Proverbios 15:27 - Biblia Enxet

²⁷ Énxet ekyeykhágweykmoho nak apmopmenyého exámasagkok aqsok apagkok, enaqtawásekxohok apagkok chá'a m'a ekheykha nak apxagkok, keñe m'a aptaqhessamo nak selyaqye apxawe yaqwayam mexének ektemegweykmoho exma', eweynchamha sa' makham.

Proverbios 15:27 ပူးပေါင်းရင်းမြစ်များ

1 Reyes 2:40

yetlókok axta apkempeykekxa néten apkeltahanchesa yámelyeheykok apchánte, apxegkek axta apmahágko m'a Gat, aphakxa axta Aquís, apkelchetama m'a apkelásenneykha naqsa. Xama axta apwákxo makham Simí apkeñama m'a Gat yetlo apkelásenneykha naqsa,

2 Reyes 5:27

Xép sa' kaxwók katnehek xa negmasse ektepelchamaxche egyempehek ektéma axta m'a Naamán, ekweykekxoho m'a aptawán'ák neptámen meyke néxa. Xama axta apyenyékxo Guehazí m'a Eliseo, temék axta negmasse ektepelchamaxche egyempehek ekyentaxno agko', mópégkek axta, ektémól'a yeyam appok.

Salmos 15:5

tén han ma'a apmassáseykha nak chá'a pók selyaqye apagkok, meyke apkeltémo eyánmagkasagkok néten; tén han memà nak selyaqye exkak yáneykpok etwássesha apha m'a énxet meyke nak aptémakxa. Énxet apteme nak xa ektáha nak, metyemek sa' chá'a.

Éxodo 18:21

Elyésha sa' xép nepyeseksa énxet'ák ma'a énxet apmopwána nak aptamheykha, ekha nak apcháyo m'a Dios, tén han meyke nak apteme apmopwána amya'a, énxet megkóllekweykmoho nak chá'a exkágwók ma'a selyaqye ekmaso nak ektegyamaxche, tén sa' nahan egkések chá'a xama aptaqmelchesso apnámakkok ma'a mil énxet, tén sa' nahan pók apkeltaqmelchesso m'a cien, tén sa' nahan pók apkeltaqmelchesso m'a cincuenta, tén sa' nahan pók apkeltaqmelchesso m'a diez énxet.

Éxodo 23:8

“Ná ema aqsa exkak aqsok kélmésso naqsa yaqwayam mexének ektemegweykmohóxma, hakte ekho meyke apaqta'ák chá'a katnéssesek énxet kélmésso nak chá'a xa ektéma nak aqsok, néxa nahan chá'a katnéssessamhok aqsok apxeyenma m'a énxet meyke nak aptémakxa.

Proverbios 1:19

Cháxa ektémakxa m'a énxet étsapeykha nak apnények aqsok: kaqhekxohok agko' chá'a m'a ektémakxa nak apmopmenyého aqsok.

Proverbios 11:19

Nenlenxányam nak antekkesek aqsok ekpéwomo, agwetak ekyennaqte egnények, keñe m'a nenlenxányam nak antekkesek aqsok ekmaso, agwetak ma'a nétsapma.

Proverbios 11:29

Énxet meltaqmelchesso nak ekheykha apxagkok, meyke xama aqsok apagkok sa' katnehek; énxet apya'áseykegkoho aqsok sa' chá'a etnehek apchásenneykha m'a énxet ekyeyháxma nak.

Proverbios 15:26

Eltaqnawhok Wesse' egegkok ma'a apmáheyo nak chá'a elanagkok aqsok ekmaso, kalkohok eyke chá'a apwáxok ma'a kélpeywa meyke nak ekyepetche xama aqsok ekmaso.

Proverbios 20:21

Aqsok megkamáske nak ekwetamaxche sekxo', háwe yaqwayam kapeykásekxak egwáxok.

