Oseas 9:11 - Biblia Enxet

¹¹ Máxa náta sa' katnehek kampak ma'a ektémakxa nak apcheymákpoho m'a Efraín. Mexek sa' chá'a kaxwók sakcha'a kaxwe appalleyam, méko sa' kaxwók katnehek ma'a kelán'ák lós'awo', kamaskok sa' kaxek kélketchek.

Oseas 9:11 ပူးပေါင်းရင်းမြစ်များ

Génesis 41:52

Keñe axta m'a axayók aptéyam apteméssesa apwesey Efraín, hakte axta aptáhak se'e: “Dios egkéssók ko'o yaqwayam ótak étchek ma'a apchókxa ekyentaxnamakxa nak sekha.”

Génesis 49:22

“Aphawók José m'a yámet émha nak neyáwa yegmen, ekxámokmal'a ekyexna, élápxegmal'a aktegák ma'a neyáwa kélhaxtegkesso.

2 Samuel 6:23

Keñe axta Mical ektéma megkate étche, ekweykmoho étsapma.

Job 18:5

Máxa cháléwasso élsapane sa' etnahagkok elmassegwók ma'a élmasagcha'a nak apkeltémakxa. Sa' etnahagkok ma'a ektémól'a kaspónak táxa eyáléwe.

Salmos 58:8

elpayhekxak sa', ektémól'a kalpayhekxak ma'a akpog eymánog, ¡ektémól'a sakcha'a apketsapmal'a egken awáxok, méteyól'a ekhem éltátchesso!,

Eclesiastés 6:3

Xama énxet apwanchek chá'a étak cien apketchek, ahóxek nahan katnehek apha; agkok chá'a kapeykessásekxak apwáxok aqsok ektaqmela neyseksa apha ekwenaqte keso náxop, tén han megkólátawaña enxoho chá'a, ekxénchek ko'o sakcha'a apketsapma nak egken awáxok ektáha apkeleñémo, kaxnók xa énxet nak.

Isaías 17:3

Méko sa' etnehek tegma apwányam apyennaqte apagkok ma'a Efraín, cham'a, eyaqheykencha'a nak chá'a apkelwáxok ma'a énxet'ák Israel; sa' katnehek nahan ma'a Damasco, kamaskok sa' katnehek apchókxa m'a éleymomáxche nak ma'a kañe' Siria. Wesse' egegkok ekha nak apyennaqte apxeyenma xa.

Oseas 10:5

Apkelpexyennegkek apkelaye m'a énxet'ák Samaria; kellapwámegkek eñama ekxegányam weyke étkók kéleykmássesso ekyetnama nak ma'a Bet-avén. Apkellekxagweyha apketama énxet'ák, tén han ma'a appasmo apkelmaxnéssesso nak Dios énxet'ák apagkok, hakte massegwokmek ma'a eyaqheykha nak chá'a apkelwáxok.

Oseas 4:7

“Yágweykmók axta aqsa megkólya'assáxma nahaqtók kélxámokma kélagko' axta kélteme kélmaxnéssesso énxet'ák ahagkok; ektaqnómaxche sa' atnessásekxak ma'a ektémakxa nak ekha kéláyo.

Oseas 5:9

Ekxénchek ko'o yaqwánxa katnehek ma'a nepyeseksa nak pók aptémakxa énxet'ák Israel, naqsók sa' katnehek: Ekmaso agko' sa' katnekxak ma'a apchókxa nak Efraín ekwa'a sa' ekhem kéllegassáseykegkoho.

Oseas 9:14

¡Wesse', etnésses xép ma'a ekpayhawo nak etnéssesek! ¡Etnéssesák megkate étchek ma'a kelán'ák, tén han meyke neme apyegmenek agkok!

Amós 1:13

Aptáhak Wesse' egegkok se'e: “Xámók agko' apkeláneyak apkeltémakxa ekmaso m'a énxet'ák Amón, megkatnehek sa' mallegassáseykegkoho; hakte apkelpáxqatcháseykegkek axta awokma'ák kelán'ák lós'awo', ekheykha nak Galaad, apmáheyo eyánchesagkok ma'a xapop apagkok.

Deuteronomio 28:18

Apqántawók sa' etnehek ma'a kélketchek, ántawók sa' nahan katnehek ma'a aqsok kélcheneykekxa nak, tén han ma'a étkók nak ma'a weyke kélnaqtósso, nepkések tén han ma'a ekyókxoho aqsok kélnaqtósso nak eñama apkeltaqnawéyak ma'a Dios.

Deuteronomio 28:57

yaqwayam sa' megkapasmehek chá'a ektókagko enxoho m'a étchek ekpalchesso nak chá'a tén han ma'a sakcha'a ataxna'ák éleñama nak chá'a m'a awáxok; kalpósek sa' chá'a katawagkok xa ekyókxoho nak, hakte méko sa' katnehek xama enxoho kéltawakxa neyseksa apwakhe kélenmexma m'a tegma apkelyawe kélagkok nak.

Deuteronomio 33:17

Aptásek ma'a, máxa m'a émha amonye' étkok la'a m'a weyke kennawo' apmeyhek nahan, máxa m'a yágweykel'a. Elyetxeygkok sa' nahan ma'a apyókxoho énxet'ák ekweykmoho m'a néxa xapop nak. Aphawók ma'a Efraín énxet'ák apagkok apxámokma nak; tén han ma'a Manasés énxet'ák apagkok nak.”