iFilibi 1:20 - ɛWee ne ìTsɛm iHywas

²⁰ Nggɛ yɛk ne irway nzi has irway ɛlɔ ne naa yung bak ito nge ncwa ndɔ ɛtomɛ ɛKiriti gha, te n yang bol tang ɛnik. Te gbik ɛkɔn na ne naa mɔn no te ɛKiriti gha sɛ ndiinday ndɔ ne ishwɛɛ nge ɛlyilyɛghaa wo, ɛli ne iphɛ ku so wo. Hang nzo ɛken yɔɔ, hang nggɛ ku yɔɔ.

iFilibi 1:20 ပူးပေါင်းရင်းမြစ်များ

1 ɛBiturus 4:16

Wu ɛɛ sɔ ɛn nggbang ngga daa ɛli ne ɛ so ɛn ninaa ne roos ɛKiriti yegha, sɔng ne ɛ phok ɛn ncwa nang, yang nang ɛn ɛTaanggbey ye ne ndiinday daa ɛli ne ɛ bok ɛn irywɛɛk ɛKiriti wo.

1 iKɔrɔntos 6:20

Kɛ say nyini i tal. iPhɛ ɛlɛy ne ɛ nang ɛn ɛTaanggbey ye ne ndiinday ne ibek mon de.

1 iTasɔlɔnika 5:23

Te ɛTaanggbey ya ne ito ɛbhɛ ne ɛ soye ɛhaa ne irway ne laal la, tul nyini kang yɛnɛng-yɛnɛng, ɛ te ikabyik mon, ne iken mon, ne ibek mon de shɛɛ wɛlɛng ɛkɔn ne tok, ɛtuk ka ne ɛDaray njwɛɛn ɛYɛso ɛKiriti gha sɛ bhɛ kyii wo.

1 ɛYohana 2:28

ɛLyilyɛghaa wo nyinɛn ninɔn nge ne nzi sim, ne ˆɛ shɛɛ ɛn ndɔ ɛKiriti gha te sɛ ne sɛ ɛtuk ka ne ɛ sɛ tɔɔl le wo, njwɛɛn kyinak ɛnu ɛyisɛ ɛbhɛ tang ɛnik ne ncwa.

iFilibi 2:17

ìNang ne itin mon de gbik ne ɛtomɛ mon na ndɔ ɛDaray ya so te hap itsanga ɛlɔ ɛbhɛ gha. Sɛ ne kyi yɔng yaa lok neyi nge na daa ne hap itsanga yɛdee wo, nzɛ ne phok iyɛnɛng, n da bok irway ihwala nɛ nyinɛn no gbik.

iRooma 8:19

Gbik nikɔn na ne kɛ ryɔng ngo i has irway nibhɛ hyep ɛli ne ɛTaanggbey ya yaa tɔɔrek ninɔn ɛbhɛ na wɛsɛrɛk ɛzay ya.

2 iKɔrɔntos 10:8

Wu nggɛ hal ɛgyɛy ya daa ne ihwet da ne ɛDaray ya kɛ nang njwii wu te byinɛ nyini nɛ wo i sang kyii tobhos nyini nɛ wo, sɔng iphɛ ne so ɛkɔn ne ncwa nang.

2 iKɔrɔntos 4:10

iZenge ne ihwɛlɛ, njwi so ɛnu ne iku te ɛYɛso gha, te sɛ yaang ihywee ne ishwɛɛ ɛYɛso da ndɔ ne ibek mos de ne iphɛ so idee ne ku de.

1 iKɔrɔntos 7:34

ɛlɛy ne ihywɛɛ ɛbhɛ de kɛ ne hosop bhe ɛphaa. ɛKuk ka ne ɛ sang ɛras sa, hang ɛlyilyap yɔɔ, ɛɛ ne ma kyii ne ihywɛɛ ɛbhɛ de daa nikɔn ɛDaray ya ɛli ne aa tek ibek ɛbhɛ ne ikabyik ɛbhɛ daa ɛDaray ya. ɛKuk ka ne ɛ bok ɛras nang ɛ ne nang ihywɛɛ ɛbhɛ de daa nikɔn ɛzay te ɛ̀ras sa phok iyɛnɛng.

iRooma 5:5

Sɔng iyɛk ne irway da yaa ne te buu nang, daa ɛli ne ɛTaanggbey ya kɛ sit ishwim ɛbhɛ da ndɔ ne irway njwɛɛn da lenɛ ne iKabyik ɛTaanggbey de ne ɛTaanggbey ya kɛ nang njwɛɛn.

iKɔlɔsi 1:24

ɛlyilyɛghaa wo, ne n bok irway ihwala ɛlɔ ne nggbang ngga ne nzi sɔ ɛlɔ mon no. Daa ɛli ne yaa lenɛ ne nggbang ngɛdaa wo n shwaak ɛkɔn na ne ɛ kɛ mak ndɔ ne nggbang ngga ne ɛKiriti gha kaa sɔ ɛlɔ idira ninaa ne roos de nɛ nibhɛ soye ibek ɛbhɛ de.

iRooma 12:1

iPhɛ ɛlɛy nigwaa en, daa ɛli ne ɛTaanggbey ya kɛ san iyɔm mon de gbom mo, nzi ne roro ne nyinɛn gbom: nang ɛn ɛTaanggbey yegha ibek mon gbik, te ɛkɔn ne kɛ hap ɛbhɛ ne itsanga, ɛ so ɛken, kɛ tul kang, ɛ kɛ jam ɛbhɛ. ɛNggyɛ wo ɛbhɛ so re ntsong ne itin da ne aa nang ɛbhɛ wo.

iFilibi 1:14

iGanke da ne kɛ gangke me wo kɛ te nigwaa na gbom ndɔ ɛDaray ya hante ne irway nviit, nibhɛ tɔng ibol ɛTaanggbey de wɛlɛng ɛnik.

