Oseas 11:8 - Biblia Enxet

⁸ “¡Mowanchek ko'o eytnakhaksek xép Efraín! ¡Mowanchek ko'o ayenyók xép Israel! ¿Ewanchek enxeykel'a amasséssók ektéma axta sekmassésseykmo m'a tegma apwányam nak Admá? ¿Ewanchek enxeykel'a atnéssesek xép sekteméssessamakxa axta m'a Seboím? ¡Megkeynnák ko'o ewáxok, awanhek apmopyósa sélányo exchep!

Oseas 11:8 ပူးပေါင်းရင်းမြစ်များ

Génesis 14:8

Keñe axta m'a apkelwesse'e apkelwányam nak Sodoma, Gomorra, Admá, Seboím, tén han Bela, apkelmahágko m'a ekyapwate nak Sidim, cháxa apkelnápékpexa axta han Quedorlaómer, Tidal, Amrafet, tén han Arioc xa cinco apkelwesse'e nak, cuatro apkelwesse'e axta m'a Elam, Goím, Sinar, tén han Elasar.

2 Samuel 24:16

Xama axta apmako emasséssók Wesse' egegkok apchásenneykha m'a tegma apwányam Jerusalén, chaqhak axta apwáxok Wesse' egegkok xa aqsok ekmaso nak, keñe aptáha apcháneya m'a apchásenneykha apkellegassásegkoho axta énxet'ák: “¡Elwatés, wánxa etne!” Axta han apkenmáha Wesse' egegkok apchásenneykha m'a nekha apkexakkassamakxa axta chá'a apyempe'ék hótáhap apaktek ma'a Arauna, apteme axta jebuseo.

1 Reyes 3:26

Yentexók agko' axta eyke ektáhakxa awáxok élano étche m'a kelán'a megyetsapma nak étche, keñe ektáha eyáneya m'a wesse' apwányam: —¡Wesse', nágyaqha aqsa sakcha'a megyetsapma nak! ¡Egkés aqsa xa kelán'a nak! Keñe axta m'a mók kelán'a nak ektáha s'e: —Háwe ko'o ahagkok, háwe han xeyáxa agkok. ¡Kólpáxqat sa' nepyeseksa!

2 Reyes 13:23

Apkelapyósegweykmek axta eyke apkelányo Wesse' egegkok, chaqhegkek axta apwáxok apkelányo, apkelányók axta chá'a eñama m'a aphéssamo axta mók apkelpaqhetchásamákpoho m'a Abraham, Isaac tén han Jacob, axta emáheyók emasséssók, tén han elántekkesek ma'a aphakxa nak, wokmók eyke makham metnéssesso s'e kaxwo' nak.

2 Crónicas 36:15

Axta eyke eyétekkesseykmok chá'a apcháphássesso appeywa apchéssama Dios Wesse' apagkok axta m'a apyapmeyk nano', eñama axta apkellegasso chá'a apkelxeyenma axta chá'a appeywa, hakte apyósekak axta apkelányo m'a énxet'ák apagkok, tén han ma'a aphamakxa axta chá'a.

Salmos 106:45

xénweykekxók axta apwáxok ma'a ekhémo mók apkelpaqhetchásamákpoho apkelánesso axta, tén axta apyaqmagkasa yaqwánxa etnehek, hakte awanhók agko' ma'a segásekhayo nak:

Isaías 16:11

Máxa arpa apxát'ák élaktamáxchel'a entáhak ekpexyennama ewáxok sélano m'a Moab tén han ma'a Quir-haréset.

Isaías 63:15

Wesse', yenmexentámho aphamakxa nak néten, cham'a aphamakxa ekpagkanamaxchexa eyeymáxkoho nak. ¿Háxko ekmahágkaxa m'a segásekhayo ekyawe axta tén han apyennaqte? ¿Háxko ekmahágkaxa m'a ekyetnakhassamo nak apwáxok negko'o? ¿Masseya nélmayóseka senlano negko'o?

