Nehemías 9:30 - Biblia Enxet

³⁰ Ahóxók agko' axta apkeláneykha aqsa apkeltémakxa m'a, apkelpaqhetchessegkek axta chá'a apchásenneykekxo m'a espíritu apagkok, tén han ma'a apkellegasso nak appeywa, axta eyke elyeheykekxak ma'a; axta keñamak apchahayo apkelmoma m'a pók aptémakxa énxet'ák nak keso náxop.

Nehemías 9:30 ပူးပေါင်းရင်းမြစ်များ

2 Reyes 18:11

Apkelántekkessek axta wesse' apwányam Asiria apheykegkaxa israelitas apnaqleykekxo m'a Asiria, keñe apkelhésseykmo m'a Halah, yókxexma nak Habor, wátsam nak ma'a Gozán, tén han tegma apkelyawe apagkok axta medos.

2 Reyes 21:10

Axta keñamak appaqmeyesma Wesse' egegkok apkelásenneykxo m'a apkeláneykha apkellegasso nak appeywa. Axta aptáhak se'e:

2 Crónicas 24:19

Apkeláphássessek axta Wesse' egegkok apkellegasso appeywa, yaqwayam enxoho yának elyo'ótak makham ma'a. Axta eyke elyahákxak énxet'ák ma'a ektáhakxa axta apkelpaqhetchesso m'a Dios appeywa apkellegasso.

Esdras 9:10

“Keñe kaxwo', Dios egagkok, ¿háxko antéhek agának kaxwók xép natámen nenlane xa ekyókxoho nak? Manlaneyk negko'o m'a apkeltémókxa nak antéhek,

Nehemías 9:20

Apkelméssegkek axta han ma'a espíritu aptaqmalma apagkok yaqwayam enxoho elxekmósagkok; apkeleykegkek axta aqsa m'a maná apcháphássesso axta, apméssegkek axta han yegmen yaqwayam kamasseksek hem élnapma.

Nehemías 9:26

“Axta eyke elyaheykekxohok xép ma'a, apkenmexeykekxeyk axta, apkelwanyeykha axta m'a segánamakxa apagkok nak. Apkelnapmeyk axta han ma'a xép apkeláneykha apkellegasso nak appeywa, megyésseykekxa axta apkelxéncháseykekxoho apkeltémakxa, apkeltémo axta elyo'ókxak makham xép; aplókassama apagko' axta exchep.

Nehemías 9:29

Apkeltémók axta elanagkokxak makham ma'a segánamakxa apagkok; apkenagkamchek axta eyke elya'áseykegkok ma'a énxet'ák nak, axta elyeheykekxak ma'a apkeltémókxa nak antéhek, axta eláneykegkok ma'a apchánamakxa nak antéhek, ekméssamo nak ekyennaqte apnények ma'a énxet apkelane nak chá'a; apkenmexeykekxeyk axta exchep, apkelásennamakpek axta, axta han elyeheykekxoho'.

Salmos 86:15

Wesse', xép akke apteme Dios ektaqmeleykha apwáxok, tén han apmopyósa henlano', mepekhésamap, tén han ekyawe segásekhayo, apteme apmámnaqsoho.

Salmos 95:10

Cuarenta apyeyam axta ko'o weykmok séltaqnawéyak xa énxet'ák nak, axta ektemék se'e: ‘Apkelyetnakhágweykmek apagko' se'e énxet'ák nak; ¡melyeheykekxak ma'a séltémókxa axta etnahagkok!’

Isaías 28:10

kaxwel'a éltámeyéyak apkelyetsátéyak eknaqtáxésamaxche weykcha'áhak!”

Isaías 42:24

¿Yaqsa axta éltémo elmenyexakpok ma'a énxet'ák Israel tén han elmakpok ma'a Jacob énxet'ák apagkok nak? ¿Háweya axta Wesse' egegkok? Apkeláneykegkek melya'assáxma apkenmexma m'a, megkalyaqwámeykegkok elyetlók ma'a ámay apxekmóssamakxa axta, melyeheykekxohok nahan ma'a segánamakxa apagkok nak.

Isaías 48:9

“Axta eyke apekhésamaxchek alwok eñama seyásekhayo sekwesey, seyeymáxkoho axta keñamak sekmágweykekxo yaqweykenxa atnehek, tén axta mamassésseykmo.