2 iKɔrɔntos 7:14

Ɛli ne nggɛ tɔng ɛbhɛ wu nzi hal ɛgyɛy ya ne nyinɛn no, sɔng nggɛ ne sɔ ncwa nang. Ɛli ne gbik ɛkɔn na ne njwi kɛ tɔng nyini wo ɛ so itin nɛ wo, ɛlɛy ne hal ɛgyɛy mos da daa mon no kɛ ma teye itin nɛ ɛnu ɛyisɛ ɛTitus sa.

2 iKɔrɔntos 5:15

ɛKiriti gha kɛ ne ku ɛlɔ ninyi na gbik, te gbik ninaa nɛ nibhɛ bok iken de, sɔng nibhɛ tɔ shɛɛ ishwɛɛ ne ito nibhɛ nang, tɛ nibhɛ yang yaa shɛɛ ishwɛɛ ɛKiriti da ne ɛ kɛ ku ɛlɔ nibhɛ gha kyii ta yiisik ɛbhɛ ɛlɔ nibhɛ gha.

1 iKɔrɔntos 15:31

Nigwaa en, nzi wɛɛ iku izenge ne ihwɛlɛ! ɛGyɛy ne nzi ne hal ne nyinɛn gbik ne ishwɛɛ njwɛɛn tɛ nidaan nɛ ndɔ ɛYɛso ɛKiriti ne ɛ so ɛDaray njwɛɛn, iphɛ phɛ kɛ te nzi mɔn ɛlɛ wo.

iRooma 9:33

Te ɛli ne kɛ ku haa i bo, “Yaang ɛn, nggɛ see ikɛɛ ndɔ ne iSihiyɔɔna, ikɛɛ ne phɛ yɛɛs ne ikyibhɛ. ɛPhang ngo yaa ne te ninyi gbom nibhɛ hoghɛse. Gbik ɛhiha ɛnyi, ne ɛ kɛ ne nang ne itin nɛ ne ɛbhɛ sɔng aa ne sɔ ncwa nang.”

iRooma 6:19

Nzi bol ne nyinɛn te ɛli ne ɛten ɛsii i bol, daa ɛli ne ɛ so ɛn niten nisii, icwas mon da kɛ ne taasek. Ne ile de ɛ kaa nang ɛn nilɔ ne ibek mon na nibhɛ teye nikpuru nikɔn ne ishis gbik ne ibebhe ne iphɛ hanas se nɛ. ɛLyilyɛghaa wo, iphɛ ne so nggbinggbing, ɛ nang nilɔ ne ibek mon na nibhɛ teye nikpuru nitomɛ nicik, nɛ nibhɛ te ɛ shɛɛ iwɛwɛy.

iRooma 6:13

Sɔng ɛ nang ɛn nilɔ ne ibek mon na ndɔ ne ɛfɔt to nibhɛ teye nikɔn ne mɔn ibebhe de nang. Yang nang ɛn ɛTaanggbey yegha ito mon gbik tɛ ninyi ne kɛ tul nibhɛ ndɔ ne iku i phɛ nɛ ndɔ ne iken. Nang ɛn ɛTaanggbey ye nilɔ ne ibek mon na tɛ nibhɛ teye nikɔn nitomɛ nicik.

ɛTomɛ 21:13

ɛBulus sa ne kyii nɛ ne ɛ yaak njwii, “iKyee iphɛ kɛ te ɛ san ɛn ɛ bees ɛn mɛɛn irway daa? Nzi tɔng nyini nggɛ ku yɛk ne irway yɛ, sɔng ma yung yɔng wu irop ne yaa bhɛ rop me ne iYɛrushɛlɛm be zɔng nang, te ma yung yɔng yaa bhɛ phoo me daa ne ibol ne nang irywɛɛk ɛDaray ɛYɛso wo ne ndiinday.”

ɛTomɛ 20:24

Gbik ne iphɛ ɛlɛy, sɔng nggɛ ne bo iken nge ɛnu ɛkɔn nang wu naa yang yɛɛ ne taal ɛtomɛ gha ne ɛDaray ɛYɛso gha kɛ yɛk me nɛ wo, ɛtomɛ ne tɔng ninyi na ibol iyɛnɛng ne izɛɛng ɛTaanggbey de.

ɛYohana 21:19

ɛYɛso gha kɛ boote ɛlɛ wo te ɛ tɔɔrek ihywee ne iku de ne ɛSimɔn na sɛ ku te iphɛ tɔɔl ito-ndiinday ɛTaanggbey. ɛYɛso gha ne ji yaak ɛSimɔn negha, “Roos me!”

ɛTomɛ 4:31

Kɛ ne sɛ nibhɛ kɛ roo wo, ɛlɔ gha nɛ nibhɛ sonɛ wo ne sunkit. Ne ji yɛk nibhɛ ne iKabyik ɛTaanggbey de hyɔrɔ nibhɛ ne ji yaa tɔng ibol ɛTaanggbey de tang ɛnik.

2 iKɔrɔntos 3:12

Daa ɛli njwɛɛn kɛ sit irwisɛ da daa ne ìtsɛm ihywas de, iphɛ kɛ ne te njwɛɛn tek irway njwɛɛn tɔrɔk.

2 iKɔrɔntos 7:4

Nggɛ cwaak nyini ndɔ ne irway gbom, nzi ne ta hal ɛgyɛy ne nyinɛn. Ɛ kɛ te ɛn mɛɛn itsɔngɔl gɛgɛy. Gbik ne nggbang ngga ne njwɛɛn i sɔ wo, sɔng irway ihwala nge da ne bok ɛgak nang.