Oseas 11:10 - Biblia Enxet

¹⁰ Enaqlakxak sa' Wesse' egegkok ma'a, keñe sa' éxwéwha m'a ektémól'a méwa. Éxwéwha sa', keñe sa' elyo'ótak yetlo apkelaye m'a ektáha nak énxet'ák apagkok, apkeleñama m'a ektaxnegwánxa ekhem.

Oseas 11:10 ပူးပေါင်းရင်းမြစ်များ

Job 37:1

Ekwet'ak agkok chá'a éxchahayam ekyennaqte, katayha chá'a egkenyek, máxa katnehek ma'a ekmako enxoho kanextog.

Salmos 119:120

Kelpexyennegkek ko'o ekyókxoho émpehek seyeye nápaqto' xép, eyáyók ma'a apchánamakxa nak antéhek.

Salmos 2:11

Kólpeykesho Wesse' egegkok, yetlo élpayheykekxa kélwáxok, tén han yetlo kéláyo, kóltekxeyák kéltapnák apmonye', yetlo kélpexyennama kélaye, elwok katnehek, tén kéxegke kóletsapok ma'a ámay, hakte ñohok chá'a katyapok ma'a aplo nak. ¡Apkeleñémo énxet'ák apkelyexánegweykekxa nak chá'a ektémakxa sentaqmelchesso Wesse' egegkok!

Isaías 11:11

Exekmósek sa' makham apmopwána Wesse' egegkok apmako sa' enaqlanták makham énxet'ák apagkok apkeleymomap xa ekhem nak, apnaqlósawákxo sa' makham ma'a Asiria, Egipto, Patros, Etiopía, Elam, Sinar, Hamat tén han ma'a apkelókxa ekhéyak nak neyáwa wátsam ekwányam.

Isaías 2:5

¡Nók, Jacob énxet'ák apagkok, ólxog éltátchesakxa nak Wesse' egegkok élseyéxma apagkok!

Isaías 31:4

Aptáhak seyáneya Wesse' egegkok se'e: “Sa' etnehek éxyók Wesse' ekha nak apyennaqte epásegwaták énxet'ák apagkok apheykha nak Sión ma'a ektémól'a xama méwa eyaqhél'a xama nepkések, megkayél'a eyaqmaksek ma'a ektáha nak apkeláneykha, megkahaxanmal'a apxámokma yaqnekxak keláneykha nepkések eltamhok égwakkasek elwónchesek.

Isaías 42:13

Máxa xama énxet apyennaqte sa' etnehek etyapok ma'a Wesse' egegkok; elnapakpok sa' yetlo apwasqapma aptémól'a m'a kempakhakma yáp; epaqmétek sa' ekyennaqte, elpáxamha sa' yempakha', emenxenek sa' nahan ma'a apkelenmexma.

Isaías 49:10

“Megkalnáphek sa' chá'a meyk megkalnáphek sa' nahan chá'a ekhem, kamaskok sa' nahan élpekhésa m'a ekmexanmaxma mayáhat, hakte élásekhayók ko'o m'a, eknaqleykha nahan chá'a, anaqlakxak sa' nahan ma'a élánteyapmakxa nak yegmen.

Isaías 64:2

katnehek ma'a ektémól'a táxa kalwatnek ma'a yámet aktegák apák enxeykel'a nahan ma'a ektémól'a katnetchásegmak ma'a yegmen. Keñe elya'asagkohok apwesey m'a apkelenmexma nak elpexyennók nahan nápaqtók ma'a pók aptémakxa nak chá'a énxet'ák.

Isaías 66:2

¡Ko'o ahagko' sélane ekyókxoho xa aqsok nak, axta keñamak élánteyapma! Ko'o sekxeyenma xa, sektáha nak Wesse'. “Énxet sekpasmomo nak chá'a ko'o, cham'a énxet apmopyósa nak ekyentaxnamo nak chá'a apwáxok apcháyo nak chá'a m'a sekpeywa.

