Oseas 9:1 - Biblia Enxet

¹ Nágkólátsaha aqsa énxet'ák Israel; nágkólnextegmakha aqsa néten kalpayhekxak kélwáxok, aptamheykegko nak chá'a pók énxet'ák nak, hakte kélyamasmeyk Dios kélagkok eñama kélláneyak kéltémakxa ekmaso megkólmasexta'a. Atsek chá'a kóltamhok kólxawak ekyánmaga kélláneyak kéltémakxa megkólmasexta'a m'a kélchexakkassamakxa nak chá'a apyempe'ék ma'a hótáhap apaktek.

Oseas 9:1 ပူးပေါင်းရင်းမြစ်များ

Salmos 73:27

Eletsapok sa' chá'a m'a apyamasma nak chá'a exchep; emasséssók sa' ma'a apyenseyam nak chá'a apkelyetleykha.

Isaías 17:11

kéltaqmelchessegkek axta m'a sekxók axta kélcheneykekxo, keñe mók ekhem ekteyapma m'a aqsok aktek kélcheneykekxa. Wa'ak sa' agkok ekmaso m'a aqsok kélcheneykekxa nak megkamowánal'a kaltektépekxa', kasók sa' ma'a aqsok kélcheneykekxa.

Jeremías 2:19

Kéltémakxa ekmaso kélagko' sa' kéxegke kallegassásegkokxa', kélyamasma kélyetleykha Dios sa' kalsexnena'. Kalchetam sa' kélwáxok keñe sa' kólya'ásegwók asagkek ko'o hélyenyók, tén han askehe', tén han mehélakawo enxoho, ko'o sektáha nak Dios Wesse' kélagkok. Ko'o sekxeyenma xa, sektáha nak Wesse' ekha sekyennaqte.

Jeremías 2:20

“Nanók agko' ko'o kéxegke sélenmexeykekxa', megkalyaqwámeykegkok hélyahakxoho.’ Axta kéltemék chá'a kélpaqméteykencha'a s'e: ‘Mogmenyeyk negko'o exchep agyetlawha.’ Kélláneykegkek axta kéxegke kéltémakxa megkólmasexta'a m'a néten egkexe nak tén han ma'a kóneg nak yenta'a élyentaxno pessesse agkok.

Jeremías 44:17

Anlenxanmohok sa' aqsa nenlánéyak ma'a nenxeyenma nak anlanagkok. Anlenxanmohok sa' negmésso aqsok ánek ekmátsa nak ekpaqneyam éten agkok, tén han negmésso naqsa vino m'a negáyókxa Wesse' Ekwányam Eñama Néten, nenláneykegko nak chá'a, ekwokmoho makham se'e kaxwo nak, apkeláneykegko axta nahan chá'a nanók ma'a ẽlyapmeyk nano', tén han kelwesse'e apkelwányam egagkok, tén han ma'a apkelámha apmonye'e axta m'a tegma apkelyawe nak Judá, tén han ma'a ámay nak Jerusalén. Xámok axta nentéyak ma'a nanók axta, tásek axta han negheykha, axta hegáhapweyk xama enxoho ekmaso negheykha;

Lamentaciones 4:21

¡Apchókxa Edom, kaktegmaha, kapayhekxa awáxok; ekhama axta ektéma máxa wesse' ekwányam ma'a yókxexma Us! ¡Kaxkak sa' xeyáxa' m'a ekya ekmáske nak, kaqhek sa' ektémól'a anmen, meyke apáwa sa' kaweynchamha!

Ezequiel 16:15

“Chásennagkamchek axta eyke exche' m'a ektémakxa ektaqmalma, meykha axta m'a ektémakxa axta ekpayheykekxa ekwesey yókxexma yaqwayam katnehek xama kelán'a ekma chá'a ekyánmaga ekpathetéyak énxet, méssegkek axta chá'a ekyókxa m'a apyókxoho ektáha axta chá'a apyeykhágwayam.

Ezequiel 16:30

Ektáhak ko'o sekpeywa s'e, sektáha nak Wesse': ¡Awanhók agko' nak la'a ekyespagko awáxok kalának xeye' ekyókxoho s'e ektémakxa nak kelán'a ekyaqmagkáseyak pók énxet ekpathetéyak ekma chá'a ekyánmaga megkamegqakto nak!

