Oseas 2:3 - Biblia Enxet

³ Sa' agkok katnahak xa ektáha nak, meyke apáwa agko' sa' atnéssesek ekyókxa'; sa' atnéssesek ma'a ektémakxa axta sekxók ektéyeykmo, sa' atnessásekxak ma'a ektémól'a yókxexma meykexa énxet, ekyamáyo agko' la'a xapop, wának sa' katsapok hem eyaqhe.

Oseas 2:3 ပူးပေါင်းရင်းမြစ်များ

Éxodo 17:3

Hem axta eyke kelnápak ma'a énxet'ák, apkelpaqméteyha axta makham apxéna ekmaso m'a Moisés. Axta aptáhak apcháneya s'e: —¿Yaqsa axta ektéma sẽlántekkessama m'a Egipto? ¿Apkeltémok enxeykel'a exchep hẽlnápok hem sẽlnapma, yetlo egketchek tén han ma'a aqsok nennaqtósso nak?

Isaías 33:9

Kesagkék ma'a xapop yaqhapchek nahan exma, kelyameygkek aqsok naxma m'a Líbano, kelyetcheyk áwa' yenta'a, yókxexma ekyamayéxma tamhákxak ma'a ekyapwátegweykenxa nak xapop Sarón, meyke xama aqsok entamhákxak ma'a yókxexma Basán tén han ma'a egkexe Carmelo.

Isaías 47:3

kóllanok sa' agkok ekyókxa meyke apáwa, kólwetaksek sa' ma'a ekmasmakxa nak chá'a kólwetaksek. Ayaqmagkásekxak sa' ko'o mók ektémakxa, méko sa' kawának henókasha.”

Isaías 64:10

Yókxexma meykexa énxet tamheykekxak ma'a tegma apkelyawe apkeltaqmalma apagkok nak, apmopso aptamheykekxak ma'a Jerusalén, kélmassésseykmek nahan.

Jeremías 12:10

Apxámok apkelwesse'e apkelwányam sélenmexma nak ko'o aptawáseykencha'a m'a anmen yámet séneykekxa nak, apkelteyammeykha m'a yókxexma ahagkok nak. Meyke xama aqsok aptemessáseykekxak ma'a xapop ekleklamókxa agko' nak ko'o ewáxok.

Jeremías 13:22

Kelmaxneyáha sa' agkok han, yaqsa ektáha, ektáha xa ektáha nak, kéméxcheyk kay'asagkohok eñama ekyawe megkay'assáxma; ¡cháxa keñamak kélhaxyawássesa nak élnaqta tén han kélyennaqtésa kélyempehek kélteméssessekmoho exma!

Jeremías 13:26

Alhaxyawássesagkok sa' ko'óxa kéxegke apyókxoho kélnaqta, yaqwayam sa' kólmegqé' kataxchek yáxña'akxoho kélyókxa'.

Jeremías 14:3

Apkelápháseyha etegyagkok yegmen apkeláneykha m'a kelwesse'e; apkelmeyákxeyk chá'a m'a yámelchet, makke elwetágweykxak chá'a yegmen, apkelchexyekmek aqsa chá'a meyke yegmen ma'a yátegwáxwa apagkok; melya'ásegkok aptamhágkaxa, apkelaqlássek apqatkok yetlo ekyawe agko' apkelmegqakto.

Jeremías 17:6

Máxa pegke sa' etnahagkok apkelámha nak yókxexma meykexa énxet, meyke agko' la'a chá'a éláneykha: apteyapmal'a chá'a m'a neyseksa meteymog, tén han ma'a yásek xapop nak, cham'a meykexa nak ekha.

Jeremías 2:31

(Kéxegke nahan, kaxwe nak kélektegeykekxa makham, kóltaqmelchesho kélháxenmo Wesse' egegkok appeywa.) Israel, ¿yókxexma meykexa énxet kélagkok ya axta ko'o kéxegke?, ¿xapop ekyaqtéssamakxa exma ya axta ko'o? Énxet'ák ahagkok, ¿yaqsa ektéma kéltéma nak chá'a kélpeywa s'e? ‘Nenteme egagko' negko'o kaxwók nentamheykegkok; wánxa kaxwók negye'eykekxa exchep’.

