Sofonías 3:14 - Biblia Enxet

¹⁴ ¡Kólmeneykmés kélheykha nak tegma apwányam Sión! ¡Kólwónches ekpayheykekxa kélwáxok, énxet'ák Israel! ¡Énxet'ák Jerusalén, kalpayhekxa kélwáxok, kalpayhekxoho agko' kélwáxok!

Sofonías 3:14 ပူးပေါင်းရင်းမြစ်များ

Nehemías 12:43

Kélnapchek axta han ekxámokma aqsok kélnaqtósso xa ekhem nak, kelpayhekxeyk agko' axta apkelwáxok ma'a énxet'ák, hakte Dios axta apkelpeykessásekxak apkelwáxok. Kelpayhekxeyk agko' axta han awáxok ma'a kelán'ák, tén han sakcha'a létkók, legáxkók axta makhawók apkelátseykha énxet'ák ma'a Jerusalén.

Salmos 14:7

¡Émenye' nak la'a ko'o kawak nélwagkásamáxche teyp ma'a Israel, eñama m'a Sión! Apyaqmagkassessek sa' agkok mók Wesse' egegkok ektémakxa apheykha m'a énxet'ák apagkok nak, kalpayhekxak sa' apkelwáxok ma'a Jacob aptawán'ák neptámen, cham'a apyókxoho énxet'ák nak Israel.

Salmos 149:2

Israelitas, kalpayhekxa kélwáxok, kélteme nak énxet'ák Sión, hakte Dios apteme apkelane kéxegke, tén han Wesse' apwányam kélagkok.

Salmos 97:8

Oh Wesse', kelpayhekxeyk agko' apkelwáxok ma'a apheykha nak Sión, tén han ma'a tegma apkelyawe nak Judá, eñama m'a apkeltémókxa nak chá'a etnahagkok;

Isaías 12:6

Kólwehesha yetlo ekpayheykekxa kélwáxok, kélheykha nak Sión, hakte apheyk kélnepyeseksa kéxegke m'a Dios Aptaqmalma apagkok nak ma'a Israel, yetlo ekyawe apcheymákpoho.”

Isaías 29:19

Elpeykessásekxak sa' makham apkelwáxok Wesse' egegkok ma'a énxet'ák apmopyóseka nak, kalpayhekxak sa' apkelwáxok xamók Dios aptaqmalma nak Israel ma'a énxet'ák meyke agko' nak aqsok apagkok.

Isaías 35:2

kalántekkásekxa makham ma'a pánaqte exnók ektémól'a m'a pánaqte exnók élyápaqmate éltaqmalmal'a, kalpayhekxoho agko' kélwáxok. Dios sa' etnéssesek ektaqmalma agko' ektéma nak ma'a Líbano, tén han megkéssamakxa katyapok aqsok ektéma nak ma'a Carmelo tén han ma'a ekyapwátegweykenxa nak xapop ma'a Sarón. Apyókxoho énxet sa' elwetak Wesse' egegkok élseyéxma apagkok tén han ma'a Dios egagkok apcheymákpoho nak.

Isaías 37:22

Keso aptáhakxa exchek appeywa Wesse' egegkok apxéna m'a wesse' apwányam Asiria: “Senaquerib, máxa kelán'a étkok entáhak ésmésa exchep ma'a Sión. Yeykáseyha akqátek neptámen ekwanyawo aptaqháwo m'a Jerusalén.

Isaías 40:1

Aptáhak Dios kélagkok nak kéxegke s'e: “Kóltaqmelchessásekxa apkelwáxok énxet'ák ahagkok, kóltaqmelchessásekxa';

Isaías 40:9

Yenát sa' egkexe néten nak Sión, énnaqtés sa' appeywa exének amya'a ektaqmela. Nágye aqsa énnaqtések appeywa m'a Jerusalén, etne sa' ellegaksek tegma apkelyawe nak Judá s'e: “¡Keso Dios kélagkok se'e!”