Proverbios 23:4

Nágyaqhap aptamheykha eltamhok etnehek ekxákma aqsok apagkok; elwatés ekxéneykha apwáxok katnehek xa ektáha nak.

Proverbios 28:16

Éntaxnéssesagkok chá'a ektémakxa ekmaso apheykha énxet'ák ma'a apkemha apmonye' mey'áseyak nak aqsok; ahóxek eyke katnehek apweynchámeykha m'a énxet megkaleklo nak apwáxok eyeykhasakpohok apwete aqsok apagkok.

Proverbios 28:25

Etekkesek chá'a apkelenmexamap ma'a énxet apmopmenyého nak chá'a étak aqsok apagkok; kaxámagkok eyke aqsok apagkok ma'a énxet apteme nak chá'a apcháyo Wesse' egegkok.

Proverbios 29:4

Wesse' apwányam apkelánekxésso nak chá'a ektaqmalma apheykha apnámakkok, exátekhaksek chá'a apchókxa'; yetsagkasek eyke chá'a m'a apkelmomo nak chá'a selyaqye apnegkenéyak ma'a énxet'ák nak.

Jeremías 17:11

Máxa sénhek apkeltahanwayam la'a aqsa megkatnahakxa appok ma'a énxet apxámasso nak aqsok apagkok eñama apmenyexeykha. Ekyennákxoho apyempehek sa' nahan kamassegwók ma'a ekxámokma aqsok apagkok, keñe sa' natámen etnehek ekyeyháxma.

Deuteronomio 16:19

Nágkólyetnakhássem chá'a m'a ekpéwomo nak kéllánekxésso amya'a kélnámakkok, nágkóltemésses chá'a apyeykhamap pók kóllanok énxet nepyeseksa m'a pók énxet'ák nak, nágkólma chá'a kólxawak selyaqye kóláneyxchek megkólxének aqsok kélwete, hakte máxa meyke apaqta'ák chá'a katnésseshok énxet'ák apkelya'áseykegkoho nak chá'a aqsok ma'a apma nak chá'a exkak selyaqye yaqwayam mexének ma'a aqsok apwete, katwássesha nahan chá'a apkelpeywa m'a énxet'ák apkelpéwomo nak.

Deuteronomio 7:26

Nágkólsakxa chá'a kélxanák xama enxoho m'a aqsok megkaleklamakxa nak chá'a egwáxok anlano', yaqwayam enxoho megkólmasséssemek kéxegkáxa. Xénamaxcheyk kólmasséssók ekyókxoho xa, kéméxcheyk chá'a kéxegke kólteméssesek aqsok megkaleklamakxa nak chá'a egwáxok anlanok xa.

Josué 6:18

Kóltaqmelchesaxkoho sa' kéxegke, nágkólma aqsa tén han nágkólpaknegwomho m'a aqsok ekhéyak nak ma'a tegma apwányam, hakte appenchessek apkelpagkanma Wesse' egegkok yaqwayam kólmasséssók xa aqsok nak. Sa' agkok kólyahákxak kéxegke xa, kélsexnenagko kélagko' sa' kóltéhek ma'a apkelpakxeneykegkaxa nak énxet'ák Israel, kólhágwakxak sa' ma'a ekmaso agko' nak.

1 Samuel 12:3

keso sekha s'e: ¡Ekyementamomchek axta agkok chá'a ko'o weyke aptósso xama énxet, essenhan yámelyeheykok! ¡Eknaqtawáseykegkók axta agkok chá'a, élhayak axta agkok nahan chá'a! ¡Ekmomchek axta agkok han chá'a selyaqye wánéxchek maxének ektemegweykmoho exma! Kélwanchek hélxénchásekxohok sektémakxa nápaqtók Wesse' egegkok, keñe han nápaqtók se'e wesse' apwányam ektáha nak apkelyéseykha, ayánmagkasek sa' nahan ko'o sekméyak aqsok.