Oseas 7:16 - Biblia Enxet

¹⁶ Apkelye'eykekxeyk axta eyke m'a aqsok kéleykmássesso, aphawók ma'a yágke ektaqhél'a, megkapayhémól'a negya'asakxa m'a aktek nak. Sókwenaqte sa' kólyetxák kólnápok ma'a apkelámha apmonye'e apagkok nak, eñama éleymáxkoho apkelpaqméteykha, elesmaksek sa' ma'a énxet'ák Egipto.

Oseas 7:16 ပူးပေါင်းရင်းမြစ်များ

Salmos 12:3

Wesse', emasséssamho apagko' ma'a apkelxeyenma nak chá'a meltemegweykmoho exma, tén han ma'a éleymáxkoho nak chá'a apkelpaqméteykha,

Salmos 12:4

apteme nak chá'a elpaqmétek se'e: “Egwancha'ak negko'o nélpeywa yaqwayam hegwetaksek aqsok, hẽlwagkasek chá'a teyp nélpeywa. ¿Yaqsa awanchek negko'o hẽlxekmósagkok?”

Salmos 12:5

Aptáhak appeywa Wesse' egegkok se'e: “Kélnaqtawáseykegkók ma'a meyke nak aqsok apagkok, kéllegassáseykegkók ma'a apkelyelqamákpoho nak. Cháxa keñamak peya nak ko'o wampekxak néten, apasmok sa' ekhawo ektémakxa nak chá'a apkelmopmenyého.”

Salmos 17:10

Kalyeyha'ak apkelwáxok ma'a, kaleyxkohok han chá'a apkelpeywa;

Salmos 52:2

Wánxa aqsa ekxéneykencha'a apwáxok elának ma'a aqsok ekmaso, sensexnenagkamo m'a appeywa, máxa sawo ekmahanta m'a apaxkok.

Salmos 57:4

Ekyetnegkek ko'o náxop neyseksa yámakméwa ektómo nak chá'a énxet; máxa sawhéwa m'a am'ák nak, tén han yágke aktek, keñe m'a axkok nak, ekhawo m'a sókwenaqte ekmahantal'a.

Salmos 73:9

exénmakha chá'a ekmaso Dios apha nak néten, kaleyxkohok aqsa chá'a apkelpeywa elweynchamha keso náxop.

Salmos 78:37

apkelmopwancha'a amya'a axta aqsa chá'a aptamheykegkok, axta eláneykegkok ma'a ekhémo mók apkelpaqhetchásamákpoho.

Salmos 78:57

aphémók axta m'a apyapmeyk nano', apkelyamasmeyk axta, apkelyenseykmek axta han apkelyetleykekxa; apkeltaqhegweykmek axta, máxa axta m'a yágke ekyetnakhágwayam la'a ekxega!

Isaías 3:8

Naqsók kéltegkesa m'a Jerusalén, keñe Judá kéltawáseyncha'a, hakte cham'a ekxénamaxchexa chá'a aqsok énmexma nak Wesse' egegkok ma'a tén han élánamáxchexa chá'a m'a aqsok eklókassamo nak wesse'.

Jeremías 18:18

Aptáhak axta apkelpaqmeta énxet'ák se'e: “Anlánekxak sa' nentáhakxa yaqwayam agmasséssók Jeremías. Megkatnehek eyke chá'a meyke apkelmaxnéssesso Dios énxet'ák apagkok yaqwayam hẽlxekmóssek, apxámok nahan ma'a apkelya'áseyak nak aqsok, yaqwayam hempékessesagkok, tén han Dios appeywa apkellegasso yaqwayam chá'a hẽltennaksek Dios appeywa. Ansexnenak sa', yaqwayam sa' emátog. Mageyxók sa' chá'a m'a aptáhakxa enxoho chá'a sẽláneya.”

Jeremías 3:10

Axta nahan ko'o hey'ékekták Judá, yetlo segkéssamo agko' awáxok, cham'a seyenseykmo nak ko'o sétleykha, natámen élane xa ekyókxoho aqsok nak, élyexancháseykha axta aqsa chá'a. Ko'o sekxeyenma xa, sektáha nak Wesse'.”

Jeremías 42:18

“Aptáhak Wesse' ekha apyennaqte, Dios apagkok nak Israel se'e: ‘Sa' atnehek nahan ko'óxa altaqnaweygkok kéxegke m'a sektémakxa axta séltaqnaweykegkoho ahagko' ma'a apheykha nak Jerusalén, kélmeyákxo sa' ma'a Egipto, altaqnaweygkohok ahagko' sa' ko'o kéxegke. Néltémo hentemégwomhok exma ekmaso sa' kóltemekxa', aqsok eyeymáxkohol'a kataxche', megkólwetekxók sa' chá'a s'e yókxexma nak.’

