Oseas 4:12 - Biblia Enxet

¹² Apkelpaqhetchásamákpók chá'a aqsok apkeláyókxa nak yántéseksek ma'a énxet'ák ahagkok; yámet chá'a elmaha eltamhok elya'asagkohok aqsok megkólya'áseyak nak. Kelmomchek ma'a ektémakxa nak apkelyespagko apkeláneyak megkalmopsexta, melaqhémók chá'a ámay apagkok ma'a énxet'ák ahagkok: apkeláneykegkek apkeltémakxa megkalmopsexta'a apyamasma m'a Dios apagkok.

Oseas 4:12 ပူးပေါင်းရင်းမြစ်များ

2 Reyes 17:7

Temegkek axta xa, hakte apkeláneykegkek axta melya'assáxma israelitas apkenmexeykekxo m'a Dios Wesse' apagkok, ektáha axta apkelántekkesso Egipto, apkelwagkassama axta teyp neyseksa apkelma m'a faraón, wesse' apwányam axta m'a Egipto, hakte apkelpeykessamók axta m'a mók aqsok kéláyókxa,

2 Crónicas 21:13

apyetlamchek aqsa m'a aptamheykegkaxa axta m'a apkelwesse'e apkelwányam axta m'a Israel, xeyep keñamak apkelwátessáseyak apkelyetleykha Wesse' egegkok ma'a énxet'ák apheykha nak Judá, tén han ma'a Jerusalén, aptamheykegko axta m'a Ahab axta apnámakkok. Apkelnapmeyk han ma'a apkelyáxeg, éltaqmalma axta apkeltémakxa mexnawo nak xép.

Salmos 106:39

apkelenyetséssegkek axta apyempe'ék apkeláneykegko ekyókxoho apkeltémakxa ekmaso, apnaqtawásamákpek axta, eñama ektémakxa axta aqsok apkelánéyak.

Salmos 73:27

Eletsapok sa' chá'a m'a apyamasma nak chá'a exchep; emasséssók sa' ma'a apyenseyam nak chá'a apkelyetleykha.

Jeremías 10:8

Élyeyháxma m'a apyókxoho nak, méko xama enxoho apkelmopwancha'a aqsok. ¡Yawanchek kalxekmósek yántéseksek nekha!

Jeremías 2:27

hakte axta aptemék chá'a apkenagkama yámet se'e: ‘Xeye' ekteme táta ahagkok’, tén axta meteymog aptéma chá'a apkelanagkama s'e: ‘Xeye' ekteme méme ahagkok.’ Keñe axta ko'o seyheykekxo apkap'ák, axta hélányo'. Tén axta apkelwet'a enxoho chá'a ekmaso apheykha, etnehek chá'a heyának se'e: ‘¡Hẽlwagkasseta negko'o teyp!’

Jeremías 23:13

“Ekweteyak axta ko'o apkeláneykegko aqsok sektaqnagkamo nak ko'o m'a apkellegasso axta sekpeywa apheykha axta m'a Samaria: apkelxeyenmeyk axta chá'a m'a amya'a ekxeyenma nak ekwesey Baal, apkelyetnakhásseykmek axta m'a énxet'ák ahagkok Israel.

Ezequiel 20:32

Xeyenmeyk kéxegke kélwáxok kóltéhek ma'a aptamheykegkaxa nak pók aptémakxa énxet'ák keso náxop, cham'a apkelpeykessamo nak yámet tén han ma'a meteymog, megkatnehek sa' eyke xa ektáha nak.

Ezequiel 21:21

Apkenegwa'ak wesse' apwányam Babilonia m'a eyeynókxa nak ánet ámay, aptawássek xama aqsok apkeltamho kaxekmósek yaqwánxa kaqhohok emhagkok: apkelyeykesáha yágke aktek, apkelpaqhetcháseykpók ma'a aqsok apcháyókxa, apkelanawók ektáhakxa m'a aqsok kélnaqtósso ektekyawa nak ahekhek.

Oseas 14:3

Mopwanchek negko'o hẽlwagkasek teyp ma'a Asiria, mogwanchek nahan ólxeganmok ólchántek yátnáxeg. Kamaskok sa' kaxwók óltéhek negko'o ‘Dios egagkok’ ma'a aqsok nenlánéyak egagko' nak, hakte xép apwánxa apagkok kóteyágwók ekmayósa kóllanok ma'a élyeheykha nak, xép Wesse'.”

