Oseas 2:18 - Biblia Enxet

¹⁸ “Alának sa' ko'o ekhémo mók sélpaqhetchásamáxkoho aqsok nawha'ák éllo xa ekhem nak, tén han náta, tén han yéwa, yaqwayam sa' megkalteméssesha m'a énxet'ák Israel, alekkexek sa' ko'o yágke xa apchókxa nak amasséssók sa'; tén han ma'a sókwenaqte, tén han ma'a kempakhakma, yaqwayam sa' exmakha meyke ektáhakxa apkelwáxok énxet'ák ahagkok.

Oseas 2:18 ပူးပေါင်းရင်းမြစ်များ

Job 5:22

Ewanyohok sa' aqsa m'a meyk, tén han aqsok ekmaso, megyekyek sa' nahan aqsok nawha'ák éllo.

Job 5:23

Megkalya'aksek sa' exma meteymog appeynchekmo enxoho xapop namyep apagkok, megkataqnókkehek sa' han ma'a aqsok nawha'ák.

Salmos 148:10

¡Aqsok kélnaqtósso, tén han ma'a élmeymentakcha'a nak! ¡Náta, tén han ma'a élpexyaweykegkoho nak náxop kalxog!

Salmos 23:2

Héllókassesek chá'a sekyampe m'a ekyetnamakxa nak pa'at ektaqmela, héntemekxak chá'a m'a ektaqmalmakxa nak ekyetno yegmen,

Salmos 46:9

apmasséssekmek kempakhakma, ekweykmoho m'a néxa xapop nak keso nélwanmeygkaxa; apkelekkexchek ma'a yágke, nekha'a étkók aptemessásak ma'a sawhéwa, ¡apkelwatnékxeyk ma'a yátnáxeg apkelyenyawasso apkenchesso nak kempakhakma!

Isaías 2:11

Elháxahagkok sa' yetlo apkelmegqakto m'a énxet'ák apkeleymákpoho nak; kólmasséssesek sa' nahan apkeleymákpoho m'a apkene nak etnahágkok ekha kéláyo. Wesse' egegkok sa' aqsa exekmósek apteme apwányam apagko' xa ekhem nak,

Isaías 2:17

Kónegók sa' kóltemessásekxak ma'a apyókxoho apkeleymákpoho nak tén han ma'a apkene nak chá'a etnahágkok ekha kéláyo. Wesse' egegkok sa' aqsa exekmósek apteme apwányam apagko' xa ekhem nak.

Isaías 2:4

Etnehek sa' apkelyekpelchémo Wesse' egegkok nepyeseksa m'a pók aptémakxa nak chá'a énxet'ák, elánekxések sa' nahan chá'a ektémakxa apkelenmexamap ma'a apxámokma énxet'ák. Xóp élpeyncheyam sa' etnéssásekxak ma'a sawo élwenaqte apagkok nak, keñe sa' sawhéwa apagkok etnessásekxak ma'a sawo élhaxe. Melnapakpekxék sa' nahan chá'a kaxwók pók ma'a énxet'ák, megkólxekmósek sa' nahan chá'a kaxwo' yaqwayam yempakha'.

Isaías 26:1

Cháxa ekhem nak, sa' kalmeneykmasaxchek Judá s'e negmeneykmasso nak: “Yetneyk negko'o xama tegma apwányam apyennaqte egagkok; yaqwayam hẽlwagkasek teyp, aphaxtegkek Wesse' egegkok meteymog ma'a nepyáwa tén han ma'a ekyennaqtésso nak.

Isaías 32:18

Exmakha sa' énxet'ák ahagkok ma'a meykexa nak ektemegweykmohóxma, kañe' ektaqmelakxa nak negha, ekyetnamakxa nak meyke ektemegweykmohóxma negha,

Isaías 54:5

hakte sa' emok etnehek aptáwa' m'a ektáha axta apkelane. Wesse' ekha apyennaqte apwesey m'a; cha'a apwagkasso teyp xeye' m'a Dios Aptaqmalma nak Israel, apteme nak Dios ekyókxoho keso náxop.

Isaías 65:25

Katwohok sa' xamók ekto wáwo m'a nepkések apketkok, katwok sa' pa'at ma'a méwa ektémól'a weyke, keñe sa' ma'a yéwa katwok xapop. Méko sa' xama enxoho kalának ekmaso m'a ekyókxoho nak egkexe ekpagkanamaxchexa ahagkok.” Wesse' egegkok apxeyenma xa.

