Sofonías 2:8 - Biblia Enxet

^8-9 Keso aptáhakxa nak appeywa Wesse' ekha apyennaqte, Dios apagkok nak Israel: “Eklegayak ko'o sexéneykha ekmaso m'a moabitas tén han setaqnagko m'a amonitas. Hakte apkelxéneykha chá'a ekmaso m'a énxet'ák ahagkok nak, apkelyennaqteyásamákpok han chá'a apkelyementamoma m'a xapop apagkok nak. Cháxa keñamak sekxéna nak ko'o naqsók peya katnehek Moab ma'a ektémakxa axta m'a Sodoma keñe sa' Amón katnehek ma'a ektémakxa axta Gomorra, émhakxa am'ák sa' katnekxa', tén han ekyetnamakxa yásek, meyke aqsok meyke néxa sa' katnekxa'. Elmagkok sa' aqsok apagkok ma'a énxet'ák ahagkok apkeleymomap nak meletsapma, emok sa' han ma'a xapop apagkok nak.”

Sofonías 2:8 ပူးပေါင်းရင်းမြစ်များ

Génesis 19:37

Wet'ak axta étche apkenna m'a katnaha étkok nak, Moab axta han temessásak apwesey, cháxa aptáha nak apyapmeyk nanók ma'a kaxwe apkelánteyapma nak Moabitas.

Génesis 19:38

Wet'ak axta han étche apkenna m'a sexyo nak, Ben-amí axta temessásak apwesey, cháxa ektáha nak apyapmeyk nanók ma'a kaxwe apkelánteyapma nak amonitas.

Isaías 15:1

Moab ekxénamaxche yaqwánxa kólteméssesek. Kéltawáseyha axta Moab cham'a axta'a kélmasséssekmo axta m'a Ar; kéltawáseyha axta Moab cham'a axta'a kélmasséssekmo axta tegma apwányam Quir.

Isaías 16:6

Negya'ásegkók ektémakxa nak ekyawe apkeleymákpoho m'a énxet'ák Moab: éleymáxkoho apkelwáxok, apkene etnahágkok néten kéláyo, meleysso eleykpoho' tén han apkelpaqméteykha naqsa ekteme nak mékoho.

Jeremías 12:14

Aptáhak Wesse' egegkok apkelxéna énxet'ák élmasagcha'a nak apkeltémakxa, apheykencha'a nak neyáwa Israel, aptawassáseykencha'a nak xapop apmeyáseykekxa axta m'a énxet'ák apagkok Israel: “Alántekkesek sa' ko'o apheykegkaxa nak xapop apagkok xa, keñe sa' alántekkesek énxet'ák Judá m'a nepyeseksa nak.

Jeremías 48:1

Wesse' ekha apyennaqte appeywa, Dios apagkok nak Israel, apxeyenma m'a Moab: “¡Kélyósekak eyke ekhel'a kélheykha nak Nebo kélmasséssekmek kélókxa! ¡Apmákpek Quiriataim, mékoho kéltemessáseykxa'! ¡Kélyaqnegkessessek náxop ma'a tegma apyennaqte kélagkok!

Jeremías 49:1

Aptáhak Wesse' egegkok apkelxéna énxet'ák Amón se'e: “¿Háxko apkelmahágkaxa énxet'ák Israel? ¿Háxko apkelmahágkaxa m'a yaqwayam nak elxewekxak xapop énxet'ák kélagkok? ¿Yaqsa ektéma apmeykekxo nak Gad ma'a énxet'ák apkelpeykessamo nak chá'a aqsok kéláyókxa Milcom? ¿Yaqsa ektéma apheykencha'a amonitas ma'a tegma apkelyawe kélagkok nak?

Lamentaciones 3:61

Wesse', yeyxho ektémakxa sélenmexeykha, tén han ekyókxoho kélláneykekxa kéltáhakxa ekmáheyókxa hélteméssesek;

Ezequiel 21:28

“Xép énxet, exén sa' ko'o sektáhakxa sekpeywa, eltennés sa' sektáha ko'o sélxéna m'a amonitas, apxéneykencha'a nak chá'a ekmaso m'a Israel, leyáxcheyk kaxwók axagkok ma'a sókwenaqte: penchásexcheyk yaqwayam kalnápok énxet, kélyenmáseykxeyk nahan yaqwayam kalyenmaksexma tén han kamasséssók ekyókxoho aqsok.

Ezequiel 25:1

Epaqhetchessek axta ko'o Wesse' egegkok, aptáhak axta seyáneya s'e:

Ezequiel 35:12

Keñe sa' kay'ásegwók, seklegaya ko'o ekyókxoho m'a ektémakxa nak chá'a élxéneykha ekmaso m'a egkexe élekhahéyak nak Israel, ko'o sektáha nak Wesse'. Axta katnehek chá'a exche' kalxének se'e: ¡Yókxexma meykexa énxet kaxwók xa; egwanchek kaxwók agmok!

Ezequiel 36:2

Ektáhak ko'o sekpeywa s'e sektáha nak Wesse': Apkeneykek kaxwók apagkok Israel apkelenmexma m'a meteymog élekhahéyak megkamassegwayam nak.

Amós 1:13

Aptáhak Wesse' egegkok se'e: “Xámók agko' apkeláneyak apkeltémakxa ekmaso m'a énxet'ák Amón, megkatnehek sa' mallegassáseykegkoho; hakte apkelpáxqatcháseykegkek axta awokma'ák kelán'ák lós'awo', ekheykha nak Galaad, apmáheyo eyánchesagkok ma'a xapop apagkok.

Amós 2:1

Aptáhak Wesse' egegkok se'e: “Xámók agko' apkeláneyak apkeltémakxa ekmaso m'a énxet'ák Moab, megkatnehek sa' mallegassáseykegkoho; hakte apkelwatneykekxeyk apexchakkok ma'a wesse' apwányam Edom, ekwokmoho ektamhákxo táhap.

Sofonías 2:10

Cháxa yaqwánxa sa' katnehek apkelxawéyak ekyaqmageykekxa apkeltémakxa m'a énxet'ák Moab tén han ma'a Amón, eñama apkelxéneykha ekmaso m'a Wesse' egegkok énxet'ák apagkok, tén han eñama apkelyennaqteyásamákpoho apkelyementaméyak chá'a xapop apagkok ma'a Wesse' ekha nak apyennaqte énxet'ák apagkok.

Josué 5:9

Keñe axta Wesse' egegkok aptáha apcháneya Josué: “Cháxa kélyenyekhássesso nak nekha apyempe'ék, sakhem sekmassésa ko'o kaxwók kélmegqakto m'a nepyeseksa nak énxet'ák Egipto, cham'a aqsok segmegqassamo nak.” Cháxa keñamak ektéma nak makham ekwesey Guilgal xa yókxexma nak.