Yuti 1:23 - Kotimo Kawe Someaka Masane Oyapo

²³ Arirakano aporo metakira hukuarura maiya amo iramo inakakohoamo, yumo pasimaka arareraka some kakanie. Aporoane ararena maiya amo makata watikisa amo re soko kirimanapaka fasikia risikianie. Pasu paté pitikinisa watikisekeno hisina ayiáka, ipu makata watikisane repo hisihoanie. Makata watikisane hisiraka risikianie. Asiāne aporoane kamenakaraka ararehoanie.

Yuti 1:23 ပူးပေါင်းရင်းမြစ်များ

Rome 11:14

Kára seseraka rakirakano Yu aporomo kaikia someraka, “Yu aporohoanafonosane Kotimo makoterakano, isu soko makotehoasimo hemakapurakaripo,” aihoasimo Yu aporohoanafonosapoko Kotimo rakirane nōmo makáraraka somerakanapo. Somerakano Yu aporomo kára hemakapuraka, Yasuaki himu hakásaraka hemakapurakano Kotimo i mafasikia pasimokoasimo ano seseripo.

1 Korini 15:33

Asiamo repo hasaka hemakapukupo. Pipu yia hasaka hemakapurapaka mahoperaka somerane kakimakopo. Koteaka rea aporoane ipi aporo tákeane watikiaka reasamo eane kirimaraka, tati hakāsa watikiaka risikiakosapo.

1 Korini 3:15

Arirakano iramo inakakorakano, apeane kisia aporoamo makata ropo makosane metakariakosapo. Epo makata ropoane metakariraka e aporomanoane pasimakosapo. Ape kisia aporoane mafasiakosakipoko ira rufi arakaru aeyaka amara ayiáka, Kotimo e maka, mafasiakosapo.

2 Korini 5:11

Unihae Kotiane karasasamo isiapo eane namoraka hemakapukua rakirapo. Asiamo aporo metakirane Kotiaki risikiako parihoasimo isiapo paroaka wakapuaka some karakanapo. Arirakano isiapo aina kotesane Kotimo aserakanapo. Asiamo repo soko, isiapo aina kotesane asekeasimo hemakapurakaripo.

2 Tesaronaeka 3:14

Isiapo sawi popana one aporo metamo koaretaerakano aporo akiyaki hakasa risikiakopo. Ipiyaki hakasa risikianafonorakano, epo koaretaesane hemakapuraka ipi kaíyahokosapo.

1 Timoti 4:16

Ipu nómo makata rakirane asekeasimo nómo koteaka rakiako hemakapukua rekeanie. Nómo tisaraka makata some akaramo nómo hasaka some karápaka asekeanie. Ayiáka koteaka hemakapukua rakiraka rekeno, né níane soko arirakano nómo someane kakimasa aporo hinamoane soko Kotimo mafasiakosapo.

2 Yone 1:11

Asiamo kotafe some kará aporoane repo maeaka pasimaka repo apea karikia purakanone, aporoamo watikiaka rakirane repo soko hakása nineraka hemakapukua watikiaka rakirakanapo. Watikiaka rakirapaka kotafe some kará aporoane pasimaka repo apea karikia pukupo.

Yuti 1:22

Arirakano aporomo Yasuaki himu hakásaraka hemakapusuane paroaka rekeanafonorakano, aporoane arareraka some kakanie.

Some Faremaresa Tarisia 3:18

Asiamo repo koteaka hemakapusimo nōmo hemakapusuane reaki somerakanapo. Repo makata kemo kárahokosakipoko nōmo korótoane ropohoanie. Nōmo korótoane iramo paikia wariwariraka, makata pepeno toane mokoa mokoateraka, koróto namo susu mosane ayapo. Re patera yase risike kaiyanapaka pasu osohokosakipoko, nōmo pasu pakaesa kotesane ropohoanie. Repo himo koteaka aseakosakipoko hi munamunane ropohoanie.

Some Faremaresa Tarisia 3:4

Arirakano Sátisi sése apea re metakira koteaka risikinapo. Arirakano makata pikirisamo pasu kotesane mapikirinapo. Mapikirina ayiáka makata watikisamo repo himuane mapikirinapo. Asiāne re namina yia metakira koteaka risiasamo repo pasuane mapikirisafapo. Re metakira koteaka risiasamo reaki pasu pakae kotesane nōmo kakakosapo. Kaka re anoyaki hakāsa risikiakosapo.