Oseas 5:4

Apkeltémakxa ekmaso megkahayók elyo'ókxak Dios apagkok ma'a énxet'ák, melya'ásegkok ma'a Wesse' egegkok, eñama élmá apkelwáxok apkeláneyak apkeltémakxa ekmaso megkalmopsexta'a.

Oseas 6:10

Ekweteyak ko'o aqsok ekmaso agko' ma'a Israel: Apkeláneyak aptémakxa megkamopsexta m'a Efraín, apkenyetséssegkek apyempehek ma'a Israel.

Oseas 9:1

Nágkólátsaha aqsa énxet'ák Israel; nágkólnextegmakha aqsa néten kalpayhekxak kélwáxok, aptamheykegko nak chá'a pók énxet'ák nak, hakte kélyamasmeyk Dios kélagkok eñama kélláneyak kéltémakxa ekmaso megkólmasexta'a. Atsek chá'a kóltamhok kólxawak ekyánmaga kélláneyak kéltémakxa megkólmasexta'a m'a kélchexakkassamakxa nak chá'a apyempe'ék ma'a hótáhap apaktek.

Levítico 17:7

Melmeyásekxók sa' chá'a kaxwók aqsok apkelnapma m'a kelyekhama apkelpeykessamo axta chá'a, eknaqtawáseykencha'a axta. Sa' katnehek kélánémaxchexa kóltéhek kéxegke meyke néxa xa, kawakxohok sa' ma'a apyapmeyk tén han kélketchek nak.

Levítico 20:5

wanmexek sa' ko'o, tén han ma'a apnámakkok nak, atekkesek sa' han nepyeseksa m'a énxet'ák apagkok, yetlo m'a apyókxoho ektáha nak chá'a apnaqtawásamákpoho xamo', apkelye'eykekxa m'a Moloc.

Miqueas 2:11

Yetneyk agkok xama énxet aptamheykha apmopwána amya'a, etnehek chá'a s'e: “Añeksohok chá'a ko'o kéxegke m'a anmen yámet égmenek, tén han ma'a mók anmen nak”, cháxa yaqwayam etnehek Dios appeywa aplegasso apagkok ekleklamo apwáxok xa énxet'ák nak.

Habacuc 2:19

¡Kéxegke la'aye, kéltémo nak kaxatakhak kéleykmássesso élánamáxche nak yántéseksek, tén han kéltémo nak katnamha meteymog meyke nak ekpeywa! ¿Awancheya kaltennaksek amya'a m'a? ¡Yawanche', méko énnama m'a, sawo ekyátekto ekmomnáwa eykhe kélyepetchesso m'a émpehek nak, tén han sawo ekmope ekmomnáwa!

Números 15:39

Kéllanawók sa' agkok chá'a kéxegke m'a apkelmakheykha nak, kaxénwakxohok sa' chá'a kélwáxok ma'a ekyókxoho séltémókxa nak chá'a kóltéhek, sekmésso axta ko'o kéxegke, keñe sa' kóllának chá'a, tén sa' megkólyetlakxeyk chá'a m'a ektémakxa nak chá'a élchetámeykha agko' kélwáxok, tén han kélmámenyého kóllána', élwátessesseykmo nak kéxegke kélteme mehelyenyaweykha ko'o.

Deuteronomio 31:16

Tén axta Wesse' egegkok aptáha apcháneya Moisés se'e: “Apketsekkek sa' agkok xép, keñe sa' se'e énxet'ák nak enaqtawasakpok sa' elyetlakxak ma'a mók aqsok kéláyókxa ekheykegko nak ma'a mók apchókxa yaqwánxa sa' kólmok; keñe sa' ko'o heyenyók, etwasha sa' ma'a ekhémo mók nélpaqhetchásamáxkoho sélánésso axta ko'o m'a.

Jueces 18:5

Tén axta aptáha apcháneya s'e: —Elpaqhetchesakpoho hana Dios yaqwayam agya'asagkoho', tásek sa' kexa katnehek ekteyapma nélweynchámeykha.