Zacarías 10:2 - Biblia Enxet2 Aqsok kéláyókxa élpeywa ekteme ekmowána amya'a, wanchek nahan chá'a amya'a apkelxeyenma nak chá'a apkelwete aqsok ma'a énxet'ák ekha nak apmopwancha'a. Mékoho agko' ma'a apkelxeyenma nak chá'a aqsok apkelwete apkelwanmagko, mehentaqmelchessásekxeyk egwáxok ma'a apkelpeywa. Cháxa keñamak apkelweynchámeykencha'a nak aqsa m'a énxet'ák, aptémól'a m'a nepkések, apkellegeykegkohol'a meyke xama m'a ektáha nak apkeltaqmelchesso. အခန်းကိုကြည့်ပါ။ |
Magwohok ko'o katyapok aqsok apkelxeyenma m'a apkellegasso nak chá'a amya'a apkelmopwancha'a amya'a; malya'ássesagkek chá'a ko'o aqsok ma'a apkelya'áseykegkoho nak chá'a aqsok ekpowasamáxche'. Wánhok nahan chá'a ko'o kólátegmowagkokxak ma'a ekha nak chá'a apkelmopwancha'a, mékoho agko' nahan atnéssesek chá'a m'a ektémakxa nak apkelya'áseyak aqsok.
Mékoho apancha'awók ma'a apkelánéyak nak chá'a aqsok kéleykmássesso, momók ancha'awók nahan ma'a kéleykmássesso apkelánéyak nak chá'a, cham'a apkelmopmenyého apagko' nak chá'a. Meyke apaqta'ák nahan ma'a ektáha nak chá'a apkelpeykessamo, melya'ásegkok nahan aqsok, cháxa keñamak peya sa' elmegqágwakxohok ma'a.
Ekxénchek ko'o alenmexek xa apkelxeyenma nak chá'a apkellegasso sekpeywa, apkelxeyenma nak chá'a apkelwanmagko ekmowána amya'a; apkeltémo nak chá'a elyetnakhássók énxet'ák ahagkok eñama apkelmopwancha'a amya'a, tén han apkelpaqméteykha naqsa. Malapháseykha ko'o, magkéssók han sekpeywa xama enxoho séltémókxa etnahagkok, mopwanchek epasmok énxet'ák ma'a. Ko'o sekxeyenma xa, sektáha nak Wesse'.
“Nágkólyahakxa aqsa chá'a kéxegke apkelpeywa xa apkelxeyenma nak chá'a apkellegasso sekpeywa, tén han apkelxeyenma nak chá'a apkelya'áseykegkoho aqsok ekpowásamáxche', tén han apkelpékáseykekxa nak chá'a ektémakxa kélwanmagko, tén han ma'a kelyohóxma'a apkelxeyenma nak chá'a apkelya'áseykegkoho yaqwánxa katnehek egmonye', tén han apkeltémo nak chá'a megkólmésaxcheyk ma'a wesse' apwányam Babilonia.
Ektáhak ko'o séláneya kéxegke seyésa, ko'o sektáha nak Wesse' ekha apyennaqte, Dios apagkok nak Israel: Nágkólho elyexanchesha m'a apkelxeyenma nak chá'a aptamhéyak apkellegasso sekpeywa, tén han ma'a apkelxeyenma nak chá'a apkelya'áseykegkoho aqsok ekpowásamáxche', apheykha nak kélnepyeseksa kéxegke; nágkóleyxho m'a ektémakxa nak chá'a apkelxeyenma apkelwete apkelwanmagko.
Wanchek amya'a m'a aptémakxa nak chá'a apkeltennasso aqsok apkelwete m'a apkelánémap axta chá'a etnahagkok apkellegasso Dios appeywa. Meltennassók ekmasagko ektémakxa yaqwayam enxoho eyaqmagkassesek ma'a ektémakxa nak; apkeltennáseykha chá'a m'a aqsok apkelwete ekmowána amya'a nak, naqsók han chá'a teméssessók.
Naqsók ko'o sektáha sekxéna s'e, sektáha nak Wesse' mamassegwayam: Kelmeñexchek nepkések seknaqtósso m'a ekyókxoho mók ektémakxa nak chá'a aqsok nawha'ák éllo, tókagkek nahan, hakte méko m'a éláneykha. Melxegák elchetmok nepkések ma'a keláneykha nepkések ahagkok. Apkeltaqmelchásamákpekxoho apancha'awók aqsa aptamheykegkok ma'a keláneykha nepkések nak, meláneykha m'a nepkések seknaqtósso.
Ahóxek sa' katnehek meyke wesse' apwányam apagkok ma'a israelitas, tén han meyke apkemha apmonye' apagkok, keñe han meyke apkelnapma chá'a aqsok apnaqtósso, tén han meteymog élpagkanamaxche', tén han meyke apkelnaqta apkelmeykegko nak chá'a apkelmaxnéssesso Dios énxet'ák apagkok, tén han kéleykmássesso étkók ma'a apxanák nak.