Jeremías 23:6

Méko sa' katnehek apheykha énxet'ák Judá neyseksa apteme wesse' apwányam, méko sa' nahan katnehek ektáhakxa apheykha m'a énxet'ák Israel. Keso yaqwánxa sa' kólteméssesek apwesey s'e: ‘Wesse' egegkok segmallahanchesso.’”

Jeremías 30:10

“Ektáhak ko'o sekpeywa s'e, sektáha nak Wesse': Jacob énxet'ák apagkok, apteme nak séláneykha, nágkóle'; Israel, ná égwe', hakte atekkesek sa' ko'o exchep se'e apchókxa makhawók agko', kélchexakhagweykenxa axta kélántekkessama yetlo aptawán'ák neptámen. Meyke ektáhakxa kélheykha sa' katnekxak makham, tén han ektaqmalma, meyke xama aqsok enxoho yaqwayam kalyegwakkasha.

Jeremías 33:16

Elwagkasakpok sa' teyp énxet'ák Judá xa ekhem nak, keñe sa' énxet'ák Jerusalén méko katnehek ektáhakxa apheykha. Keso yaqwánxa sa' kólteméssesek apwesey s'e: ‘Wesse' egegkok apteme sẽlmallahanchesso.’

Ezequiel 34:25

Alának sa' ko'o ekhémo mók sélpaqhetchásamáxkoho m'a, yaqwayam sa' kataqmelek apkelweynchámeykha. Wának sa' kamassegwók aqsok nawha'ák éllo m'a apkelókxa, yaqwayam sa' kataqmelek apkelleykha nepkések seknaqtósso m'a yókxexma eyáxñe nak tén han kataqmelek apnaqteyenma m'a naxma.

Ezequiel 39:1

“Xép akke énxet, eltennés sa' yaqwánxa ko'o atnéssesek ma'a Gog. Etne sa' yának se'e: ‘Keso aptáhakxa exchek appeywa Wesse' egegkok se'e: Gog, apkemha apmonye' ekyawe kéláyo nak ma'a yókxexma Mésec tén han Tubal, ekxénchek ko'o exchep aptáha sénmexma.

Zacarías 14:4

Etnegwaták sa' néten Egkexe Olivos Wesse' egegkok xa ekhem nak, émha nak ekpayhókxa m'a Jerusalén, cham'a ekteyapmakxa ekhem nak. Kamayhekxak sa' neyseksa m'a Egkexe Olivos, ekyapwate ekyawe xapop sa' katnehek ma'a neyseksa eñama m'a ekteyapmakxa ekhem nak ekweykekxoho m'a taxnegwánxa ekhem nak. Kaqxegagkokxak sa' xama nekha egkexe m'a ekpayho nak nexcheyha, keñe sa' xama nekha nahan kaqxegagkokxak ma'a ekpayho nak nepyeyam,

Zacarías 14:9

Cháxa ekhem yaqwánxa sa' etnehek Wesse' apwányam Wesse' egegkok ekyókxoho keso náxop. Wánxa sa' nahan xama etnehek ma'a Wesse' egegkok, xama sa' nahan katnehek ma'a apwesey.

Zacarías 2:11

Temék sa' agkok xa, apxámok sa' pók aptémakxa énxet'ák elyo'ótak ma'a Wesse' egegkok. Sa' etnehek appeywa s'e: “Atnehek sa' nahan énxet'ák ahagkok xa énxet'ák nak. Keñe sa' axek chá'a ko'o kélnepyeseksa kéxegke.” Keñe sa' kólya'ásegwók kéxegke aptáha seyáphasso ko'o m'a Wesse' egegkok ekha nak apyennaqte.

Zacarías 3:10

Wokmek sa' agkok xa ekhem nak, kélwanchek sa' chá'a kéxegke kóláneyha kélnámakkok yetlo meyke ektáhakxa kélwáxok kólhakha m'a kóneg pessesse agkok nak anmen yámet kélcheneykekxa tén han ma'a higo yámet. Ko'o sekxeyenma xa, sektáha nak Wesse' ekha sekyennaqte.’”

Zacarías 9:10

Sa' emasséssessók yátnáxeg apkelyenyawasso apagkok nak ma'a Efraín, tén han yátnáxeg nak ma'a Jerusalén, tén han ma'a yágke kélmeykha nak chá'a kempakhakma. Eltennasagkok sa' yaqwayam katnehek meyke ektáhakxa apheykha m'a apyókxoho pók aptémakxa nak énxet'ák, kawomhok sa' apteme aptaqmelchesso m'a ekyókxoho wátsam ekwányam, eyeynamo m'a Éufrates ekweykmoho m'a néxa xapop nak keso náxop.