Oseas 10:4 - Biblia Enxet

⁴ Epaqmésmakha aqsa chá'a, héltennaksek chá'a aqsok apmopwána amya'a, exnéshok aqsa chá'a mók apkelpaqhetchásamákpoho m'a pók apkelwesse'e nak; kaxhok sa' yámet ekmaso m'a ektémakxa nak chá'a apkelánekxésso amya'a énxet'ák, ekteyapmól'a m'a kélpeynchámxa enxoho xapop.”

Oseas 10:4 ပူးပေါင်းရင်းမြစ်များ

Isaías 5:7

Israel apchókxa m'a apkeneykekxexa nak anmen yámet apagkok ma'a Wesse' ekha nak apyennaqte tén han ma'a Judá, cham'a apkeneykekxa apmopmenyého apagko' nak. Apkelhaxanmeyk axta katnehek kélyeheykekxoho segánamakxa apagkok Wesse' egegkok ma'a, wánxa axta eyke aqsa apweteya chá'a ekyetnama m'a nentekyawa; apkelhaxanmeyk axta katnehek ma'a ekpéwomo nak nentémakxa, wánxa axta eyke aqsa aplegaya chá'a m'a ekpayheykha nak egátog nenlegeykegkoho ekmáske.

Oseas 4:2

Wánxa aqsa ekyetnama nélyexancháseykha nak egmók yaqwayam anlána', nenteme nak chá'a negmowána amya'a, tén han nentekyawa, tén han negmenyexma, tén han nennaqtawáseykegkoho nak egnaqteyegka'a, nenlane chá'a mók, keñe han ma'a negyennaqteyáseykha nak egyempehek, megkatnegweykmok néxa apkelnapma apnámakkok énxet'ák.

Oseas 6:7

“Aphawók Adán ma'a énxet'ák ahagkok, meláneykegkok ma'a ekhémo mók nélpaqhetchásamáxkoho ahagkok, eyamasmeyk nahan sélyetleykha.

Amós 5:7

¡Kéxegke laye, kéltemessáseykekxa nak aqsok ekmáske m'a nentémakxa ekpéwomo, tén han kélyamasma nak ekpéwomo kéllánekxésso amya'a énxet'ák!

Amós 6:12

¿Apwancheya yenyahagkok yátnáxeg neyseksa meteymog? ¿Kélwancheya kólpeynchók xapop ma'a neyseksa wátsam ekwányam? ¡Pánaqte segaqhamo kélteméssáseykekxak kéxegke m'a ekpéwomo kéllánekxésso nak amya'a m'a énxet'ák, keñe m'a ektekkesso nak chá'a nentémakxa ekpéwomo kéltemessáseykekxo ekmáske!

Deuteronomio 29:18

Nágkólho aqsa étek kélnepyeseksa kéxegke xama énxet, kelán'a, essenhan kélnámakkok tén han énxet'ák kélagkok, apyamasma sakhem ma'a Dios Wesse' egegkok eñama apkelpeykessamo m'a aqsok apcháyókxa nak xa énxet'ák nak. Kólxohok katnehek kéxegke m'a yámet egkepmenák ekmáskel'a tén han ma'a segwayól'a.

Deuteronomio 31:16

Tén axta Wesse' egegkok aptáha apcháneya Moisés se'e: “Apketsekkek sa' agkok xép, keñe sa' se'e énxet'ák nak enaqtawasakpok sa' elyetlakxak ma'a mók aqsok kéláyókxa ekheykegko nak ma'a mók apchókxa yaqwánxa sa' kólmok; keñe sa' ko'o heyenyók, etwasha sa' ma'a ekhémo mók nélpaqhetchásamáxkoho sélánésso axta ko'o m'a.

Deuteronomio 31:17

Altaqnaweygkok sa' eyke ko'o xa énxet'ák nak, akxák sa'; megkeytnakhaksók sa' ewáxok xama enxoho, káhapwak sa' ekxámokma agko' ma'a aqsok ekmaso tén han ma'a nenlegeykegkoho nak, keñe sa' etnehek chá'a elpaqmésmakha s'e: ‘Hákho óllegagkohok se'e aqsok ekmaso nak, ñókxa ekmassa apha negyeseksa m'a Dios Wesse' egegkok.’