Isaías 66:5

Kóleyxho Wesse' egegkok appeywa, kéxegke kélyeheykekxoho nak chá'a appeywa: “Aptáhak apkelpaqmeta pók xam'a kélókxa xamo' apkeltaqnagkama nak chá'a kéxegke s'e, apkeltaqnaweykencha'a nak chá'a eñama kélxeyenma m'a sekwesey: ‘Wesse' egegkok sa' exekmósek apcheymákpoho; egmenyeyk negko'o agwetak kalpayhekxak apkelwáxok.’ Elmegqágwakxohok sa' eyke apteme nak apkelpeywa xa ektáha nak.

Jeremías 2:2

“Exeg sa' elpaqhetchessók ma'a énxet'ák Jerusalén; énnaqtés sa' appeywa, yaqwayam sa' kataqmelek apkelháxenmo: ‘¡Keso aptáhakxa nak appeywa Wesse' egegkok se'e! Xénwákxók ko'o ewáxok ektémakxa axta étkok, meheyenyaweykencha'a axta chá'a, cham'a sektémakxa axta etáwa', seyásekhayo axta chá'a, sétleykencha'a axta chá'a m'a yókxexma meykexa nak énxet, xapop megkólcheneykekxexa nak aqsok aktek.’

Jeremías 25:30

“Jeremías, eñes sa' sektáhakxa ko'o sekpeywa s'e ekyókxoho aqsok nak. Sa' etnehek elának se'e: “Kextegyókek appeywa Wesse' egegkok ma'a netnók agko' nak, cham'a kañe' ekpagkanamaxchexa aphamakxa nak. Apkelpáxegkáseyha apkeltaqnaweygko m'a nepkések apnaqtósso, máxa aptáhak ma'a apkelteyáyam la'a anmen yámet ekyexna, apkeltaqnaweygkek ma'a apyókxoho énxet'ák apheykha nak keso náxop.

Jeremías 31:9

Elmaxneyagkok sa' elchexyók yetlo apkellekxagweykenta'. Anaqlakxak sa' ko'o m'a ényahamakxa nak yegmen, cham'a ámay meykexa nak élyapwáteyak, yaqwayam sa' melpelapmehe'. Hakte ko'o apyáp ma'a Israel, keñe hatte átnaha apketkok ma'a Efraín.

Jeremías 33:9

Ekpeykeseykekxa ewáxok sa' ko'o atnessásekxak ma'a Jerusalén, séláyo tén han seyeymáxkoho nápaqta'awók apyókxoho énxet'ák apheykha nak keso náxop. Apkelleg'ak sa' agkok apyókxoho énxet'ák peya ko'o wáphássesek nepyeseksa aqsok éltaqmela m'a apheykha nak Jerusalén, tén han peya agkések ekyókxoho ektaqmelwayam nak negha, elpexyennók sa' apkelaye.”

Jeremías 5:22

Ektáhak ko'o s'e, sektáha nak Wesse': ¿Yahélayék ko'o kéxegke? ¿Yagkólpexyennamák emonye' ko'o? Ekpekkenmeyk axta ko'o yagkamex néxa m'a wátsam ekwányam, néxa, megkamowána kayeykhak ma'a wátsam ekwányam. Kalnextog eykhe kayéhek ma'a élyaqyahayam agkok megkamallánek eyke kapáwak eykhe han awáxok, megkayeykhék eyke.

Jeremías 50:4

Aptáhak Wesse' egegkok se'e: “Ellekxagwenták sa' elchexyamok énxet'ák Israel tén han Judá xa ekhem nak, hektamok ko'o, sektáha nak Dios Wesse' apagkok.

Jeremías 7:6

megkólnaqtawásegkoho enxoho m'a apkeleñama nak mók nekha, tén han ma'a élyéheykha nak, tén han ma'a xentampe'e nak, tén han megkólnapa enxoho chá'a énxet'ák meyke nak apkeltémakxa s'e yókxexma nak, tén han megkólpeykásawo enxoho m'a mók aqsok kéláyókxa, yaqwayam enxoho kólsexnánéxkohok kélagko' kéxegke,

