Números 10:29 - Biblia Enxet

²⁹ Xama ekhem axta aptáhak apcháneya apepye Moisés se'e, cham'a Hobab, Reuel apketche, apteme nak Madián énxet: —Peyk negko'o ólmahagkok ma'a apchókxa sẽltennassamakxa nak hegmések ma'a Wesse' egegkok, hẽlyetlow sa', antaqmelchesek sa', hakte apxeyenmeyk Wesse' egegkok eltaqmelchesek yetlo apkelásekhayo m'a énxet'ák Israel.

Números 10:29 ပူးပေါင်းရင်းမြစ်များ

Génesis 12:7

Axta apxekmósakpohok han Wesse' egegkok ma'a. Aptáhak axta apcháneya s'e: “Keso xapop peya nak ko'o agkések aptawán'ák neptámen se'e.” Apkelánessek axta han Abram ekwatnamáxchexa aqsok ma'a Wesse' egegkok, hakte axta apxekmósakpohok ma'a.

Génesis 13:15

Agkések sa' ko'o exchep ekyókxoho xapop apwet'a nak kaxwo', apagkok sa' etnehek megkatnégwayam néxa, tén han ma'a aptawán'ák neptámen nak.

Génesis 15:18

Cháxa ekhem apkelanakxa axta han ekhémo mók apkelpaqhetchásamákpoho Wesse' egegkok ma'a Abram. Aptáhak axta apcháneya s'e: —Agkések sa' ko'o aptawán'ák neptámen se'e xapop nak, eyeynamo m'a wátsam nak Egipto, ekweykekxoho m'a wátsam ekyawe nak Éufrates,

Génesis 17:8

Agkések sa' ko'o exchep ma'a ekyókxoho xapop nak Canaán, tén han ma'a aptawán'ák neptámen nak, apheykegkaxa nak se'e kaxwo' nak, etnehek sa' apagkok megkatnégwayam néxa, ko'o sa' han atnehek Dios apagkok ma'a.

Génesis 32:12

Apxeyenmeyk axta exchep hetaqmelchessesek sekweynchámeykha, tén han exámekxak ma'a étawán'ák netámen, ekweykenxal'a ekxámokma xapop ánek ma'a neyáwa wátsam ekwányam, magmowána nak ólyetsetek.”

Salmos 100:1

¡Kólmeneykmásses Wesse' egegkok, kélyókxoho kélheykha nak keso náxop yetlo ekpayheykekxa kélwáxok!

Salmos 34:8

Kólyepkeyn kólya'ásegwók Wesse' egegkok apteme ektaqmalma apwáxok. ¡Apkeleñémo énxet apye'eykekxa nak chá'a!

Salmos 95:1

Kólxegma', agmeneykmássesek Wesse' egegkok yetlo ekpayheykekxa egwáxok; agmeneykmássesek ma'a sentaqmelchesso nak negko'o, tén han Segwagkasso teyp.

Éxodo 18:1

Apleg'ak axta ekyókxoho apteméssessamakxa Dios Moisés ma'a apepyáta' Jetró, cham'a apkelmaxnéssesso Dios énxet'ák apagkok axta m'a yókxexma Madián, tén han ma'a énxet'ák apagkok nak Israel, apleg'ak axta nahan ektémakxa apkelántekkessama Wesse' egegkok ma'a Egipto.

Éxodo 18:12

Tén axta Jetró apyentamánto xama aqsok kéltósso yaqwayam ewatnések ma'a Dios, tén han ma'a mók aqsok apkelmésso naqsa nak chá'a Dios. Keñe axta m'a Aarón tén han ma'a apyókxoho apkelámha apmonye'e axta m'a Israel apkelmahágko apmako etawagkohok xamo' aptéyak Moisés apepyáta' m'a nápaqtók Dios.

Éxodo 18:27

Keñe axta m'a Moisés, tén han apepyáta' apkelpeykásekpekxoho amonye' apyenyeykekxa m'a pók, tén axta aptaqháwo makham m'a apepyáta' apmeyákxo m'a apchókxa.

Éxodo 2:18

Xama axta élwákxo makham aphakxa yáp xa kelán'a étkók nak, apkelmaxneyáha axta. Aptáhak axta apkeláneya s'e: —¿Yaqsa ektáha ényahamo nak kélwa'akto sakhem?

Éxodo 2:21

Apkelyahákxók axta nahan Moisés apcháneyákpo exnamok ma'a Reuel apxagkok. Tén axta apmésa nahan xama apketche m'a Reuel, ekwesey axta Séfora yaqwayam etnehek aptáwa'.

