Zacarías 13:7 - Biblia Enxet

⁷ Aptáhak Wesse' ekha nak apyennaqte s'e: “¡Sókwenaqte, katnemekxa néten, kay'ám ma'a keláneykha nepkések ahagkok tén han ma'a sepasmeykha nak chá'a sektamheykha! ¡Kaqha m'a keláneykha nepkések, keñe sa' yexpaqnek ma'a nepkések, keñe sa' ko'o aktamagkok ma'a nepkések apketkók nak!

Zacarías 13:7 ပူးပေါင်းရင်းမြစ်များ

Isaías 40:11

Máxa keláneykha nepkések aptáhak apkexyekmo apkeltaqmelchessól'a m'a nepkések apnaqtósso; apkelqeynánteyk ma'a nepkések apketkók, apkelpathetánteyk nahan, aptaqmelchásawók nahan chá'a apkeláneykha m'a kaxwe aptamhéyak nak apnaqláw'ák.

Ezequiel 37:24

Séláneykha David sa' etnehek wesse' apwányam tén han wánxa xama keláneykha nepkések apagkok ma'a apyókxoho nak, hélyahakxohok sa' nahan chá'a ko'o m'a, elanagkok sa' nahan chá'a m'a segánamakxa ahagkok nak tén han ma'a séltémókxa nak chá'a etnahagkok.

Zacarías 11:7

Keñe axta ko'o séláneyncha'a m'a nepkések apkelpagkanamap axta yaqwayam kólya'aksek ma'a aptekyómakxa. Axta seyásenneykha m'a ektáha axta chá'a apkelmá. Élmeyk axta nahan ánet yámet: ekteméssessek axta nahan ekwesey xama “Ektaqmalma Negha”, keñe axta m'a mók nak sekteméssesa ekwesey “Negyepetcheykekxa Egmók”.

Miqueas 5:2

Keñe exchep, Belén Efrata, apteme nak ketchetsek nepyeseksa m'a Judá apnámakkok, xép sa' yenyék etyapok xama wesse' apwányam apagkok Israel, aptáwen neptámen nak ma'a nanók énxet.”

Jeremías 47:6

¡Wesse' egegkok sókwenaqte apagkok! ¿Háxko sa' ekwánxa ekhem kalwataksek ekyetneykha ekyógkexma? ¡Kataxnekxa makham axagkok, kawanmeyekxa', wánxa katne!

Zacarías 11:4

Keso aptáhakxa exchek seyáneya Dios Wesse' ahagkok se'e: “Elanha sa' nepkések apkelpagkanamap nak yaqwayam kólya'aksek aptekyómakxa.

Miqueas 5:4

Yempekxak sa' néten ma'a wesse' apwányam yaqwayam sa' eltaqmelchesek ma'a énxet'ák apagkok, yetlo apmopwána, tén han apcheymákpoho eñama nak apmésso m'a Dios Wesse' apagkok, exmakha sa' meyke élya'ásekhaxma m'a, hakte kólteméssesek sa' apcheymákpoho Wesse' egegkok, ekweykmoho m'a néxa xapop nak.

Ezequiel 21:28

“Xép énxet, exén sa' ko'o sektáhakxa sekpeywa, eltennés sa' sektáha ko'o sélxéna m'a amonitas, apxéneykencha'a nak chá'a ekmaso m'a Israel, leyáxcheyk kaxwók axagkok ma'a sókwenaqte: penchásexcheyk yaqwayam kalnápok énxet, kélyenmáseykxeyk nahan yaqwayam kalyenmaksexma tén han kamasséssók ekyókxoho aqsok.

Isaías 9:6

Hakte apteyekmek xama sakcha'a negyeseksa, Dios segmésso xama apketche, cham'a peya sa' exkak apmopwána yaqwayam etnehek aptaqmelchesso apchókxa. Sa' nahan kólteméssesek apwesey s'e: Eyaqheykha kélwáxok aqsok apkelane, Dios apyennaqte, Egyáp Memassegwayam, Wesse' meyke ektáhakxa negha.

Salmos 2:2

Apyepetchákxeyk pók kelwesse'e apkelwányam tén han apkelámha apmonye'e nak keso náxop, apkelánegkokxeyk aptamhágkaxa apkenmexa m'a Wesse' egegkok, yetlo m'a wesse' apwányam ektáha axta apkelyéseykha Wesse' egegkok.

Zacarías 11:11

Cháxa ekhem ekmassésaxchexa axta m'a ekhémo mók nélpaqhetchásamáxkoho, keñe m'a apkelmá axta chá'a nepkések, séláneyncha'a axta ko'o, apkelya'ásegwokmo aptáha Wesse' egegkok ma'a appaqmeta nak eñama m'a ektáhakxa axta ko'o sélane aqsok.

Isaías 27:1

Elyetxák sa' sókwenaqte apagkok Wesse' egegkok yéwa ekwányam ekwesey nak Leviatán xa ekhem nak, cham'a sókwenaqte apagkok ekmahamta nak, tén han ekyawe, ekha nak ekyennaqte, yéwa ekwányam élyaqseykekxohol'a, yéwa ekwányam ekpexyaweykegkohol'a náxop kaxog, yaqhek sa' nahan ma'a yegmen askok ekyawe ekyetnama nak ma'a wátsam ekwányam.

Isaías 1:25

Añássesagkohok sa' ko'o makham wanmexek xép, alwatnések sa' ekyókxoho aqsok apák apagkok; amópessásekxak sa' ekyókxoho ekmanyása apyempehek.

Ezequiel 21:3

Sa' etnehek yának se'e: ‘Keso aptáhakxa exchek appeywa Wesse' egegkok se'e: Sénmexma ko'o ektáhak xép. Alkok sa' ko'o sókwenaqte ahagkok, alnápok sa' ma'a énxet'ák apkelpéwomo nak tén han ma'a melya'assáxma nak.