Kalose 1:9 - Got Weng Abem

⁹ Bemi mit uta nuka sun kuw kim luk Got gánlawbuw ko. Nuka kamakikiw kal kim sung ayo kidibuwe, nuka mit kei ulum kano Got gánlaw bom buduw ko. Nuka Got gánlawuwo, Sinik Abem ata adiyama aket kidel fukanin so kal keimin so uyo adik wakadá kal kei nadiwo Got am aket kimi kanamino, yakba uyo atin dakat kal keidokabiw kala.

Got weng abem: Alokso abino kalin

⁹ Bemi mit uta nuka sun kuw kim luk Got gánlawbuw ko. Nuka kamakikiw kal kim sung ayo kidibuwe, nuka mit kei ulum kano Got gánlaw bom buduw ko. Nuka Got gánlawuwo, Sinik Abem ata adiyama aket kidel fukanin so kal keimin so uyo adik wakadá kal kei nadiwo Got am aket kimi kanamino, yakba uyo atin dakat kal keidokabiw kala.

Kalose 1:9 ပူးပေါင်းရင်းမြစ်များ

Yon 7:17

Kata kan kinim ata Got weng abodon kala, aka umi mit uyo kidela kal kei nadano nam kukubi be Got amiyo bade nalam weng adik dáw bakanbine, kalak kala.

Sinik Abem 12:5

Kale Bita aka kalabus am dawtidiw be, kata Got wanang kinim gu ika Bita Got dakodawako kale kitid kuw tabe Got wis sánlawbisiw ko.

Udom 12:2

Kale kiba bakan dim wanang kinim im kukuw kanamáliw uta aboyámin bá, kata Got ata au akiwo, aka yak kim dil aket fukanin uyo kukan keiyam aket fal maek kusikiyamano, alokso aket fukanin leiw uyo kudulin kala. Kale kanoyamano, beta kal kei au, beta atin kukuw kidel ade au, ufek ufek bo kanodongino ade yaknámin uta Got kalfalin kudawokabuw, kale nadiwo beta aket bakel dau yak Got alam kanamino, kalba uyo kanamokabiw ko.

1 Kodin 1:5

Got aka Yesus dim leiw adikum kiba im kinim dáse, be kilim weng adikum bakanin so kilim kal keimin adikum so uta ko.

Efesis 1:8

kayo aka alam kal keimin dukum so aket fukanin dukum so tuw min gelemin seng seng uyo kukayaba.

Efesis 5:10

Kale kiba afet bom nadiwo yaknámin kukuw uta Kamok am aket kidelawokabu kal bom nadiwo kanamin kala.

Efesis 5:17

Kaba aket dakwan keimin bá, kata liwu kal keidomo, au yaknámin uta Kamok am aket kanamalo, nakbane kal bomo kala.

Efesis 6:6

Kin modin kafimo bada aka afan kanamin kinimo, nakako kaleyo kuw kung kekin bá. Kata kaba Kadais ami wok fakudin kinim kale adik kalam aket kuw Got am aket atin aket kumam bo kanamalo, kakba ki kanamin ko.

Filibai 1:4

naka adikum kimi luk atan makuw makuw uyo kalfalin so Got gánlawábi.

Kalose 1:6

Kale kiba kibiliwso kamakikiw sung kidel kidi nadiwe kukuw kidel kuw kana bom nadiw Got ami min gelemin uyo kal kei atin afan be kalesidiw ulutaw ki kinim iyo sung kidel uyo anang bakan kuw tabodu abiw seng seng kinim wanang seng seng iyo afan kal bom nadiwe kidel kuw kanabiw ka.

Kalose 3:16

Kiba Kadais ami kukumin uyo kudáliw seng kuw kibilim kidin tem tein badano, kukudawa kukudawa bom nadiwe Got ami weng uyo fuw keimam we bom nadiwade suksukin fuw we bom nadiwe Sinik Abem ami fuw we bom nadiwe kanodin fuw kilimi aket tem kal Got faktodaw we bom ken keiyo kalanin kala.

