Amosi 2:4 - Tosi Tapu

⁴ E folafola ai le Eteleno, o pati : O tupu ko agaveli e tolu a Suta, E fa foki, e leaise kau toe fetogi laku fakatotonu, Talie na lotou maumaui le lao a le Eteleno, Ti na leaise lotou taupau ana fakatotonu, Talie na fakasese latou e taulaatua loi Ala na atolasio ki ai olatou tamana.

Amosi 2:4 ပူးပေါင်းရင်းမြစ်များ

Lua tosi o Sau 17:19

Ti na leaise taupau foki e Suta totonu a folafola a le Eteleno, lona Atua, kae na lotou mulimuli ki agai fenua ala na fakatuu e Iselaele.

Lua tosi o Koloniko 25:14

I le toe liliu mai loa a Amatesia i le oki o le lava o le kau Etome, na aumai loa e ia ni fakatata mei vosa o Seili, ti na fakaliliu loa e ia latou ko ona atua ; na punou loa a ia i olatou mua o tutu kia latou ni nea fakamanogi.

Lua tosi o Koloniko 30:7

Aua na kotou faipe okoutou tamana mo okoutou fetaina, ala na agasala ki le Eteleno, le Atua o okoutou tamana, ti na tuku e ia ki le malaia ofaipe le nea leia e kotou tio ki ai.

Neemia 1:7

Na motou agasala lasi kiate koe, talie na leaise motou tausi au folafola, mo au lao, ti mo au fakatotonu ala na ke tuku ki lau tagata fakasausau ko Moisese.

Neemia 9:26

Kae na lotou malaga loa kiate koe. Na lotou tiaki loa lau lao ki muli, ti na lotou tamate loa lau kau polofeta leia na kolekole kia latou ke toe liliu mai kiate koe, ti na lotou fai loa kiate koe ni nea veveli.

Esaia 28:15

E kotou pati : kua motou fai se sai mo le mate, Kua motou fai se fakapapau mo le nofoaga o le kau mate ; Ka mapaa mai loa ki fafo le malaia, e leaise lave mai loa a ia kia matou ; Talie ko lomatou solaaga ko le kaka, ti ko lomatou mumuniaga ko le loi.

Esaia 44:20

E kai makona a ia ki le mugalafu, E fakasese a ia e lona loto fakapouli, Ti e leaise fakamauli loa e ia lona laumalie, ti e leaise pati loa a ia : Pe leaise ko se loi leinei e kau too i loku lima ?

Selemia 16:11

Ti ke tali loa kia latou : Na tiaki au e okoutou tamana, e pati le Eteleno, Na lotou mulimuli i ni atua kese, Na lotou tausi kia latou ti na lotou punou i olatou mua. Na lotou tiaki au, ti na leaise lotou tausi laku lao.

Selemia 16:12

Ti ko koutou, na kotou fai le veli o lasi ake i okoutou tamana ; Ti ko leinei, e tasi mulimuli le tagata ki oli o lona loto veli, Ke aua na fakalogo mai kiate au.

Selemia 17:27

Kae kapau e leaise kotou fakalogo mo ka kau fakatotonu atu kia koutou Ke fakatapu le aso o le sapato, Ke aua na amo se amoga, Ke aua na fakaulu se amoga i matapa o Selusalemi i le aso o le sapato, Ti e kau tutu loa se afi i matapa o le kolo, Ti e kai loa e ia a fale fakaalialiki o Selusalemi, ti e leaise toe mate loa a ia.

Selemia 6:19

Kele, fakalogo mai ! Ko leinei, e kau kakau mai ki le kakai leinei le malaia, Fua o ana manatu ; Talie na leaise lotou tokaga ki aku folafola, Na lotou tiaki aku lao.

Selemia 8:2

E fola loa latou i mua o le laa, mo mua o le masina, mo mua o le kau tau fuli o le lagi, ala na lotou alofa ki ai, ala na lotou tausi ki ai, ala na lotou mulimuli ki ai, ala na lotou afa ia, ala na lotou atolasio ki ai ; e leaise tanaki loa latou, ti e leaise tanu loa latou, kae e lotou fai loa pe se taei kele fakagako i aluga o le kele.

Selemia 8:9

Kua luma le kau poto, Kua lotou sevaia, kua tapo latou e le masele. Ko leinei, na lotou tiaki le folafola a le Eteleno, Ti ko le poto fea leia e lotou maua ?

Selemia 9:14

E tupu na lotou mulimuli ki oli o olatou loto, Ti na lotou ano i muli o Paale, Ofaipe lona ako kia latou e olatou tamana.