Jeremías 7:9

Kélmenyexeykegkek chá'a, kélnapmeyk chá'a kélnámakkok, kélnaqtawáseykegkók chá'a kélnaqteyegka'a kéllánegweykmo chá'a mók kelán'a, kélméssegkek chá'a kélpeywa Wesse' egegkok kélmowána amya'a, kélméssegkek chá'a aqsok ánek ekmátsa nak ekpaqneyam ma'a Baal, kélpeykessamók chá'a aqsok kéláyókxa megkólya'ásegko nak kéxegke,

Ezequiel 26:16

Elántépok sa' néten apkeltaháno élyawe apheykegkaxa nak chá'a m'a apyókxoho kelwesse'e apkelwányam apheykha nak neyáwa wátsam ekwányam, elhaxyawasagkok sa' ma'a apkelaqlamap nak chá'a tén han ma'a apkelántaxno apkeltaqmalma nak chá'a kélótma; exnakha sa' náxop yetlo ekyawe agko' apkelyegwakto, yókxoho ekhem sa' katnehek apkelpexyennama tén han apkelyegwakto apkelwet'a enxoho chá'a.

Oseas 3:5

Keñe sa' natámen xa, elchexyók ma'a israelitas, elchetmok sa' Dios Wesse' apagkok, tén han ma'a David apteme nak wesse' apwányam apagkok, elyo'ótak sa' yetlo apkeláyo Wesse' egegkok amonye' ektemegwánxa néxa', tén han etegyagkok aqsok éltaqmela yaqwayam nak elmések.

Joel 3:16

Appaqmetchek ekyennaqte agko' Wesse' egegkok ma'a egkexe Sión, kextegyókek appeywa m'a Jerusalén, kelpexyennegkek néten tén han xapop. Wesse' egegkok akke apkelyexánegweykekxexa chá'a m'a ektáha nak énxet'ák apagkok, apkelmasma apyennaqte m'a énxet'ák Israel.

Amós 1:2

Xama axta éxtegyawa appeywa Wesse' egegkok appaqmeta m'a egkexe Sión, cham'a Jerusalén nak, kelyameygkek axta pa'at ma'a yókxexma, yamakak axta nahan exma m'a naw'a nak egkexe Carmelo.

Amós 3:4

páwáha agkok awáxok méwa m'a naxma', ekyógkexma eyke egmak, yexweyweyha agkok méwa étkok ma'a kañe' nak meteymog áxwa, xama aqsok akke egmak,

Amós 3:8

¿Yaqsa megkalpexyennemek eyeye, ekyexweweyncha'a enxoho méwa? ¿Yaqsa megkaxénhek Wesse' egegkok appeywa apkeltamho enxoho kaxének ma'a?

Miqueas 4:5

Elyahakxohok chá'a aqsok apcháyókxa m'a pók énxet'ák nak, keñe sa' negko'o ólyahakxohok chá'a Dios Wesse' egegkok meyke néxa.

Habacuc 3:16

Xama axta ko'o sekleg'a xa, eyekak axta. Kelpexyennamágkok axta sekpeywa, kelyelqáxchek axta exchakkok, massék axta ekyenna ekyókxoho émpehek. Aleyxek sa' eyke aqsa ko'o meyke sekpekhésamaxche m'a ekhem yaqwánxa sa' ellegássesagkohok Dios ma'a sẽlpextétamo sennaqtawáseykegkoho nak.

Zacarías 10:10

Wának sa' elchexyók makham apkeleñama m'a Egipto, anaqlósawakxak sa' ma'a Asiria, anaqlakxak sa' ma'a Galaad tén han ma'a Líbano, megkawakxók sa' nahan apyókxoho m'a yókxexma nak, hakte apxámok sa' etnehek.

Zacarías 10:12

Agkések sa' ko'o apkelyennaqte m'a, yetlo apkelxeyenma sekwesey sa' nahan elxog. Ekxénchek ko'o xa, sektáha nak Wesse'.”

Zacarías 8:7

Alwagkasek sa' ko'o teyp énxet'ák ahagkok apkelmoma nak ma'a énxet'ák apheykha nak apkelókxa teyapmakxa ekhem tén han ma'a apheykha nak apkelókxa taxnegwánxa ekhem,