21 Ná elwatés chá'a elanha; ¡epekken apwáxok!
Dios ahagkok, kalkohok chá'a ko'o ewáxok alának ma'a apmopmenyého nak xép; ¡ekpekkenmeyk ewáxok ma'a segánamakxa apagkok nak!
Hatte, elyahakxoho chá'a sektáhakxa enxoho sekpeywa; epekken apwáxok ma'a séltémókxa nak etnehek.
Kalkohok sa' apwáxok appekkena enxoho apwáxok, apwanchek sa' chá'a exénekxoho'.
Hatte, nágkalwánaqmágwom aqsa m'a ektémakxa nak sélxekmowáseyak; epekken apwáxok ma'a segánamakxa ahagkok nak,
Hatte, etaqmelches apmeykha m'a ektémakxa nak apyekpelchémo aqsok, nágyoho kagketek ma'a ektémakxa nak apmopwána apkeláneykegkoho aptémakxa,
Ná eyensem ektémakxa negásekhayo egmók tén han ekmámnaqso' agko'; eswoho chá'a apmahágkaxa enxoho, ektémól'a agkexnek egyespok ma'a nennatanma. Elqahés apwáxok,
Epekken chá'a apwáxok, emakhésha m'a apyespok;
Enaqtehet sa' ma'a apophék nak, epekken apwáxok.
Nágkalwagqamák chá'a m'a aqsok kélwete nak, nágkólyensem chá'a xama enxoho ekxéneykha kélwáxok; kóltennasha chá'a m'a kélketchek tén han ma'a kéltawán'ák.
