Oseas 10:11 - Biblia Enxet

¹¹ “Máxa axta weyke étkok kéltámessól'a m'a Efraín, ekmátsal'a kampaksek apyempe'ék ma'a hótáhap apaktek. Ekpekkenchessek kaxwók nagyétek ektaqmalma nak ma'a yámet, yaqwayam keynyawaksek ma'a ekyenyawasso nak, tén sa' Judá ényawaksek ma'a élchekha nak, keñe sa' Jacob ényawaksek ma'a ektepelcheykekxal'a xapop.

Oseas 10:11 ပူးပေါင်းရင်းမြစ်များ

Isaías 28:24

Peyk agkok eknekxak aqsok aktek xama énxet apkelchekhámo nak chá'a, mepeynchemek chá'a xapop yókxoho ekhem, metekpogmakha nahan chá'a xapop apkelchekha yókxoho ekhem emha hópomo'o apophék epeykásekxak ma'a xapop.

Jeremías 28:14

Hakte ektáhak ko'o sekpeywa s'e, sektáha nak Wesse' ekha sekyennaqte, Dios apagkok nak Israel: Eknegkenchásegkek ko'o nápenyétek sawo ekyentaxno s'e apyókxoho énxet'ák nak, yaqwayam enxoho etnahagkok apkelásenneykha naqsa m'a Nabucodonosor, wesse' apwányam nak Babilonia. Wokmók han sekmésso yaqwayam elanha m'a aqsok nawha'ák nak.”

Jeremías 46:20

Aphawók Egipto m'a weyke étkok kelwána ektaqmalma, apxegakmek eyke sempéhe yaqwayam etakxek apkeñama nexcheyha.

Jeremías 50:11

“Kéxegke caldeos, kélyementaméyak axta aqsok apagkok énxet'ák ahagkok, ¡kalpayhekxa kélwáxok, kólnéwha! ¡Kólnextegmakha néten, ektémól'a weyke étkok ma'a neyseksa pa'at! ¡Kólwehesha aptémól'a elpáwha yátnáxeg!

Oseas 11:4

Yetlo sélápeykha axta eknaqleykenták sekhakxa, tén han yetlo sélásekhayo; axta ekteméssessók séleynma m'a ektémól'a ólqeynek sakcha'a keyetsék megkalyamasmal'a neme; waháxeheykha axta chá'a alagkok aptéyak,

Oseas 2:5

Keláneyak axta ekmaso ektémakxa megkamasexta m'a egken nak, massegkek axta ekteme meyke ektémakxa', ektéma axta ekpeywa s'e: ‘Ategyaha sa' ko'o sélpathetéyak, segkésso nak chá'a sekto, tén han ma'a yegmen, tén han nepkések apwa', tén han apáwa apkeláxñeyo nak, tén han pexmok égmenek, tén han ma'a sekya.’

Oseas 3:1

Aptáhak axta makham seyáneya Wesse' egegkok se'e: “Exeg makham, yásekhekxoho makham ma'a kelán'a élane nak ma'a pók, cham'a ektawáseykegkoho nak atáwa' élánegwayam pók énxet. Cháxa aptémakxa Wesse' egegkok apkelásekhayo m'a israelitas, elyo'ókxohok eykhe chá'a m'a mók aqsok apkeláyókxa nak, etawagkok han chá'a m'a anmen yámet ekyexna kélyamasso kélyaqyeyáseykekxa kélmésso nak chá'a.”

Oseas 4:16

Hénmexekxohok ma'a Israel, máxa weyke étkok ekmeymente; ¿Apwancheya enaqlók kéxegke Wesse' egegkok ma'a ektaqmelakxa nak pa'at, ektémól'a m'a nepkések apketkók la'a?

Oseas 9:1

Nágkólátsaha aqsa énxet'ák Israel; nágkólnextegmakha aqsa néten kalpayhekxak kélwáxok, aptamheykegko nak chá'a pók énxet'ák nak, hakte kélyamasmeyk Dios kélagkok eñama kélláneyak kéltémakxa ekmaso megkólmasexta'a. Atsek chá'a kóltamhok kólxawak ekyánmaga kélláneyak kéltémakxa megkólmasexta'a m'a kélchexakkassamakxa nak chá'a apyempe'ék ma'a hótáhap apaktek.

Miqueas 4:13

¡Tegma apwányam Sión, yempekxa néten, ellegássesagkoho apkelenmexma! Hakte aptáhak Wesse' egegkok se'e: “Agkések sa' ko'o exchep apyennaqte ektémól'a m'a weyke kennawo' sawól'a kepet'ák, tén han sawo ekyexwasel'a aphék, yaqwayam sa' enaqtawasagkohok apxámokma apagko' énxet'ák. Elyementók sa' xép ma'a aqsok apagkok ekxámokma apkelmenyexcháseyak axta pók énxet'ák, keñe sa' hélmések ko'o, sektáha nak Wesse' ekyókxoho keso náxop.”

Deuteronomio 25:4

“Nágkóltehetches chá'a táma awéhek weyke kéltemessáseyncha'a enxoho chá'a kólteyágkasha kólchexakkasek apyempe'ék ma'a hótáhap apaktek.