Sofonías 2:7 - Biblia Enxet

⁷ Énxet'ák Judá sa' emekxak xa apchókxa nak, cham'a apkeleymomap nak meletsapma, apwa'akto sa' epásegwaták ma'a Dios Wesse' apagkok, apyaqmagkassesa sa' mók ma'a ektémakxa nak apheykha. Sa' elanha apnaqtósso nepkések ma'a, keñe sa' axta'a ellókassekxak chá'a apkelyampe m'a tegma apheykegko nak Ascalón.

Sofonías 2:7 ပူးပေါင်းရင်းမြစ်များ

Génesis 50:24

Tén axta José aptáha apkeláneya apkelpepma s'e: “Ketók ko'o kaxwók sétsapmakxa', Dios sa' eyke epasmok kéxegke, elántekkesek sa' se'e apchókxa nak, yaqwayam enaqlakxak ma'a xapop apkeltennassamakxa axta Abraham, Isaac, tén han Jacob.”

Salmos 80:14

Dios ekha nak apyennaqte, hegyo'óta makham negko'o; etaqmelchesho apkenmexeykentámho neghágkaxa ekpayho nak ma'a néten, kaxén makham apwáxok se'e anmen yámet nak,

Salmos 85:1

Wesse', tásek xép apteméssessamakxa s'e apchókxa nak; aptaqmelchessásekxeyk makham apheykha m'a Jacob énxet'ák apagkok;

Éxodo 4:31

Tén axta m'a énxet'ák nak maxta elya'ássekmok. Xama axta apkelya'ásegwokmo apkeláneykencha'a Wesse' egegkok tén han apweteya ektémakxa apkellegeykegkoho. Apkelháxahánteyk axta apkeltekxeyágko aptapnák xapop apkelpeykásawo.

Isaías 11:11

Exekmósek sa' makham apmopwána Wesse' egegkok apmako sa' enaqlanták makham énxet'ák apagkok apkeleymomap xa ekhem nak, apnaqlósawákxo sa' makham ma'a Asiria, Egipto, Patros, Etiopía, Elam, Sinar, Hamat tén han ma'a apkelókxa ekhéyak nak neyáwa wátsam ekwányam.

Isaías 11:14

Épetchekxak sa' pók ektamagkok ma'a énxet'ák filisteos, ekpayho nak taxnegwánxa ekhem, neptámen sa' yeñék yáhapwók; épetchekxak sa' pók elyementamagkok aqsok apagkok ekxámokma m'a énxet'ák apheykha nak teyapmakxa ekhem. Kawomhok sa' nahan apteme apagkok ma'a yókxexma Edom tén han ma'a Moab, apkeláneykha sa' etnahagkok ma'a amonitas.

Isaías 11:16

Apkelchexyekmek sa' agkok makham apkelenyékta' Asiria xa apkeleymomap nak Wesse' egegkok énxet'ák apagkok, elwetak sa' ekyawe agko' ámay, ektéma axta m'a énxet'ák Israel apkelánteyapma axta m'a Egipto.

Isaías 14:1

Yepyóshok sa' elanok Wesse' egegkok ma'a Jacob. Apkelyéseykha sa' etnekxak makham ma'a Israel, yának sa' elhakxak makham israelitas ma'a xapop apagkok nak. Elyepetchegwak sa' nahan ma'a megkatnaha nak apkelókxa xamo', epaxqeykxak sa' ma'a Jacob énxet'ák apagkok.

Isaías 32:14

Etaqmopagkok sa' ma'a tegma apyawe aptaqmalma nak; meyke xama aqsok sa' katnekxak ma'a tegma apwányam, apheykegkaxa nak apxámokma énxet; kataqmopagkohok agko' sa' ma'a kélhaxtegkesso ekyennaqte nak nepyáwa; kalkohok sa' awáxok kallawha yámelyeheykok nawha'ák ma'a, katawagkok sa' nahan pa'at kélnaqtósso m'a.

Jeremías 23:3

Ko'o ahagko' sa' nahan anaqlanták apkeleymomap nak nepkések seknaqtósso apkeleñama m'a apkelókxa sélya'assamakxa axta sekmenxenma, wánchásekxak sa', keñe sa' alya'ásenták makham ma'a apteykegkaxa axta chá'a pa'at, yaqwayam sa' exámekxak makham apketkók.