Jeremías 18:8

Apkelwátesagkek agkok chá'a apkeláneyak aqsok ekmaso xa énxet'ák nak, keñe magwáphássesek chá'a m'a séllegassáseykegkoho séleyxchessama nak ko'o.

Jeremías 3:12

Exeg sa', emhók sa' ma'a ekpayho nak nexcheyha, eñes sa' se'e amya'a nak: “Aptáhak Wesse' egegkok se'e: ¡Hey'óta' ko'o, Israel sénmexeykekxo nak! Ataqmelcheshok sa' ko'o amok takha exche', mawenaqtésók sa' nahan seklo, hakte ko'o sekteme ektaqmeleykha ewáxok. Ekméssek ko'o sekpeywa, sektáha nak Wesse' kélagkok.

Jeremías 31:20

“Hatte seyásekhayo ko'o m'a Efraín énxet'ák apagkok; hatte sekmámenyého ahagko'. Apaqhetchesek eykhe chá'a ekyennaqte, mehelwánaqmeyk eyke chá'a; megkeynnayhek han chá'a ewáxok alano', apyósek apagko' nahan chá'a alano'. Ko'o sekxeyenma xa, sektáha nak Wesse'.

Jeremías 42:10

‘Kélmakók sa' agkok kéxegke kólhekxak se'e xapop nak, wának sa' ko'o kataqmelek kélheykha; mamasséssemek sa', alhésha sa' aqsa, malántekkesek sa' chá'a, hakte chaqhegkek ko'o ewáxok seyhaya kéxegke m'a aqsok ekmaso nak.

Jeremías 9:6

elyaqmagkasek apkeltémakxa. Aptáhak Wesse' egegkok se'e: “¡Ketók mók apketámeyak pók, ketók mók apkelyexancháseykha pók! Memáheyók ko'o hékpelchágwók énxet'ák ahagkok.

Jeremías 9:7

Cháxa keñamak sektáha nak ko'o sekpeywa s'e, sektáha nak Wesse' ekha sekyennaqte: Nátex sa' ko'o kaxwók akxák énxet'ák ahagkok aláxñassásekxak apyempe'ék yaqwayam alanok apkeltémakxa, hakte méko kaxwók atnéssesek.

Lamentaciones 1:20

¡Wesse', elano ektémakxa ekyentaxno ewáxok! ¡Eklegeykegkók ekmaso ewáxok! Añegkohok chá'a ekmáske ewáxok ekxénwákxoho enxoho chá'a ewáxok sektémakxa sénmexeykekxo. Sókwenaqte aptekyawák étchek ma'a yókxexma, keñe han se'e kañe' nak, ekyetnama apkeletsapma énxet'ák.

Lamentaciones 3:32

Henlegássesagkohok eykhe nahan chá'a, yepyósegwók eyke nahan chá'a henlano', hakte awanhók agko' ma'a ektémakxa segásekhayo.

Lamentaciones 3:33

Megkalchehek eykhe apwáxok henlegássesagkoho, tén han ellegássesagkohok ekmáske m'a énxet'ák.

Ezequiel 33:11

Naqsók eyke ko'o sekxéna sektáha nak Wesse' mamassegwayam, mómenyeyk yetsapok ma'a énxet ekmaso nak aptémakxa, émeñeyk aqsa eyaqmagkasek aptémakxa, keñe megyetsepe'. Israel, eyenyekxa xa aptémakxa ekmaso apmeykencha'a nak. ¿Yaqsa ektéma apkeltémo nak yetsapok?’

Ezequiel 6:9

Kalxénwók sa' ko'o apkelwáxok neyseksa apheykha nepyeseksa pók aptémakxa énxet'ák ma'a meletsapma nak, kalxénwakxohok sa' apkelwáxok ektáhakxa séllegassáseykegkoho eñama seyenseyam sétleykha, tén han eñama seyamasma, yaqwayam elpeykeshok ma'a aqsok kéleykmássesso. Megkalchek sa' apkelwáxok elanok apkeltémakxa eñama m'a ekyókxoho aqsok ekmaso apkelánéyak, tén han eñama m'a ekyókxoho apkeltémakxa ekmaso agko' nak.