Jeremías 2:6

Axta kalyetnakhayók apkelwáxok hektamok ko'o, ektáha axta sélántekkesso m'a Egipto, ektáha axta seknaqleykha m'a yókxexma meykexa nak énxet, ekyamáyekxa nak xapop, ekxámokmakxa nak maxcha'a élmattawóneg, yókxexma meykexa nak yegmen, ekxámokmakxa nak aqsok eyeymáxche', yókxexma meykexa nak ekha, meyke nak ekyeykhágwayam ma'a.

Jeremías 22:6

Hakte aptáhak apxéna Wesse' egegkok ma'a wesse' apwányam Judá nak apxagkok: “Aphawók ko'o sélányo exchep ma'a egkexe Galaad, aphawók ma'a egkexe nak Líbano, naqsók eyke ko'o sekxéna exchep peya atnessásekxak meyke xama aqsok, yókxexma meyke xama énxet apha.

Jeremías 4:26

Eksawheykha axta exma, ekwet'ak axta ektamhákxo meyke xama aqsok ma'a kélcheneykekxexa nak pánaqte exnók, tén han aptamhákxo nápakha'a apketkók apyókxoho m'a tegma apkelyawe nak. Wesse' egegkok aplo ekmaso keñamak ekteméssesso ekyókxoho xa.

Jeremías 51:43

Yókxexma ekmaso agko' aptamhákxak ma'a tegma apkelyawe apagkok nak, meyke xama aqsok, ekyamayéxma xapop, ekyaqhapmo exma, meykexa xama énxet apha, meykexal'a han kayeykhágwók.

Jeremías 51:5

apkeláneykegkek eykhe melya'assáxma nahaqtók ko'o m'a énxet'ák Israel tén han Judá, apsawheyáseykekxók melya'assáxma m'a apchókxa, makke akxakhák ko'o makham, sektáha nak Wesse' ekha sekyennaqte, Dios Appagkanamap nak Israel.

Ezequiel 16:22

Kelwagqeykmek xeye' m'a ektémakxa ekmanyása axta, ektémakxa axta kelán'a ekma chá'a ekyánmaga ekpathetéyak énxet, cham'a ektémakxa étkok axta, ektéma axta meyke agko' ma'a élántaxno, ekyettelegweykencha'a axta neyseksa éma agkok.

Ezequiel 19:13

Keñe kélchenákxo kaxwók ma'a yókxexma meykexa nak énxet, ekyamáyekxa nak ma'a xapop, meykexa nak yegmen.

Oseas 13:15

Máxa sa' eykhe etnehek Israel ma'a ektémól'a kalyapwak pa'at, kawátekhápok sa' eyke m'a éxchahayam eñama nak ekteyapmakxa ekhem, cham'a éxchahayam ekyennaqte eñama nak ekwátekhapma m'a yókxexma meykexa nak énxet, keymaksek sa' ma'a ekteyapmakxa nak chá'a yegmen, kalyamasagkok sa' ma'a yámelchet. Elyementamok sa' apkelenmexma m'a aqsok élmomnáwa, tén han ma'a aqsok éltaqmalma nak.

Oseas 2:10

Yáxña'akxoho sa' apekkenchesek ekyókxa meyke apáwa, nápaqta'awók ma'a élpatheteykegko nak chá'a. ¡Méko sa' kawának hémentók yaqwánxa nak atnéssesek!

Jueces 15:18

Apwóneyha axta Wesse' egegkok ma'a Sansón, hakte hem agko' axta entáhak. Axta aptáhak apcháneya s'e: “¡Egkéssek xép ekyawe agko' sekmallanma! ¿Péya yohok aqsa watsapok hem seyaqhe, tén han hemok se'e énxet'ák melya'áseyak nak Dios?”