Oseas 9:10 - Biblia Enxet

¹⁰ Aptáhak Wesse' egegkok se'e: “Payheykekxeyk axta ko'o ewáxok sekweteya m'a Israel, máxa axta ektemék énxet apwetágwayam la'a anmen yámet ekyexna m'a yókxexma meykexa nak énxet. Máxa axta ektemék ko'o sélányo kélyapmeyk nanók axta kéxegke m'a higo ekyexna amonyel'a. Keñe axta apkelweykmo m'a Baal-peor, apkelmeyásamákpo m'a aqsok kéláyókxa élmowancha'a amya'a nak, apkelmopsagcha'a apagko' axta apkeltemessásamákpok, ektéma nak ma'a aqsok kéláyókxa apkelmopmenyého nak ma'a.

Oseas 9:10 ပူးပေါင်းရင်းမြစ်များ

1 Reyes 16:31

axta yeyék apkeláneya m'a ektémakxa axta apkeláneya mey'assáxma m'a Jeroboam, Nabat axta apketche. Weykmok axta han apma aptéma aptáwa' m'a Jezabel, Et-baal axta apketche, wesse' apwányam axta m'a Sidón, tén axta apkelpeykessamo m'a Baal,

2 Reyes 17:11

apkelyetlókassegkek axta m'a apkeltémakxa axta énxet'ák, apkelántekkessama axta Wesse' egegkok apmonye'e, apkelwatnegkek axta chá'a m'a aqsok ekmátsa nak ekpaqneyam éten agkok, apkeláneykegkek axta han chá'a apkeltémakxa élmasagcha'a aplókassama m'a Wesse' egegkok.

Salmos 115:8

Elxohok sa' chá'a apyókxoho ektáha nak chá'a apkeláneyak xa kéleykmássesso nak, tén han apkeláyo nak chá'a.

Salmos 81:12

Cháxa keñamak seyhayo aqsa apkeláneykegko m'a élxeyenmakxa nak chá'a apkelwáxok elanagkok, etnahagkok chá'a m'a apmakókxa enxoho chá'a etnahagkok.

Cantares 3:6

¿Yaqsa ekxegakmo nak yókxexma meykexa énxet, ekxegakmo nak ekho éten ekpánma ekmeyeykekxa néten, ekxegakmo nak yetlo émpasso ekpaqneyam ma'a yámet ánek ekmátsa nak ekpaqneyam tén han ma'a aqsok ekmátsa nak ekpaqneyam éten agkok, tén han ma'a ekyókxoho mók ektémakxa nak chá'a sokmátsa?

Isaías 28:4

Keñe sa' ma'a pánaqte exnók éltaqmalma élyamaye nak kélnáxegkáseykha, ekyetnama nak ma'a néten ekyapwátegweykenxa xapop ektaqmalma, katnehek sa' ma'a ektémól'a higo yámet émha amonye' ekyexna ekmakhetmal'a: apwetél'a xama énxet keñe enakxek, etwok nahan.

Jeremías 11:13

Xámok agko' aqsok apkeláyókxa m'a énxet'ák Judá, hawók ma'a tegma apkelyawe apagkok nak, keñe m'a énxet'ák apheykha nak Jerusalén, apxámassamók apagko' apkelánéyak ma'a apkelwatnamakxa aqsok yaqwayam elmések chá'a aqsok ánek ekmátsa nak ekpaqneyam éten agkok ma'a Baal, hawók ma'a ektémakxa nak ekxámokma ámay ma'a tegma apwányam.

Jeremías 24:2

Keltásek agko' axta nahan higo ekyexna m'a xama nak hówenaq apxagkok, élmakhetma nak chá'a amonye', keñe axta m'a mók nak hówenaq apxagkok asagcha'awók agko' axta, megkólwanchek axta kóltók.

Jeremías 3:24

Kéleykmássesso segmegqassamo nélpeykessamo ensawhessók ma'a aqsok apkelwete axta ẽlyapmeyk nano' ma'a nentémakxa axta egketkók: cham'a nepkések, weyke, tén han egketchek apkelennay'a tén han kelwán'ák.

Jeremías 3:25

Ólháxahagkok hana nélmegqakto, yetlo nélyeykhásamáxkoho egagko' nélmegqágweykekxa', hakte nentémakxa sakcha'a axta negko'o negeynamo nenlánéyak mólya'assáxma nenmexeykekxo m'a Dios Wesse' egagkok, tén han mólyeheykekxa, ekwokmoho s'e kaxwo nak, weykekxók axta nahan ma'a ẽlyapmeyk nanók axta.”

Jeremías 31:2

Aptáhak Wesse' egegkok se'e: “Ekxekmóssegkek axta ko'o ektaqmeleykha ewáxok énxet'ák metekyawa axta, cham'a yókxexma meykexa nak énxet. Xama axta aptegyeykencha'a yaqweykenxa ellókasek apyampe m'a Israel,

Jeremías 5:31

Wanchek amya'a m'a apkelxeyenma nak chá'a Dios appeywa apkellegasso; etnahagkok nahan chá'a apmakókxa enxoho etnahagkok apkeláneykha apchókxa m'a apkelmaxnéssesso nak Dios énxet'ák apagkok, ¡kalkohok nahan apkelwáxok énxet'ák ahagkok katnehek xa ektáha nak! ¿háxko sa' eyke kéxegke kóltéhek ekwokmo sa' néxa ekhem?’”