Oseas 6:4

Aptáhak Wesse' egegkok se'e: “¿Háxko atnéssesek xép Efraín? ¿Háxko atnéssesek xép Judá? Máxa teyáméten ekteyapmól'a axto'ók kéltemék kéxegke sélásekhayo, tén han yálye ektéyeykmohol'a amonye' élseye ekmanyehe nak chá'a kamaskok.

Oseas 7:1

peyk agkok chá'a ko'o altaqmelchessók énxet'ák ahagkok nak Efraín, tén han ma'a Samaria, ótak chá'a melya'assáxma, tén han ma'a apkeltémakxa ekmaso nak. Hakte apyókxoho aptamheykegkok apkelmopwancha'a amya'a; máxa apkelmenyexma aptamheykegkok apkelántaxnama chá'a m'a tegma, tén han apkelyementamoma chá'a aqsok apagkok énxet'ák ma'a ámay.

Amós 4:11

“Ekmaso agko' axta ko'o ekmassésseykmok kéxegke, ekhawo sekteméssessamakxa axta sekmassésseykmo m'a Sodoma tén han Gomorra; máxa átex axta kéltemék kélhaxyawassól'a neyseksa táxa, ¡axta eyke hélye'eykekták ko'o kéxegke!” Wesse' egegkok apxeyenma xa.

Amós 7:3

Tén axta Wesse' egegkok apmágwokmo yaqwánxa etnehek, axta aptáhak se'e: —¡Megkatnehek sa' xa!

Amós 7:6

Tén axta Wesse' egegkok apmágwokmo yaqwánxa etnehek, axta aptáhak se'e: —¡Megkatnehek sa' nahan xa!

Miqueas 5:3

Apkexakhamchek eyke kaxwók Wesse' egegkok ma'a ektáha nak énxet'ák apagkok, ekweykmoho sa' ektáha naqláwa m'a kelán'a élhaxanma nak kategkesek étche apkenna'. Keñe sa' kólpáxaqteyásekxak makham ma'a apchókxa xamo' nak israelitas, kélnaqleykekxa axta megkatnahakxa apkelókxa.

Deuteronomio 29:22

Elwetak sa' nenlegeykegkoho ekmaso tén han negmasse peya nak yáphaksek Wesse' egegkok keso náxop, cham'a kaxwe nak yaqwayam makham elántépekxak ma'a egmonye', tén han ma'a kéltawán'ák kélnentámen nak kéxegke, peya nak elántépekxak makham kélnentámen kéxegke, ekhawo nahan ma'a énxet'ák apkeleñama nak mók apkelókxa apkelwe nak apkeleñama m'a apkelókxa makhawók agko' nak,

Deuteronomio 29:23

elwetak sa' ekyókxoho apchókxa ekteme m'a aqsok ánek ekyátekto eyáléwomól'a, tén han yásek tén han xapop ekmeyesma. Megkólwanchek nahan kólchenekxak aqsok aktek xa xapop nak, megkatyephek nahan xama aqsok enxoho; megkawanamyek nahan xama pa'at enxoho m'a, hawók ma'a ektémakxa axta kélmassesseykmo m'a tegma apkelyawe Sodoma, Gomorra, Admá tén han ma'a Seboím, apmassesseykmo axta Wesse' egegkok yetlo aplómo apagko'.

Deuteronomio 32:36

“Epasmok sa' énxet'ák apagkok Wesse' egegkok ma'a apwet'a sa' ekmassa apkelyenna. Apyósekak sa' elanok apkeláneykha Wesse' egegkok ma'a apwet'a sa' megyeymékpo xama m'a kélásenneykha nak tén han ma'a metnaha nak kélásenneykha,

Jueces 10:16

Tén axta israelitas apkexeygko m'a aqsok kéláyókxa éleñama nak mók nekha, yaqwayam elpeykeshok makham ma'a Wesse' egegkok. Massék axta ekyenna apwáxok Wesse' egegkok apkelano ektémakxa apkellegeykegkoho chá'a m'a israelitas.