Kalose 4:12

Ibáfadas kilimi afan kalin wanang kinim gu makuw kinim ade Kadais Yesus wok fakudin kinim be alaso teinbidiwako, kalin weng kudáyama tadu ko. Aka sun kuw Got wis sánin kitid dukum kuw keimano Got aka akis moyama kitid tabe tod nadiwade atin kidela kal kei nadiwo Got ami aket kanamino, yakba uyo kanamokabiw ko.

Kalose 4:5

Kale kiba afan kalongin banim kinim iso teiniw namti, kukuw kidel kuw kana bom dakáya bidiwo, ika iliso kim weng kidel uyo kidiyámin kala.

1 Tesalonaikka 1:3

naduwo kawákal Got kin dim, nuka kilim Yesus afan kalin dudew tabamin so kilim Yesus aket kudaw nadiw wok kitid fakanin so Kamok Yesus mimin dok diyámin kitid so buta kim aket nuka fukanaluw ko.

1 Tesalonaikka 5:17

sun kuw Got suksukla bom nadiwe

2 Tesalonaikka 1:11

Beta kaleyo nuka sun kuw kiba Got gánlawabuw kala. Kale nuka Got gánlaw buduwo alam kana kanodin wanang kinim ita nam man keidino, yakba ade aka kibilim kanodin kidel keidumo, kalbiw uyo kanoyam nadane kilim afan kalin yán uyo alam kitid dukum tuw kuyamokaba kala.

Failiman 1:4

Kale naka sun kuw Got gánlawi, naka kam aket uyo fukan bom Got ken keiyo, akanábi ko.

Failiman 1:6

Naka Got amaneng dukádawino nulum afan kalin taku madenbuw uta kanokamuno, nulum Yesus ami dim ufek ufek adikum kudabuw uyo kal keidal kala.

Ibidu 10:36

Kale kiba kidela dakbu beta ken Got alam kanamino, yakba uyo kidel kuw faku nadiw kilálokabiw, beta adikum ufek ufek alam weng boyamsa uyo kudulokabiw kala.

Ibidu 13:21

uyo ken dakoyama fasko alam kanamino, yakba uyo adikum ufek ufek kidel kuw Yesus alam win dim dudew tabe bidiwo kala. Kale Yesus Kadais ayo win sun kuw sun kuw kufádawum kala, kale be afan ko.

Yemis 1:5

Kata kinim kan ata idum matam dok didawu, aka aket kidel mak fukanongin banim keida kaí, aka Got dákadálawak kala. Kale be watawo kaleyo bá, Got aka isom min gelemin kinim, kayo aka aket kidel fukanin uyo kudawokaba ko.

Yemis 3:17

Kata Got ami aket fukanin kidel beyo ki, kamakikiw atin adikum kukuw kidel fakuyámin, abino kalin, dak buyámin ade kinim wanang adik dakáyamin, kinim madik im idum uyo nata kudew tabono kalin ade atin aket budunin, wanang kinim duw ifin kin kuw kadoyámin banim ade ibakamin banim ade kasen kasen bom faltimin banim uta ko.

1 Bita 2:15

Kaleyo Got am aket ayo yak kim kukuw kidel faku bidiw, uta ta bom wanang kinim kidela kal keidongin dako bom weng mafak bakayabiw, imi bon tem uyo atiyamak kala.

1 Bita 4:2

Kayo kamane alam tein be so yanol tein unokaba so uyo alam bakan dim kana bom biyámin uyo Got ami kanamalo, akba ki kidi umi akfak tem bom nadane alam dam kuw kidelnamuko kalin aket fukanin bo kudálak kala.

1 Yon 2:17

Kale bakan kuw tabodu sino bakan dim ufek ufek aket kukákamin so uyo banimokabu, kata kinim Got ami weng kidilawámin kinim ata kuw, sun kano sun bokaba kate.

1 Yon 5:20

Nuka belaso kal keidomo, Got ami Min ayo madák nadane kal keimin kuyamase, kale nuka tatun kinim ayo nulum kal keisuduw. Kale be alam Man Yesus Kadais ata tatun kinim ade ata afan Got ade alata sun biyámin mit Kinim kayo nuka aso makuw buduw kala.