Ezequiel 23:32

“Keso sektáhakxa nak ko'o sekpeywa s'e, sektáha nak Wesse': Keynek sa' xeye' ekyena axta m'a yáxa nak, xama egheykok ekyawe, ekyawe nak awáxok tén han ekmattawóneg, ekláneyo m'a nésmésamaxche' tén han sẽlwanyeykha,

Ezequiel 36:20

Aptawáseykha axta chá'a ko'o sekwesey ekpagkanamaxche ekyókxoho yókxexma apkelweykemxa axta chá'a m'a, hakte axta etnehek chá'a elxének énxet'ák se'e: ‘Wesse' egegkok énxet'ák apagkok xa, kélántekkessegkek eyke m'a apkelókxa nak.’

Daniel 7:25

Kanmexmakha sa' appeywa m'a Dios meyke nak ekhémo enaqtawássesagkohok sa' ma'a énxet'ák apagkok; emáwhok sa' eyaqmagkasek mók ma'a Dios segánamakxa apagkok, tén han ma'a kélessawássessamókxa nak chá'a ekhem apagkok, elmok sa' ma'a Dios énxet'ák apagkok ekweykmoho apqántánxo apyeyam nepxet pók.

Oseas 11:5

axta eyke emáheyók hey'ótak ko'o. Cháxa keñamak peya eltaqhohok makham ma'a Egipto, Asiria sa' etnehek wesse' apwányam apagkok.

Oseas 11:7

Apmenyeyk aqsa heyenyók ko'o m'a énxet'ák ahagkok, elpáxamha eykhe m'a netno nak, méko eyke kapasmok.

Oseas 6:4

Aptáhak Wesse' egegkok se'e: “¿Háxko atnéssesek xép Efraín? ¿Háxko atnéssesek xép Judá? Máxa teyáméten ekteyapmól'a axto'ók kéltemék kéxegke sélásekhayo, tén han yálye ektéyeykmohol'a amonye' élseye ekmanyehe nak chá'a kamaskok.

Oseas 7:13

“¡Asagkek sa' katnehek ektáhakxa eñama seyamasma! Káhapwak sa' kélmassésseyam, hakte élenmexeykekxeyk ko'o. Émenyeyk eykhe ko'o alwagkasek teyp ma'a, apkelmopwancha'a amya'a eyke chá'a aptamheykegkok sénmexma ko'o.

Oseas 9:3

Emyekxak sa' makham Efraín ma'a Egipto, Etáswakxak sa' nento élmanyása m'a Asiria. Mexnakha sa' kaxwók ma'a Wesse' egegkok apchókxa nak:

Oseas 9:4

melyegkenchesek sa' kaxwók anmen yámet égmenek ma'a Wesse' egegkok, melmések sa' han kaxwók ma'a aqsok apkelnapma. Keñe sa' ma'a pán aptéyak nak, etnehek sa' pán nento senlapwayam, keñe sa' ma'a ektáha enxoho chá'a aptéyak, etnahagkok chá'a élmanyása apyempe'ék. Etawagkok sa' chá'a xa pán nak, mopwancha'ak sa' eyke elsakxak ma'a Wesse' egegkok nak tegma appagkanamap apagkok.

Oseas 9:6

Apkenyaheykegkek ekmáheyo kólmasséssók ma'a, énxet'ák Egipto sa' eyke yánchásekxa', sa' kólátawanyek ma'a Menfis. Pa'at sa' kápekxak ma'a aqsok éltaqmalma apagkok, sawo' élmope élmomnáwa nak, katyapok sa' yámet ekha nak am'ák ma'a apkelpakxeneykegkaxa nak.

Malaquías 3:13

Aptáhak Wesse' egegkok se'e: “Asagkók agko' kéxegke kéltáhakxa sélxeyenma. Keñe kéltáha makham sélmaxneyencha'a s'e: ‘¿Háxko nentémakxa negko'o nélpeywa nenxeyenma ekmaso exchep?’

Malaquías 3:14

Keso kéltémakxa nak chá'a kélpeywa s'e: Kaqhok agyetlók Dios. ¿Yaqsa aqsok hegwetaksek anlának ma'a apkeltémókxa nak antéhek, tén han nélántaxnékxo enxoho apáwa sẽlwáxaqxo nápaqtók ma'a Wesse' egegkok ekha nak apyennaqte?