Oseas 5:5 - Biblia Enxet

⁵ Apcheymákpoho keñamak Israel eksexnáneya; pelápagkassek Efraín ma'a mey'assáxma apagko' nak, ¡kawakxohok sa' nahan Judá appelápeyam xamo' ma'a!

Oseas 5:5 ပူးပေါင်းရင်းမြစ်များ

Proverbios 11:21

Naqsók sa' kóllegássesagkohok ma'a énxet ekmaso nak aptémakxa', tásek sa' eyke katnehek apkelmallane m'a énxet'ák élpéwomo nak apkeltémakxa'.

Proverbios 11:5

Ektaqmalma aptémakxa chá'a kapékesseshok apxega m'a énxet ekpéwomo nak aptémakxa, esexnáneykpekxohok apagko' eyke chá'a kápekxak aptémakxa ekmaso m'a énxet ekmaso nak aptémakxa'.

Proverbios 14:32

Kasexnáneyekxohok agkok chá'a aptémakxa ekmaso m'a énxet ekmaso nak aptémakxa'; keñe m'a énxet meyke nak aptémakxa, kamyók chá'a m'a meyke aptémakxa nak.

Proverbios 24:16

hakte eyaqnenek eykhe chá'a ekweykmoho siete m'a meyke nak aptémakxa, siete eyke han chá'a katnehek apkempeykekxa néten; keñe m'a élmasagcha'a nak apkeltémakxa, káhapwak chá'a ekmaso apheykha eletsapok.

Proverbios 30:13

Yetneyk énxet apkenagko nak etnahak ekyawe kéláyo, elanok chá'a pók yetlo eyeymáxkoho apwáxok.

Isaías 3:8

Naqsók kéltegkesa m'a Jerusalén, keñe Judá kéltawáseyncha'a, hakte cham'a ekxénamaxchexa chá'a aqsok énmexma nak Wesse' egegkok ma'a tén han élánamáxchexa chá'a m'a aqsok eklókassamo nak wesse'.

Isaías 3:9

Melmegqaqto kelsexnenagkók ma'a; melpóssók ma'a apkeltémakxa melya'assáxma, aphawók ma'a apkeltémakxa axta énxet'ák Sodoma, apkelxekmóssamók ma'a apyókxoho énxet'ák. ¡Énxet'ák laye, aptegyéyak apagko' yaqwayam kóllegássesagkoho'!

Isaías 44:9

Mékoho apancha'awók ma'a apkelánéyak nak chá'a aqsok kéleykmássesso, momók ancha'awók nahan ma'a kéleykmássesso apkelánéyak nak chá'a, cham'a apkelmopmenyého apagko' nak chá'a. Meyke apaqta'ák nahan ma'a ektáha nak chá'a apkelpeykessamo, melya'ásegkok nahan aqsok, cháxa keñamak peya sa' elmegqágwakxohok ma'a.

Isaías 59:12

Xámók agko' negko'o nenmexeykha exchep, mólya'assáxma egagkok egagko' nahan ẽlsexnáneyákxa'; yetnegkek negyeseksa m'a aqsok magaqhémo, negya'ásegkók nahan ma'a aqsok ekmaso nenlánéyak.

Jeremías 14:7

Wesse', ẽlsexnenagkamchek eykhe negko'o m'a mólya'assáxma nak, eyke elána sa' aqsa aqsok, eñama apkelmeyeykha m'a apwesey! Xámokmeyk negko'o negyenseyam negyetleykha exchep, nenláneykegkek mólya'assáxma nenmexeykekxo.

Jeremías 2:19

Kéltémakxa ekmaso kélagko' sa' kéxegke kallegassásegkokxa', kélyamasma kélyetleykha Dios sa' kalsexnena'. Kalchetam sa' kélwáxok keñe sa' kólya'ásegwók asagkek ko'o hélyenyók, tén han askehe', tén han mehélakawo enxoho, ko'o sektáha nak Dios Wesse' kélagkok. Ko'o sekxeyenma xa, sektáha nak Wesse' ekha sekyennaqte.

Oseas 14:1

¡Israel, ey'ókxa makham Dios Wesse' apagkok, mey'assáxma axta exchep keñamak aptéyékmo!

Oseas 14:2

Kólyo'ókxa makham Wesse' egegkok, sa' kóltéhek kólmaxnak se'e ektáha nak: “Ná eyaqmagkásekxa aqsa ekyókxoho nentémakxa mólya'assáxma, ema sa' aqsa yetlo ektaqmeleykha apwáxok se'e nélpeykessamo negmésa nak.

Oseas 4:5

Ekhakxoho ekhem sa' xép etlapmok, keñe sa' axta'a etlapmok nahan xamo' ma'a aplegasso nak ko'o sekpeywa, amasséssessók sa' ma'a egken.

Oseas 5:14

Sa' atnehek ko'o aktamagkok Efraín, tén han Judá m'a ektémól'a méwa kaktamagkok aqsok, ko'o ahagko' sa' han atnéssesagkok nápakha'a apketkók, tén sa' axñekxak makham, alyenyawasagkokxak sa', méko sa' kalwagkasek teyp.

Oseas 7:10

Apcheymákpoho keñamak Israel eksexnáneya. Neyseksa eykhe ekteme xa ekyókxoho aqsok nak, melye'eykekxak ma'a Dios Wesse' apagkok, melchetamsók nahan.

Oseas 8:14

Apkeláneykegkek apxanák apkelyawe m'a Israel, kelwagqeykmek eyke chá'a m'a ektáha nak apkelane. Apkeláneykegkek apxámokma tegma apkelyawe ekyennaqte nak kélhaxtegkáseyak nepyáwa m'a Judá, wáléwássesek sa' eyke ko'o táxa m'a, yaqwayam sa' kalwatnek ma'a apxanák apkelyawe nak.”

Amós 5:2

Apteyekmek Israel aphémo nak kelán'a étkok ektaqmalma; apteyekmek meyke apheykekxa néten. Apyetneyk náxop, cham'a xapop apagkok nak, méko han xama enxoho yaqwayam kaxneyásekxak néten.