Esekiele 13:22

O tupu e kotou fakamamae le loto o le tagata agatonu ki ni loi, Leia na leaise kau fakamamaei, Ti e tupu e kotou fakamakeke a lima o le tagata agaveli Ke aua na mavae a ia i lona ala veli ke mauli ai,

Esekiele 20:13

Kae na agatuu loa le fale o Iselaele kiate au i le toafa. Ti na leaise lotou mulimuli loa ki aku lao, ti na lotou tiaki loa aku fakatotonu, ala e tonu ke fai e le tagata o tupu ke mauli ai, ti na lotou maumaui fakaveliveli loa aku sapato. Koia na kau maua ai loa le manatu ke liligi kia latou loku sausau i le toafa, o tupu ke fakapuli ai latou.

Esekiele 20:16

Ti ko le nea lena o tupu na lotou tiaki aku fakatotonu, ti na leaise lotou mulimuli ki aku lao, ti na lotou maumaui aku sapato, o tupu na leaise fakamamao olatou loto i olatou taulaatua.

Esekiele 20:18

Na kau pati loa ki olatou vosa i le toafa : Aua na kotou mulimuli ki lekula o okoutou tamana, ti aua na kotou taupau alatou agai fenua, ti aua na kotou fakakelekele koutou ki olatou taulaatua !

Esekiele 20:24

talie na leaise lotou fai aku fakatotonu, talie na lotou tiaki aku pelesepeto, ti na lotou maumaui aku sapato, ti na mulimuli olatou mata ki taulaatua o olatou tamana.

Esekiele 20:30

Koia, pati ki le fale o Iselaele : E folafola le Aliki, le Eteleno, o pati : Pe leaise kotou fakakelekele koutou ofaipe okoutou tamana, pe leaise kotou faiaga ki alatou nea fakalialia ?

Esekiele 22:28

Ti kua fufu e ana kau polofeta a nea fuli ana ki se pena tea, mo ni tio vaiga, mo ni kikite loi, o lotou pati : E folafola le Aliki, le Eteleno ! Kae na leaise folafola fua le Eteleno kia latou.

Esekiele 22:8

Kua ke tiaki loku sagatualio, ti kua ke maumaui aku sapato.

Oseo 12:2

E kai e Efalaimi le matagi, ti e tuli e ia le matagi o le potu Esite. I aso fuli e liuliuga e ia le loi mo le agaitaita ; E fai e ia se sai mo Asilia, Ti e fetuku e ia se lolo ki Esipito.

Oseo 12:3

E valoki foki e le Eteleno a Suta, Ti e tautea loa e ia Sakopo o fakatatau ki lana aga, E totogi loa e ia kiate ia o mulimuli ki ana gaoi.

Oseo 6:11

Kua teuteui foki kiate koe, Suta, se temi tuuti fulumeto, Mo ka kau toe aumai loa le kau popula o loku kakai.

Amosi 1:3

Koia e folafola ai le Eteleno, o pati : O tupu ko agaveli e tolu a Tamaso, E fa foki, e leaise kau toe fetogi laku fakatotonu, Talie kua lotou takatakafi Kalaate ki ni saliote ukamea.

Amosi 3:2

Kua kau filifili koutou, koutou tefua i famili fuli o le malama nei ; Koia leia e kau tautea ai loa koutou o tupu ko akoutou agaveli fuli.

Mikea 6:12

Talie kua apele i le agamakeke le kau mou koloa o le kolo leinei, Ti kua masau loi lona kakai, Ti kua kaka olatou alelo i olatou gutu.

Apakuki 2:18

Kolea le aoga o se fakatata ta, ke tupu ai lona ta e se tagata tufuga ? Kolea le aoga o le fakatata ukamea saka leia e ako ia le loi, Ke tupu ai le tuku e le tagata lana fanaki kiate ia, Kae ko le maoki e lolotoga fau e ia ni taulaatua gutu mate ?

Loma 1:25

latou ala kua fetogi ia le maoki o le Atua ki le loi, ti kua atolasio mo tausi ki le nea leia na fakatupu e le Atua, kae tuku le Tupuaga leia e tonu ke lotou fakakololia ki ai o lee gato. Amene !

Uluaki tosi ki le kau Tesalonika 4:8

Koia, ko leia e tiaki ia a fakatotonu ana, e leaise tiaki e ia se tagata kae le Atua, leia na soli ia atu foki kia koutou lona Laumalie Maokioki.

Uluaki tosi a Petelo 1:18

Talie e kotou iloa na leaise totogi koutou ki ni nea popo, ki se paaga pe ko se aulo, mei le mauli vaiga leia na kotou maua mei okoutou tamana,

Tuifakamaau 10:6

Na toe fai loa e fanau a Iselaele le nea leia na veli ki mata o le Eteleno : Na lotou tausi loa Paale mo Asetalate, ko atua o Silia, mo atua o Sitone, mo atua o Moape, mo atua o Amone, ti mo atua o le kau Filisitini. Na lotou tiaki loa le Eteleno ti na leaise lotou toe tausi loa kiate ia.