Oseas 11:2 - Biblia Enxet

² Yágweykmók axta aqsa seyamasma sekwóneykencha'a, elmések axta chá'a aqsok ektekyawa aqsok kéláyókxa élmowancha'a amya'a énxet'ák ahagkok, elwatnések axta han chá'a aqsok ekmátsa nak ekpaqneyam éten agkok ma'a kéleykmássesso.

Oseas 11:2 ပူးပေါင်းရင်းမြစ်များ

1 Reyes 12:33

Apnegkenchek axta aqsok apkelnapma Jeroboam ma'a néten nak ekwatnamáxchexa aqsok, apkelane axta m'a Betel, ekhem quince, pelten ocho. Cháxa pelten kélessawássessamo appekkenma apagko' axta eñama élchetámeykha agko' apwáxok, apteméssessama axta apkeláneykegkaxa apkelpeykessamókxa chá'a aqsok kéláyókxa m'a israelitas, cháxa pelten apwatnakxa axta han ma'a aqsok ekmátsa nak ekpaqneyam éten agkok.

1 Reyes 18:19

Yána kaxwo' yánchásekxak énxet'ák apyókxoho israelitas ma'a egkexe nak Carmelo, yetlo m'a cuatrocientos cincuenta apkellegasso nak Baal ekpeywa, tén han ma'a cuatrocientos apkellegasso nak ekpeywa m'a Aserá, ekpasmoma nak ma'a Jezabel.

Nehemías 9:30

Ahóxók agko' axta apkeláneykha aqsa apkeltémakxa m'a, apkelpaqhetchessegkek axta chá'a apchásenneykekxo m'a espíritu apagkok, tén han ma'a apkellegasso nak appeywa, axta eyke elyeheykekxak ma'a; axta keñamak apchahayo apkelmoma m'a pók aptémakxa énxet'ák nak keso náxop.

Isaías 65:7

ekhawo nak chá'a apkeláneyak aqsok ekmaso agko' ma'a ekweykekxoho m'a apyapmeyk nak. Apkelwatneykegkek chá'a néten meteymog élekhahéyak ma'a aqsok ekmátsa nak ekpaqneyam éten agkok, elókáseykegkek chá'a m'a néten egkexe nak. Alyetsetchásekxak sa' sekxók apkeltémakxa ekmaso, keñe sa' atnéssesek ma'a ekpayhawo nak atnéssesek.” Wesse' egegkok apxeyenma xa.

Jeremías 18:15

Kelwagqámeykegkek eyke ko'o m'a énxet'ák ahagkok, apkelméssegkek chá'a aqsok ánek ekmátsa nak ekpaqneyam éten agkok ma'a aqsok kéláyókxa élmowancha'a amya'a nak. Apkelyetnakhágweykmek ma'a ámay apagkok nak, cham'a nanók ámay nak, apkelyetleykekxeyk ma'a ámay melya'áseykegkaxa nak.

Jeremías 35:13

“Éltamhók ko'o exchep ey'ókxak etnehek yának énxet'ák Judá tén han Jerusalén se'e, ko'o sektáha nak Wesse' ekha sekyennaqte, Dios apagkok nak Israel: ‘Kóleyxho sélxekmósso, kólyahakxoho m'a séltémókxa nak chá'a kóltéhek. Ekxénchek ko'o xa, sektáha nak Wesse'.

Jeremías 44:5

Axta eyke kéxegke hélyeheykekxoho', axta nahan hélháxenmo'. Megkólwátéseykegkok kélláneyak aqsok ekmaso, kéllenxanmeykegkók aqsa kélmésso aqsok ánek ekmátsa nak ekpaqneyam éten agkok ma'a mók aqsok kéláyókxa nak.

Oseas 11:7

Apmenyeyk aqsa heyenyók ko'o m'a énxet'ák ahagkok, elpáxamha eykhe m'a netno nak, méko eyke kapasmok.

Oseas 2:13

Añássesagkohok sa' ko'o ektémakxa axta m'a nentámen axta élméssama axta chá'a kéleykmássesso m'a aqsok ekmátsa nak ekpaqneyam éten agkok, élnáxegkáseykencha'a axta chá'a élatchessessama aphék ma'a élatchesso aphék, tén han élnatanma, yaqwayam kalyetlók ma'a élpathetéyak nak chá'a, ekmassama axta ekxeyenma awáxok ko'o. Ekxénchek ko'o xa, sektáha nak Wesse'.

Oseas 4:13

Apkelwatnegkek chá'a aqsok ekmátsa nak ekpaqneyam éten agkok ma'a néten egkexe nak, apkelnapmeyk han chá'a aqsok apnaqtósso, tén han apkeláneykegko chá'a m'a kóneg yenta'a élyentaxno nak pessesse agkok, cham'a yámet robles, álamos, tén han ma'a encinas. Cháxa keñamak éláneykegko nak éltémakxa ekmaso megkalmasexta'a m'a kélketchek kelwán'ák nak kéxegke, tén han eknaqtawáseykegkoho anaqteyegka'a élánegwayam chá'a pók énxet ma'a kéltánegken'ák nak.

Oseas 4:17

Apméssamók agko' apwáxok Efraín ma'a apkelpeykessamo nak kéleykmássesso. ¡Apyókxoho apkelyaqneneykegkok ektémól'a m'a anmen át'ák la'a! Megkamassegweykmok apkeláneyak apkeltémakxa kalmopsexta'a, wánxa aqsa apmenyeyk ma'a aqsok segmegqassamo nak; mopmenyeyk ma'a nentémakxa ektaqmela nak.

Zacarías 1:4

Nágkólteme aptamheykegkaxa axta m'a kélyapmeyk nano', apkeltennassama axta eykhe ko'o sektémakxa sekpeywa m'a nano' apkellegasso axta sekpeywa, aptéma axta apkelanagkama s'e: kólyenyow kéltémakxa élmasagcha'a tén han kélláneyak aqsok ekmaso, axta eyke heháxenmók ko'o m'a, axta nahan hélyeheykekxa'. Ko'o sekxeyenma xa, sektáha nak Wesse'.

Zacarías 7:11

Axta eyke elyahákxohok ma'a énxet'ák. Apyókxoho axta apkelpeynchákpok, máxa meyke apeyk'ák axta aptamhágkok.

Jueces 10:6

Apkeláneykegkokxeyk axta makham apkeltémakxa ekmaso israelitas nápaqtók Wesse' egegkok, apkelpeykessamók axta m'a mók ektémakxa nak kéleykmássesso Baal tén han Astarté, tén han ma'a aqsok kéláyókxa nak Siria, tén han Sidón, Moab, Amón keñe han ma'a filisteos. Apyamasmeyk axta Wesse' egegkok, massegkek axta apkelpeykessamo.

Jueces 2:13

Apkelyamasmeyk axta Wesse' egegkok eñama apkelpeykessamo m'a Baal, keñe han ma'a mók ektémakxa nak chá'a kéleykmássesso m'a Astarté.

Jueces 3:7

Asagkek axta eyke apkeltémakxa nápaqtók Wesse' egegkok ma'a israelitas, hakte axta kaxeyenmak apwáxok ma'a, apkelpeykessamók axta m'a mók ektémakxa nak chá'a kéleykmássesso Baal, tén han Aserá.