ului mei mamao laku manatu ;

Pesalemo 147:18

E kakau e ia lana folafola, ti e liliu le aisi o vai ; E fakaagi e ia lana matagi, ti e sali a vai.

Pesalemo 65:6

I lou agamalie, e ke tali ki amatou kole i ni nea fakamanamana, Atua o lomatou fakamauli, A koe ko le amanaki malie o atu puleaga o potupotu o le malama nei ti mo atu motu mamao o le tai !

Ekesote 10:22

Na siki loa e Moisese lona lima ki le lagi ; ti na vilo loa se fakapouli matotolu i le fenua katoa o Esipito i aso e tolu.

Ekesote 14:20

Na tuu loa le ao i le vasa o le kau tau a le kau Esipito mo le kau tau a le kau Iselaele. Na fakapouli le ao lena i le tasi fetuu, ti na fakamalama e ia i leia ake fetuu le pouli. Ti na leaise mafai loa ke fakafeofi a kau tau e lua i le po katoa.

Esaia 40:12

Ko ai na fua ia le lasi o atu vai i lona alofilima ? Ko ai na fuafua ia le lau lasi o le lagi ki lona alofilima ? Ko ai na tanaki ia le kele katoa o le malama nei ke o i se pakete ? Ko ai na fua ia le mamafa o mauga lalasi mo mauga liliki ki se fua ?

Esaia 45:7

E kau fau le malama, ti e kau fakatupu le fakapouli ; E kau soli le mou koloa, ti e kau fakatupu le malaia ; Ko au, le Eteleno, e kau fai a nea fuli ana.

Esaia 47:4

Ko lomatou fakamauli, ko leia e igoa ko le Eteleno o kau tau, Ko le Sagato o Iselaele.

Esaia 48:2

Talie e lotou igoa ki le kolo maokioki, Ti e lotou fanaki ki le Atua o Iselaele, Leia ko lona igoa ko le Atua o kau tau.

Esaia 5:30

I le aso lena, e i ai loa se gugulu i ona tafa, Ofaipe le gugulu o le afa i le tai ; Ka tio ki le fenua, e tio loa ki le fakapouli ata, Mo ni tuania ti mo ni amanaki malie o faifai lakaga ; Ti e fakapouli loa le lagi.

Selemia 10:13

I lona leo, e gugulu a vai i atu lagi, E fakapale ake e ia a ao i potupotu o le malama nei, E fakatupu e ia a uila mo le ua, E too e ia le matagi mei ona koloa fufu.

Selemia 10:16

E leaise tatau mo latou Leia ko le vaega o Sakopo ; Talie ko ia leia na fau ia nea fuli, Ti ko Iselaele ko le faasiga o lona tofiga. Ko lona suafa ko le Eteleno o kau tau.

Selemia 13:16

Kotou tuku le kololia ki le Eteleno, lokoutou Atua, I mua o lana kakau mai kia koutou le fakapouli, I mua o le tukia o okoutou vae ki atu mauga o le pouli ; E kotou talitali loa ki le malama, Kae e fetogi loa e ia a ia ki le malu o le mate, E fakaliliu loa e ia a ia ko se fakapouli matotolu.

Selemia 46:18

E kau mauli ! e pati le sau, Leia e igoa ko le Eteleno o kau tau : Ofaipe le Tapole i loto malie o atu mauga, Ofaipe le Kalemelo leia e oso ki le tai, E au loa le fili.

Selemia 51:16

I lona leo, e gugulu a vai i le atu lagi ; E fakapale ake e ia a ao i potupotu o le malama nei, E fakatupu e ia a uila mo le ua, E too e ia le matagi mei ona fale koloa.

Selemia 51:19

Kae e leaise tatau mo latou le vaega o Sakopo ; Talie ko ia leia na fau ia nea fuli, Ti ko Iselaele ko le kakai o lona tofiga. Ko le Eteleno o kau tau ko lona suafa.

Taniela 2:28

Kae e i ai i le lagi se Atua leia e fakasa ia a nea fakafufu, ti kua fakasa e ia ki le sau ko Nepukatenesale le nea leia ka soko mai loa i temi ki muli. Ko leinei lau moe miti mo nea ala na ke tio ki ai i lou moeaga.

