Oseas 2:9 - Biblia Enxet

⁹ Awaták sa' ko'o makham, alwaták sa' ma'a hótáhap apaktek, tén han vino, ekwokmo enxoho eknakxamáxchexa', almekxak sa' nahan ma'a nepkések apwa' ahagkok, tén han apáwa apkeláxñeyo nak, sélmésso axta yaqwayam kalántaxnekxa'.

Oseas 2:9 ပူးပေါင်းရင်းမြစ်များ

Ezequiel 16:27

“Axta keñamak seklegassásegkoho ko'o exche': ekteméssessek axta meyke aqsok ekhakxa, tén axta sekmésa m'a tegma apkelyawe nak filisteos apchókxa, cham'a aptaqnagkamo nak tén han megkaleklo nak apwáxok ma'a ektémakxa ekmaso segmegqassamo nak.

Ezequiel 16:39

Agkések sa' xeye' xa énxet'ák nak, yaqwayam sa' enaqtawássesha m'a éláneykxa nak chá'a ektémakxa ekmaso megkamasexta tén han élpeykessamókxa nak chá'a m'a aqsok kéleykmássesso. Elhaxyawássesek sa' ma'a élántaxno tén han ma'a aqsok étkók éltaqmalma agkok nak, meyke apagko' apáwa sa' etnéssesek.

Ezequiel 23:26

Elhaxyawássesek sa' élnaqta, elmok sa' ma'a aqsok étkók agkok éltaqmalma, élmomnáwa nak.

Daniel 11:13

Yánchásekxak sa' eyke makham sẽlpextétamo wesse' apwányam apha nak nexcheyha, apxámokma apagko' mexnawo m'a sekxók axta, keñe sa' yáma kawegqohok apkelyeykhéyak apyeyam, ektamagkokxak makham ma'a ekpayho nak nepyeyam, yetlo sẽlpextétamo apagkok apxámokma, tén han apkelmeykha éltaqmalma apkenchesso nak kempakhakma.

Oseas 2:3

Sa' agkok katnahak xa ektáha nak, meyke apáwa agko' sa' atnéssesek ekyókxa'; sa' atnéssesek ma'a ektémakxa axta sekxók ektéyeykmo, sa' atnessásekxak ma'a ektémól'a yókxexma meykexa énxet, ekyamáyo agko' la'a xapop, wának sa' katsapok hem eyaqhe.

Oseas 8:7

Apkeneykekxeyk éxchahayam ma'a, éxchahayam ekyennaqte agko' sa' han enakxagkok; méko sa' aqsok elyaqtennagkok ma'a namyep apagkok nak, méko sa' nahan yaqwayam elanagkok hótáhap ma'a apyexna nak; apkelánegkek sa' agkok ma'a hótáhap nak, pók énxet'ák sa' etawagkok.

Oseas 9:2

Mexek sa' hótáhap apaktek apagkok ma'a énxet'ák Israel, tén han vino apagkok, ketsék agko' sa' katnehek ma'a vino kaxwe élánamáxche nak.

Joel 2:14

Lapmaxcheyk mellegássesagkók kéxegke, yáphássesek ektaqmalma kélheykha, elmések ma'a aqsok ekyexna kélcheneykekxa, tén han vino, yaqwayam kóltéhek kélmésso naqsa Dios Wesse' kélagkok.

Sofonías 1:13

Cháxa keñamak peya nak kalmaxchek ma'a aqsok élmomnáwa apagkok nak, tén han kólmasséssessók ma'a apxanák nak, elanagkok sa' eykhe apxanák, mexnakha sa' eyke m'a; eknagkok sa' eykhe anmen yámet, ménagkehek sa' eyke m'a égmenek nak.”

Malaquías 1:4

Aptemék sa' agkok énxet'ák apheykha nak Edon se'e, cham'a aptawán'ák neptámen nak Esaú: “Ẽltawassáseykha eykhe negko'o negókxa, anxátekhásekxak sa' eyke makham,” Tén sa' etnehek Wesse' egegkok se'e: “Exátekhásekxak sa' makham apchókxa m'a, atwássesha sa' eyke ko'o makham. Kaltamhaxchek sa' apchókxa ‘Apchókxa Ekmaso Ektémakxa', tén han ‘Énxet'ák Apkeltaqnagko nak Wesse' egegkok meyke néxa.”

Malaquías 3:18

Keñe sa' kéxegke kólyekpelchágwok makham mexnémo pók ma'a éltaqmalma nak apkeltémakxa, tén han ma'a ekmaso nak apkeltémakxa, tén han ma'a apkelpeykessamo nak Dios, tén han ma'a melpeykessamo nak.”