Ezequiel 20:8

“Élmexeykekxeyk axta eyke ko'o m'a, axta emáheyók heyeyxho'; axta nahan emassésseykmok ma'a aqsok apcháyókxa élmasagcha'a nak, axta nahan ekxakhák ma'a aqsok kéleykmássesso éleñama axta m'a Egipto. Xénchek axta ko'o ewáxok ategkesek seklo nepyeseksa, tén han allegássesagkohok neyseksa apheykha m'a Egipto ekwokmoho ekmassa seklo.

Oseas 11:1

“Eyásekhayók axta chá'a ko'o Israel aptémakxa axta sakcha'a; Egipto axta apkeñamak sekwóneykencha'a ko'o m'a, hakte, hatte axta ko'o m'a.

Oseas 13:5

Ektaqmelchessegkek axta ko'o exchep ma'a xapop ekyamáyekxa nak exma meykexa nak énxet.

Oseas 2:15

Agkeyásekxak sa' makham ma'a éneykekxa axta anmen yámet, élhaxneykha ektaqmela agkok sa' atnessásekxak ma'a xóp ekyapwate agkok nak Acor Sa' heyásekhekxohok ko'o makham ma'a, ektéma axta m'a ektémakxa axta étkok, ektéma axta m'a ekteyapma axta m'a Egipto.

Oseas 4:14

Mallegássesagkók sa' eyke ko'o m'a kélketchek eñama ekyaqmagkáseyak pók énxet ektegyéyak selyaqye, mallegássesagkók sa' han ma'a kéltánegken'ák nak eñama eknaqtawáseykegkoho chá'a anaqteyegka'a élánegwayam chá'a pók énxet, kéxegke kélagko' han chá'a kéltegyéyak ma'a kelán'a ekyaqmagkáseyak nak pók énxet ektegyéyak selyaqye; kólyepetchekxak chá'a kéxegke kelán'ák éláneyak nak chá'a xa ektéma nak, kólnáhakkasek aqsok kélnaqtósso m'a éláyókxa nak. ¡Keñe kólnaqtawasha chá'a m'a énxet'ák meyke nak apkelya'áseyak!

Amós 4:5

Kólwet sa' kelpasmaga meyke nak kempáseyak kélmésso naqsa nak chá'a eñama kélmésso ekxeyenma kélwáxok, kóltennasák nahan ekyókxoho yókxexma m'a aqsok kélmésso naqsa ekxeyenma agko' nak kélwáxok yaqwayam kólmések, hakte cháxa ekleklamo nak chá'a kélwáxok kéxegke kóltéhek xa ektáha nak.” Wesse' egegkok apxeyenma xa.

Miqueas 7:1

¡Ko'o laye! ekhawók ma'a énxet apyekhámeykhal'a aqsok natámen eknakxamáxche ekyexna m'a namyep, massék sekwet'a anmen yámet ekyexna, tén han higo ekyexna, sekmáheyól'a chá'a.

Números 15:39

Kéllanawók sa' agkok chá'a kéxegke m'a apkelmakheykha nak, kaxénwakxohok sa' chá'a kélwáxok ma'a ekyókxoho séltémókxa nak chá'a kóltéhek, sekmésso axta ko'o kéxegke, keñe sa' kóllának chá'a, tén sa' megkólyetlakxeyk chá'a m'a ektémakxa nak chá'a élchetámeykha agko' kélwáxok, tén han kélmámenyého kóllána', élwátessesseykmo nak kéxegke kélteme mehelyenyaweykha ko'o.

Números 18:13

Keñe sa' nahan ma'a émha amonye' ekyexna nak aqsok apnakxéyak segkésso ko'o m'a, xeyep sa' etnehek apagkok. Apwanchek sa' chá'a etwok xama énxet ektáha nak aphawóxama, megkamagyása nak apyempehek.

Deuteronomio 32:10

Apkelwetágweykmek axta m'a yókxexma meykexa nak énxet, ekyamáyókxa nak exma xapop ekpáwomakxa nak émpehek éxchahayam; apkelpathetmeyk axta, apkelxekmóssegkek axta nahan, apkeltaqmelchessegkek axta nahan ektémól'a apkeltaqmelchesso m'a apaqta'ák apagkok apagko'.

Deuteronomio 32:17

tén han apkelméssama chá'a aqsok apkelnapma m'a kelyekhama, tén han ma'a aqsok kéláyókxa élmowancha'a amya'a melweteya axta m'a nanók axta; cham'a aqsok kaxwe kéláyókxa nak, kaxwe élwe nak, melpeykessamo axta chá'a xama enxoho m'a apyapmeyk nak.

Deuteronomio 4:3

Kéxegke kélagko' axta nahan kélweteyk apteméssessamakxa Wesse' egegkok ma'a Baal-peor, tén han apmassesseykmo kélnepyeseksa kéxegke m'a apyókxoho apkelpeykessamo axta chá'a aqsok kéláyókxa m'a yókxexma nak;

Jueces 6:32

Cháxa eyeynókxa axta kélteme Jerubaal ma'a Gedeón, hakte axta aptáhak énxet'ák apxéna s'e: “Baal sa' kanmexekxa'”, hakte apyaqnegkessek Gedeón ma'a kélwatnéssamakxa nak chá'a aqsok Baal.