Jeremías 29:10

“Aptáhak Wesse' egegkok se'e: ‘Wokmek sa' agkok setenta apyeyam ma'a Babilonia, kaxénekxak sa' ko'o makham ewáxok kéxegke, alának sa' ma'a aqsok sekxeyenma axta alána', wának sa' kólchexyók makham se'e yókxexma nak.

Jeremías 29:14

Naqso', wohok sa' chá'a ko'o hélwetekxak kéxegke, ayaqmagkassesek mók ektémakxa kélheykha: alántekkessekxak sa' chá'a m'a ekyókxoho apheykegkaxa nak chá'a pók aptémakxa énxet'ák, tén han ma'a ekyókxoho yókxexma sélya'assamakxa axta chá'a séxpánchessama, wánchásekxak sa', wának sa' kólchexyók makham se'e yókxexma, sélántekkessamakxa axta. Ko'o sekxeyenma xa, sektáha nak Wesse'.’

Jeremías 3:18

“Wokmek sa' agkok xa ekhem nak, keypetchekxak sa' Judá m'a Israel, kataqhohok sa' makham xamo' ma'a apchókxa ekpayho nak nexcheyha, cham'a xapop sekpekkencháseykekxa axta ko'o m'a kélyapmeyk nano' axta kéxegke.

Jeremías 30:3

hakte xegakmek ekhem yaqwánxa sa' ko'o ayaqmagkassesek mók ektémakxa nak apheykha m'a énxet'ák ahagkok Israel tén han ma'a Judá. Ko'o sekxeyenma xa, sektáha nak Wesse'. Wának sa' ko'o elmeyenták makham ma'a xapop sekméssamakxa axta yaqwayam etnehek apagkok ma'a apyapmeyk nano' axta.”

Jeremías 31:7

Aptáhak Wesse' egegkok se'e: “Kólmeneykmásses ekmátsa tén han élpayheykekxa kélwáxok ma'a Jacob énxet'ák apagkok, aptamhéyak nak apkelámha apmonye' nepyeseksa m'a apyókxoho énxet'ák. Kóleyxchesho kélmeneykmasso, sa' kóltéhek se'e: ‘Apkelwagkassek teyp énxet'ák apagkok Wesse' egegkok, apkeleymomap axta m'a Israel.’

Jeremías 32:44

Kólmekxak sa', kóltáxeyásekxak sa' makham ekxeyenma nak kélyamasma aqsok, yetlo kélyennaqtésso kélpextete, tén han apnaqtáxéseyak apkelwesey m'a apkelweteykegkoho nak. Sa' katnehek Benjamín nak xapop apagkok xa, nepyáwa nak ma'a Jerusalén, tén han ma'a tegma apkelyawe nak Judá, cham'a élámhakxa nak meteymog élwenaqte, tén han ma'a ekpayhegweykenxa nak xapop, tén han ma'a tegma apkelyawe nak Négueb, hakte wának sa' ko'o kayaqmagkasek mók ektémakxa apheykha. Ko'o sekxeyenma xa, sektáha nak Wesse'.”

Jeremías 33:12

Aptáhak Wesse' ekha apyennaqte s'e: “Keso apchókxa ektamheykekxo nak kaxwók meyke xama aqsok, meyke énxet, tén han aqsok kélnaqtósso, tén han ma'a apyókxoho tegma apkelyawe agkok nak, kaxnekxak sa' makham pa'at yaqwánxa sa' elagkok makham apnaqtósso nepkések ma'a keláneykha nepkések.

Jeremías 33:7

Ayaqmagkassesek sa' mók ektémakxa nak apheykha m'a énxet'ák Judá, tén han ma'a Israel, anaqxétekhasagkokxak sa' makham, yaqwayam sa' etnahagkokxak ma'a ektémakxa axta apheykha nano'.

Jeremías 47:5

Apkelmópésawók apkelyese m'a énxet'ák Gaza, apkelwanmeyágkek ma'a énxet'ák Ascalón. Kéxegke kéleymomáxche nak kélqántawo' nanók énxet'ák kélwenaqte, ¿háxko sa' ekwánxa ekhem kammok kélpexyekháseykha kélyempe'ék magkenatchesso éllapwámeyak?