Ezequiel 20:32

Xeyenmeyk kéxegke kélwáxok kóltéhek ma'a aptamheykegkaxa nak pók aptémakxa énxet'ák keso náxop, cham'a apkelpeykessamo nak yámet tén han ma'a meteymog, megkatnehek sa' eyke xa ektáha nak.

Ezequiel 21:10

Kélmaxneyákxeyk yaqwayam kalának nentekyawa, kélyenmásekxeyk yaqwayam kalyenmaksexma;

Oseas 10:5

Apkelpexyennegkek apkelaye m'a énxet'ák Samaria; kellapwámegkek eñama ekxegányam weyke étkók kéleykmássesso ekyetnama nak ma'a Bet-avén. Apkellekxagweyha apketama énxet'ák, tén han ma'a appasmo apkelmaxnéssesso nak Dios énxet'ák apagkok, hakte massegwokmek ma'a eyaqheykha nak chá'a apkelwáxok.

Oseas 2:12

Amasséssessók sa' ma'a éneykekxa nak anmen yámet, tén han ma'a éneykekxa nak higo, ektéma nak chá'a ekxeyenma s'e: ‘Keso ekyánmaga segkésso nak chá'a ko'o m'a sélpathetéyak nak chá'a.’ Ekmompánaqma sa' atnessásekxak, aqsok nawha'ák éllo sa' katókasek.

Oseas 4:12

Apkelpaqhetchásamákpók chá'a aqsok apkeláyókxa nak yántéseksek ma'a énxet'ák ahagkok; yámet chá'a elmaha eltamhok elya'asagkohok aqsok megkólya'áseyak nak. Kelmomchek ma'a ektémakxa nak apkelyespagko apkeláneyak megkalmopsexta, melaqhémók chá'a ámay apagkok ma'a énxet'ák ahagkok: apkeláneykegkek apkeltémakxa megkalmopsexta'a apyamasma m'a Dios apagkok.

Oseas 5:4

Apkeltémakxa ekmaso megkahayók elyo'ókxak Dios apagkok ma'a énxet'ák, melya'ásegkok ma'a Wesse' egegkok, eñama élmá apkelwáxok apkeláneyak apkeltémakxa ekmaso megkalmopsexta'a.

Oseas 5:7

Apkelyamasmeyk apkelyetleykha m'a Wesse' egegkok, hakte pók énxet apketchek ma'a apketchek nak. Ekmanyehe agko' sa' kólmasséssessók ma'a xapop apagkok nak, eñama apkelyamasma apkelyetleykha m'a Wesse' egegkok.

Amós 3:2

“Kéxegke axta kélwánxa kélagkok sélyéseykencha'a ko'o nepyeseksa m'a apyókxoho énxet'ák nak keso náxop. Cháxa keñamak peya nak ko'o ayaqmagkásekxak ma'a ekyókxoho aqsok élmasagcha'a nak kélláneyák.”

Amós 4:5

Kólwet sa' kelpasmaga meyke nak kempáseyak kélmésso naqsa nak chá'a eñama kélmésso ekxeyenma kélwáxok, kóltennasák nahan ekyókxoho yókxexma m'a aqsok kélmésso naqsa ekxeyenma agko' nak kélwáxok yaqwayam kólmések, hakte cháxa ekleklamo nak chá'a kélwáxok kéxegke kóltéhek xa ektáha nak.” Wesse' egegkok apxeyenma xa.

Amós 6:13

Kaqhok chá'a kéxegke kalpayhekxak kélwáxok, kóltéhek chá'a kélpeywa s'e: “Nélyennaqte egagko' negko'o keñamak negweteya nélyennaqte.”

Amós 8:10

Kéllekxagweykegkaxa eñama apkeletsapma énxet sa' atnessásekxak ma'a ekhem kélessawassessamókxa nak chá'a, keñe sa' kélmeneykmasso katnekxak ma'a senlapweykenxa; wának sa' ko'o kólántaxnekxak kéxegke m'a apáwa sẽlwáxaqxamo nak, tén han kólmopaksohok kélyese magkenatchesso éllapwámegko. Máxa sa' kóltéhek kóllekxagwaha m'a aptémól'a énxet elekxagwaha exyánegkesek apketche apteme nak wánxa xama apagko', kélyókxoho sa' kalyélaqtések kéllegeykegkoho ekmáske.