Isaías 63:10

Apkenmexeykekxeyk axta eyke Wesse' egegkok xa énxet'ák nak, apkelapwagkassegkek axta m'a espíritu aptaqmalma apagkok; axta keñamak aptamheykekxo apkelenmexma m'a énxet'ák nak, apkempakhayak axta nahan.

Jeremías 25:4

Apkeláphássáseykekxeyk axta eykhe chá'a kéxegke Wesse' egegkok ma'a apkeláneykha apkellegasso nak appeywa, axta eyke kéxegke kólháxenmo', axta kólmáheyok kóleyxhok chá'a apkelpeywa tén han kólyahakxohok chá'a.

Jeremías 44:22

Massegkek axta eyke apkelenmáxamap Wesse' egegkok ma'a aqsok ekmaso kélláneyak, kélláneykegko axta kéxegke, cham'a aptaqnagkamo apagko' nak chá'a m'a. Cháxa keñamak ektamheykekxo nak kaxwók ekmaso kélókxa kéxegke tén han meyke xama énxet apha m'a; éñamakxa néltémo hentemegwomhok exma ekmaso tamheykekxa', aqsok eyeymáxkohol'a kataxche'.

Jeremías 44:4

Éláphassáseykekxeyk axta eykhe chá'a ko'o kéxegke apkellegasso nak sekpeywa, yaqwayam enxoho eltennaksek megyánhek kóllának ma'a aqsok ekmaso agko', sektaqnagkamo nak chá'a ko'o.

Jeremías 44:5

Axta eyke kéxegke hélyeheykekxoho', axta nahan hélháxenmo'. Megkólwátéseykegkok kélláneyak aqsok ekmaso, kéllenxanmeykegkók aqsa kélmésso aqsok ánek ekmátsa nak ekpaqneyam éten agkok ma'a mók aqsok kéláyókxa nak.

Jeremías 7:25

Aptéteykegkók ko'o pók séláphássesso kéxegke apyókxoho séláneykha apkellegasso nak sekpeywa, eyeynamo m'a sekxók axta apkelánteyapma kélyapmeyk nanók ma'a Egipto ekwokmoho makham se'e kaxwo' nak.

Lamentaciones 2:17

Appenchessek apkelane Wesse' egegkok ma'a aqsok apxeyenma axta elána'. Apmasséssekmek meyke apmopyósa apkelányo m'a nanók apxeyenma axta emasséssók, apchahayók yesmaksek ma'a élenmexma nak, apkelyennaqtéssek ma'a élenmexma nak.

Daniel 9:6

Mólyaheykekxak ma'a apkeláneykha apkellegasso nak appeywa, apkelpaqhetchessama axta chá'a yetlo apxeyenma apwesey exchep ma'a apkelwesse'e apkelwányam egagkok nak, tén han ma'a apkelámha apmonye'e, tén han ma'a ẽlyapmeyk nano', keñe han ma'a apyókxoho énxet'ák nak Israel.

Zacarías 7:12

Apkelyennaqtéssek axta apkelwáxok ektémól'a meteymog ekyennaqte agko' la'a, yaqwayam enxoho megyeyxók ma'a kélxekmósso tén han nélánémaxchexa antéhek apkeltennasso axta Wesse' ekha nak apyennaqte m'a espíritu apagkok, apchásenneykekxo axta eñeksek ma'a nanók apkellegasso axta Dios appeywa. Axta keñamak aplama apagko' ma'a Wesse' egegkok.

Zacarías 7:13

Aptáhak axta s'e: “Magweyxók sa' ko'óxa sewóneyncha'a enxoho xa énxet'ák nak, ekhawo aptamhágkaxa nak megyahaxnawo sélwóneyncha'a ko'o.

Números 11:26

Axta eykhe nahan apkelyésamap nepyeseksa setenta apkelámha apmonye'e m'a apqánet énxet, xama axta apwesey Eldad tén axta pók apwesey Medad, axta eyke elmahágkok ma'a kélpakxanma nak, apháha axta aqsa m'a apkelpakxeneykegkaxa nak énxet'ák. Aphagwokmek axta nahan apyetseksa'ák ma'a espíritu, yetlókok axta nahan apkelpaqmeyesma ektémól'a elpaqmétek ma'a Dios appeywa apkellegasso, cham'a apkelpakxeneykegkaxa nak énxet'ák.