Sofonías 1:16 - Biblia Enxet

¹⁶ ekhem kélpáwassamakxa kélaqkahasso tén han kélpáxameykha kélchetámeyak ma'a tegma apkelyawe apkelyennaqte nak tén han ma'a tegma apkelwenaqte apagkok nak.

Sofonías 1:16 ပူးပေါင်းရင်းမြစ်များ

Isaías 27:13

Kólpáwaksek sa' kélaqkahasso ekyennaqte ekpáwà xa ekhem nak, keñe sa' ma'a apkelxegánegwayam axta m'a Asiria, ekhawo nahan ma'a kélnaqleykekxa axta m'a Egipto, elmeyenták sa' Jerusalén elpeykessetámhok ma'a Wesse' egegkok, cham'a egkexe ekpagkanamaxchexa nak.

Isaías 32:14

Etaqmopagkok sa' ma'a tegma apyawe aptaqmalma nak; meyke xama aqsok sa' katnekxak ma'a tegma apwányam, apheykegkaxa nak apxámokma énxet; kataqmopagkohok agko' sa' ma'a kélhaxtegkesso ekyennaqte nak nepyáwa; kalkohok sa' awáxok kallawha yámelyeheykok nawha'ák ma'a, katawagkok sa' nahan pa'at kélnaqtósso m'a.

Isaías 59:10

Nélpaknameykha aqsa chá'a nélweynchámeykencha'a, máxa nentemék ma'a énxet meyke apaqta'ák apkelpaknameykhal'a nápakhaw'ék tegma, máxa meyke egaqta'ák nentamheykegkok; ólpelapmok aqsa chá'a ektáhakxoho yetseksók ekhem, máxa axta'a entemék; kalyéha'ak eykhe nahan egyempe'ék máxa néletsapma eyke nentemék.

Jeremías 6:1

¡Benjamín énxet'ák apagkok, kóltegyaha kélyexanmomakxa! ¡Kólántép Jerusalén! Kólpáwés kélaqkahasso m'a Tecoa, kólya'és néten xama aqsok magkenatchesso m'a Bet-haquérem, hakte nexcheyha peyk kañék kaxegmak ma'a nentekyawa tén han nenlegeykegkoho ekmaso agko'.

Jeremías 8:16

¡Apkelxegakmek sẽlenmexma! ¡Legáxkók kaxwók Dan apkelennama m'a yátnáxeg apkelchánte nak ma'a énxet'ák! Apkelpáweyk agkok ma'a, kayawheykha ekyókxoho xapop. Apkelxegakmek yaqwayam emasséssak negókxa, tén han ekyókxoho aqsok egagkok, ekweykekxoho m'a tegma apkelyawe yetlo énxet'ák apheykha m'a kañe'.”

Ezequiel 7:7

Wokmek kaxwók yaqwánxa kólmasséssók, kéxegke kélheykha nak apkelókxa. Wokmek kaxwo'; chágketwa'ak kaxwók ma'a ekhem yaqwánxa sa' katyapok wánxa m'a magya'áseyak nak nentáhakxa. Kamassegwók sa' ekpayheykekxa egwáxok ma'a neyseksa nak meteymog élekhahéyak.

Oseas 5:8

¡Kólpáwes sa' kélaqkahasso aqsok egkepetek ma'a Guibeá, kélpáwassamól'a chá'a kempakhakma, kólpáwes kélaqkahasso m'a Ramá! ¡kólána elanagkokxak aptamhágkaxa m'a Bet-avén! ¡Kólteméssesha sa' apkelwáxok ma'a énxet'ák Benjamín!

Oseas 8:1

“Epáwes apchaqkahasso, aptémól'a m'a énxet apkelhaxneykhal'a nepyeseksa Wesse' egegkok énxet'ák apagkok. Hakte meláneykegkok ekhémo mók nélpaqhetchásamáxkoho ahagkok, apkenmexeykekxeyk ma'a nélxekmowásamáxche ahagkok.

Joel 2:1

Kólpáwés kélaqkahasso m'a egkexe Sión; kólpáwés kélaqkahasso éltennasso nak énxet'ák ma'a Wesse' egegkok nak egkexe ekpagkanamaxchexa apagkok. Kólpexyennem kélaye kélyókxoho kélheykha nak Judá, hakte chágketwa'ak Wesse' egegkok ekhem apagkok:

Amós 3:6

páweyk agkok kélaqkahasso m'a tegma apwányam, énxet'ák akke kéltamhók kaltemeykha apkelwáxok; temégwokmók agkok exma ekmaso m'a tegma apwányam, Wesse' egegkok akke apcháphasso m'a.

Habacuc 3:6

Epexyennegkesek chá'a xapop ma'a apkenegwánxa enxoho; elpexyennók chá'a pók aptémakxa énxet'ák apkelano enxoho; kalyaqnenagkok chá'a m'a nanók egkexe nak, kalpayhekxak chá'a m'a nanók meteymog élwenaqte nak, megkamassegwomek eyke m'a Dios ámay apagkok.

Deuteronomio 28:52

“Ewakhekxak sa' ma'a apyókxoho tegma apkelyawe kélagkok keñe sa' ektamagkok, ekwokmoho apkelyaqnegkásegko m'a meteymog kélhaxta nak nepyáwa netna'awók agko' tén han kélhaxtegkesso nak ekyennaqte kélásenneykekxo nak chá'a; ewakhekxak sa', tén sa' ektamagkok ma'a apyókxoho tegma apkelyawe nak ma'a apchókxa apkelmésso axta m'a Dios Wesse' kélagkok.

Josué 6:20

Apkelwehéseyha axta énxet'ák tén han apkelpáwasa apkelmaxnéssesso Dios énxet'ák apagkok ma'a apkelaqkahasso. Xama axta apkelleg'a énxet'ák Israel élpáwa m'a apkelaqkahasso nak, keñe apkeleynawo apkelyennaqtéssawo apkelwehéseykha, yetlókok axta élyaqnenéyak ma'a kélhaxtegkesso nak nápakhaw'ék tegma apwányam. Apketámegkek axta ekpayhókxa nak apkelenmexma m'a tegma apwányam, tén axta apma.