Isaías 51:11

Sa' etnahagkok han elwaták ma'a apkelwagkasso nak teyp ma'a Wesse' egegkok, elántexek sa' Sión yetlo apkelwehéseykha élpayheykekxa apkelwáxok; katnahagkok sa' chá'a élátseykha nápaqta'a; elwetak sa' élpayheykekxa apkelwáxok tén han apkeleñémo, kamassegwók sa' ma'a ektémakxa nak apkellekxagweykha tén han apkellegeykegkoho ekmáske.

Isaías 52:9

¡Kólwehesha ekyennaqte agko' kólátsaha, kélheykha nak Jerusalén tegma apwányam kéltawáseykha nak, hakte apkelásekhákxók Wesse' egegkok ma'a énxet'ák apagkok, apwagkassek teyp ma'a Jerusalén!

Isaías 54:1

Kelán'a megkate étche meyke nak chá'a étchek; kalpáxamha kapayhekxak awáxok; nágkeysagkoho kanneykmaksek negmeneykmasso yetlo ekmátsa awáxok, xeye' kelán'a, megkatné nak chá'a naqláwa xama enxoho, hakte aptáhak Wesse' egegkok se'e: “Xámók sa' katnehek étchek ma'a kelán'a ektaqmópeyak nak chá'a megkaxók sa' ma'a kelán'a apha nak chá'a atáwa'.”

Jeremías 30:19

Sa' kañék katyapok negmeneykmasso negmésso nak ekxeyenma egwáxok Wesse' egegkok ma'a, tén han néktegmeykha ekpayheykekxa egwáxok. Metnekxeyk sa' apqántawo', hakte ko'o sa' axámasagkok. Megkólwanyaha sa' nahan, hakte ko'o sa' atnéssesek ekha kéláyo.

Jeremías 31:13

Kaneywagkok sa' yetlo élpayheykekxa awáxok kelán'a étkók, tén han wokma'ák, ekweykekxoho apkelwányamo nak. Altaqmelchessásekxak sa' awáxok: élpayheykekxa awáxok sa' ayaqmagkassesek ma'a éllekxagweykha, ayeykhássessamhok sa' ko'o sekmésso élpayheykekxa awáxok, megkaxók sa' ma'a ekweykenxa nak éllekxagweykha.

Jeremías 33:11

kélmeneykmasso kélessawássessamo, tén han ekpayheykekxa egwáxok, tén han kélmeneykmássesso nak élyamhopma. Kañexchek sa' makham katnehek se'e: Kólmés ekxeyenma kélwáxok Wesse' ekha nak apyennaqte, hakte Wesse' egegkok apteme ektaqmalma apwáxok, megkamassegwomek chá'a segásekhayo. Elsanták sa' aqsok apkelmésso naqsa m'a tegma appagkanamap apkelmésso nak chá'a élxeyenma apkelwáxok. Naqso', ayaqmagkassesek sa' ko'o mók ektémakxa s'e apchókxa nak, yaqwayam sa' katnekxak makham ma'a ektémakxa axta nano'. Ko'o sekxeyenma xa, sektáha nak Wesse'.”

Joel 2:23

¡Kalpayhekxa kélwáxok, kéxegke kélheykha nak Sión, kalpayhekxa kélwáxok eñama m'a Dios Wesse' kélagkok! Apméssek kéxegke ekmámeye ekweyktamxal'a chá'a, cham'a ekmámeye ekweyktámhol'a chá'a apmopsamágekxa nak, tén han ma'a élyapweykxal'a, aptémakxa axta chá'a m'a nanók axta.

Miqueas 4:8

Keñe sa' xép, tegma apwányam Jerusalén, tegma apwenaqte tén han apyennaqte nak Sión, xép sa' etnekxak makham tegma apwányam apagkok ma'a apchókxa, ekhawo aptémakxa axta chá'a m'a nanók axta, apheykegkaxa axta apkelwesse'e apkelwányam.”