Taniela 2:30

Kapau kua fakasa le nea fakafufu lena kiate au, e leaise tupu e iate au se poto leia e lasi ake i le poto o tagata mauli fuli ; kae e tupu ke fakasa le fakamatala o le moe miti mo lona uiga ki le sau, ti ke iloa e koe a fakakaukau o lou loto.

Oseo 12:6

Ko le Eteleno ko le Atua o kau tau ; Ko lona suafa ko le Eteleno.

Soele 2:2

Aso o fakapouli mo le pouli loloto, Aso o ao mo kokofu, E au a ia ofaipe le mafola o le pouli i aluga o mauga. Ko leinei se kakai toka api mo makeke, Leia e leai sona tatau, Ti e leaise toe maua sona tatau i temi ki muli.

Amosi 3:13

Kotou fakalogo, kotou fakasa le nea leinei ki le fale o Sakopo ! E pati le Aliki, le Eteleno, le Atua o kau tau :

Amosi 5:27

Ti e kau ave loa koutou o fakapopula i muli atu o Tamaso, E pati le Eteleno, leia ko lona igoa ko le Atua o kau tau.

Amosi 5:8

Ko ia leia na fakatupu ia a fetuu o le Peleiate mo le Olione, Ko ia leia e fetogi ia le fakapouli o mafoata, Ko ia leia e fakaliliu ia le ao o pouli, Ko ia leia e kalagai ia a vai o le tai, Ti e fakamafola ia a ia i aluga o le kele : Ko le Eteleno ko lona igoa.

Amosi 6:8

Kua fakapapau le Aliki, le Eteleno, iate ia totonu ; Kua pati le Eteleno, le Atua o kau tau : E kau fakalialia ki le fia nealasi o Sakopo, Ti e kau vesia ki ona fale sau ; E kau tuku loa ki le fili le kolo mo nea fuli i loto.

Amosi 8:9

I le aso lena, e pati le Aliki, le Eteleno : E kau fakagalo ia loa le laa i le lalatea, Ti e kau fakaliliu loa ke pouli le malama nei i le loto malie o le ao ;

Amosi 9:6

Na fakatuu e ia lona fale i le atu lagi, Kae tuu lona fakatafito i le kele. E kalagai e ia a vai o le tai, Ti e fakamafola e ia latou i aluga o le kele : Ko le Eteleno ko lona igoa.

Mikea 1:3

Talie ko leinei, e ulu mai le Eteleno mei lona nofoaga, E ifo mai a ia, e saele a ia i potu taualuga o le kele.

Apakuki 3:19

Ko le Eteleno, le Aliki, ko loku makekeaga ; E fakaliliu e ia oku vae ofaipe la o tia fafine, ti E fakasaele e ia au i oku potu taualuga. Ki le pule o kau sua. Ki ni nea faimusika va.

Sakalia 12:1

Folafola kikite, folafola mamafa a le Eteleno ki Iselaele. Koia e folafola ai le Eteleno, leia na folasi ia le atu lagi ti na fakatafito ia le kele, Leia na fau ia le laumalie o le tagata iate ia.

Mateo 9:4

Ti na pati loa Sesu, i lana iloa alatou manatu loto : Kolea e kotou maua ai ni manatu veveli i okoutou loto ?

Soane 2:25

ti talie na leaise aoga ke fakasa ake e se tasi kiate ia se nea o uiga mo se tagata ; talie na iloa e ia le loto o le tagata.

Soane 3:8

E agi le matagi ki le ganea leia e loto a ia ki ai, ti e ke logo fua ki lona mumusu ; kae e leaise ke iloa pe au a ia meifea, pe ano a ia kifea. E toe tatau foki ki tagata fuli ala na tupu i le Laumalie.

Tetelonome 32:13

Na ave e ia a ia ki potu taualuga o le fenua, Ti na kai e Iselaele a fua o faisaga ; Na fakasali e ia kiate ia le meli o le utu, Mo le lolo leia e sali mei le utu fefeka,

Tetelonome 33:29

Manuia a koe, Iselaele ! Ko ai e tatau mo koe ? Ko se kakai na saofaki e le Eteleno, Leia ko le paletau e puipui ia a koe, Ti ko le seleta o lou kololia ? E leaise tuu loa ou fili i ou mua, Ti e ke takafi loa ki lou vae olatou ganea taualuga.