Ezequiel 39:25

“Ekeso éñamakxa sektáha nak ko'o sekpeywa s'e sektáha nak Wesse': Kalepyóshok sa' ko'o kaxwók alanok apyókxoho m'a énxet'ák Israel, Jacob aptawán'ák neptámen nak. Wának sa' kayaqmagkasek mók ma'a ektémakxa nak chá'a, yaqwayam sa' wának ko'o etaqmelchesek ma'a sekwesey ektaqmalma nak.

Oseas 6:11

Keñe exchep Judá, ekpekkenchessek ekhem yaqwánxa añássesagkoho'. “Ekyókxoho sekmáheyo chá'a ayaqmagkassesek ektémakxa apheykha m'a Israel,

Abdías 1:19

Emok sa' israelitas apheykencha'a nak Négueb ma'a yókxexma egkexe élekhahéyak nak Esaú, keñe sa' ma'a apheykencha'a nak ekpayhegweykenxa xapop emok ma'a filisteos nak xapop apagkok. Elmok sa' han ma'a xapop nak Efraín, tén han ma'a Samaria, keñe sa' ma'a Benjamín énxet'ák apagkok emok ma'a yókxexma nak Galaad. Cháxa israelitas apxámokma kélnaqleykekxa axta megkatnahakxa apkelókxa, emok sa' cananeos xapop apagkok, ekweykmoho m'a Sarepta, tén han ma'a kélántekkesso axta Jerusalén, apheykencha'a nak Sefarad, emok sa' ma'a tegma apkelyawe nak Négueb.

Miqueas 2:12

Wánchásekxak sa' ko'o apyókxoho Jacob énxet'ák apagkok; ayekhámekxak sa' apqántawók apkeleymomap nak ma'a énxet'ák Israel. Wánchásekxak sa' aptémól'a nepkések yaqnekxak ma'a apxagkok aptémól'a nepkések yaqnekxak ma'a yókxexma ektaqmelakxa nak pa'at, énnegkesek sa' exma eñama apxámokma.

Miqueas 4:10

Epexyawha, kapayheykha apátog tegma apwányam Sión, ektémól'a kelán'a káskok awáxok, kamáwhok katnehek naqláwa, hakte elántépok sa' xép énxet'ák apagkok aphakxa, elhók sa' ma'a yókxexma eyáxñe nak, elwakxohok sa' ma'a Babilonia. Elántekkesekxak sa' eyke Wesse' egegkok énxet'ák apagkok ma'a; elwagkasek sa' teyp nepyeseksa m'a apkelenmexma.

Sofonías 3:13

Melanagkek sa' aqsok megkapéwomo m'a énxet'ák Israel apkeleymomap nak meletsapma, metnahagkek sa' han chá'a apkelmopwancha'a amya'a, melyexanchesha sa' nahan chá'a pók. Apwanchek sa' etawagkok aptéyak tén han ellókasagkok apkelyampe meyke apkelaye xama aqsok enxoho.”

Sofonías 3:20

Anaqlanták sa' ko'o kéxegke xa ekhem nak, wánchásekxak sa'; wának sa' kayaqmagkasek mók ma'a ektémakxa nak kélheykha, ekha kéláyo sa' atnéssesek tén han kélya'áseykegkoho ekyókxoho yókxexma nepyeseksa m'a apyókxoho énxet'ák nak keso náxop. Ko'o sekxeyenma xa, sektáha nak Wesse'.”

Hageo 1:12

Apkekak axta Zorobabel, tén han Josué, tén han ma'a énxet'ák apkelleg'a aptáhakxa Wesse' egegkok apkeláneya eñama axta apchásenneykekxa m'a aplegasso nak appeywa Hageo, cham'a apkeltémo axta eltennaksek ma'a Dios Wesse' egegkok.

Hageo 2:2

axta apkeltamhók etnehek yának Zorobabel tén han Josué, tén han ma'a énxet'ák nak:

Rut 1:6

Xama ekhem axta leg'ak amya'a Noemí, neyseksa ekha m'a yókxexma Moab, apwákxo makham Wesse' egegkok ma'a eyókxa appasmeykxo makham, tén han apheyásekxo makham aptéyak ma'a énxet'ák.