Éxodo 3:1

Apkeláneseykha axta nepkések apnaqtósso apepyáta' m'a Moisés apwesey axta Jetró, apteme axta apkelmaxnéssesso énxet'ák apagkok ma'a yókxexma Madián. Xama ekhem axta nahan apkelya'ásekxak ma'a yókxexma meykexa nak énxet, apwákxók axta m'a Horeb, Dios egkexe apagkok nak,

Éxodo 3:8

Cháxa keñamak sekweywento nak ko'o, yaqwayam alwagkasek teyp neyseksa apkelma m'a egipcios; alántekkesek sa' ko'o s'e apkelókxa nak, alya'aksek sa' ma'a xama xapop ekyawe agko' nak tén han ektaqmalma, cham'a ényahamakxa nak weyke nagkeygmenek, tén han yányawhéna' apyegmenek ektémól'a kanyehek ma'a yegmen, cham'a apchókxa apheykegkaxa nak ma'a cananeos, hititas, amorreos, ferezeos, heveos tén han ma'a jebuseos.

Éxodo 6:4

Élánéssegkek axta anhan ko'o xama ekhémo mók nélpaqhetchásamáxkoho m'a, tén séltennassama nahan agkések xapop ma'a Canaán, cham'a yókxexma apheykegkaxa axta sekxók aptamheykegko m'a aptémól'a énxet apkeleñama nak mók apkelókxa.

Isaías 2:3

énxet apxámokma apagko' sa' elwa', sa' etnehek apkelpeywa s'e: “Kólchempoho, ólchántek Wesse' egegkok egkexe apagkok, tegma appagkanamap apagkok nak ma'a Jacob Dios apagkok, yaqwayam sa' hẽlxekmósek ma'a ámay apagkok, keñe sa' agkegwának ólyetlók ma'a apkeltamhókxa enxoho chá'a ólyetlók.” Hakte Sión sa' katyapok ma'a nélxekmowásamáxche apagkok nak Wesse' egegkok, Jerusalén sa' kañék ma'a appeywa nak.

Jeremías 50:5

Etegyaha sa' amya'a ekpayhókxa ámay ma'a Sión, tén sa' elpéwhok ma'a, sa' etnehek apkelpeywa s'e: ‘Agyo'ókxak Wesse' egegkok, agyepetchegwakxak yetlo nenlane ekhémo mók nélpaqhetchesamaxkoho megkamassegwayam, megkalwagqámomáxche nak chá'a xama enxoho.’

Números 10:28

Cháxa apkelánémakpexa axta chá'a etnahagkok sẽlpextétamo israelitas, apkelxegákxo enxoho chá'a.

Números 23:19

Maghawok negko'o m'a Dios nentáha nak énxet néletsapmo nak chá'a, metnehek apmopwána amya'a, meyaqmagkassemek nahan mók ma'a aqsok apxeyenma. Apxénchek agkok xama aqsok, elának nahan. Apxénchek agkok nahan élanak xama aqsok, elának nahan.

Deuteronomio 30:5

Yának sa' kólmeyenták makham Wesse' egegkok ma'a apchókxa apmomakxa axta m'a kélyapmeyk nanók axta kéxegke, kólmekxak sa' makham kéxegke m'a; etaqmelchessesek sa' kélheykha, elmések sa' apxámokma apagko' kélketchek, mexók sa' ma'a apweykenxa axta apketchek ma'a kélyapmeyk nanók axta.

Deuteronomio 4:40

Kóllána chá'a m'a segánamakxa apagkok sekmésa nak ko'o kéxegke s'e ekhem nak, tén han ma'a nélánémaxchexa nak chá'a antéhek, keñe sa' tásek chá'a katnehek ektáhakxa kéxegke tén han ma'a kéltawán'ák kélnentámen nak, kólhakha sa' nahan apxámokma apyeyam ma'a apkelókxa apmáheyókxa nak egkések meyke néxa m'a Dios Wesse' kélagkok.”

Jueces 1:16

Apkelántekkek axta tegma apwányam élámhakxa axta áxa m'a Hobab axta aptawán'ák neptámen, apteme axta quenita, Moisés axta apepyáta', yetlo m'a Judá énxet'ák apagkok, apkelmahágkek axta m'a yókxexma meykexa énxet nak Judá, teyp nak Arad, ekpayho nak nepyeyam. Cha'a apkelheykemxa axta han appáxaqweykmo m'a énxet'ák apheykha axta m'a yókxexma nak.

Jueces 4:11

Axta appakxenweykmok Héber, apteme axta quenita, keto' nak Quedes, ekpayhókxa axta émhakxa m'a yámet encina, émha axta m'a Saanaim, cham'a Héber apteyapma axta nepyeseksa m'a apnámakkok xamo' nak quenitas, apteme axta han aptawán'ák neptámen xamo' ma'a Hobab, Moisés axta apepyáta'.

1 Samuel 15:6

axta aptáhak apkeláneya quenitas se'e: —¡Kólántép nepyeseksa amalecitas, yaqwayam sa' megkóltekyawok xamo' kéxegke m'a; hakte tásek axta kélteméssessamakxa kéxegke israelitas, apkelxegeykmo axta apkeleñama m'a Egipto! Yetlókok axta apkelánteyapma quenitas nepyeseksa m'a amalecitas.