Nehemías 5:12 - Biblia Enxet

¹² Aptáhak axta seyátegmowágko s'e: “Ólmeyásekxak sa' ekyókxoho xa aqsok nak, mólmaxneyha sa' xama aqsok enxoho. Anlának sa' xa aptáhakxa nak sẽláneya.” Keñe axta sélwóneyncha'a apkelmaxnéssesso Dios énxet'ák apagkok, nápaqta'awók axta han éltamhók etnéssesek ekmámnaqsoho agko' ma'a apmáheyo elanagkok.

Nehemías 5:12 ပူးပေါင်းရင်းမြစ်များ

Esdras 10:12

Aptáhak axta apkelyennaqtésawo apkelpeywa apkelátegmowágko apyókxoho énxet'ák se'e: —Anlának sa' ma'a apkeltamhókxa nak antéhek.

Esdras 10:5

Apkempákxeyk axta néten Esdras, apkeltamhók axta elanagkok aqsok apmáheyo elanagkok ma'a apkelámha apmonye'e nak apkelmaxnéssesso Dios énxet'ák apagkok, tén han levitas, tén han apyókxoho israelitas, apkelxénchek axta han elanagkok.

Nehemías 10:29

apkelyepetchákxeyk axta apnámakkok tén han apkelámha apmonye'e apagkok, apxéna naqsók etnahagkok ma'a ektémakxa nak segánamakxa apmésso axta Dios ma'a Moisés, apteme axta apkeláneykha, tén han elanagkok meyke apkelyenseyam ekyókxoho m'a apkeltémókxa nak antéhek, tén han segánamakxa apagkok nak ma'a Wesse' egegkok,

Nehemías 10:30

cháxa keñamak peya nak mólmésagkehek egketchek kelwán'ák yaqwayam etnahagkok apnaqteyegka'a énxet'ák apheykha nak se'e apchókxa nak, móghók sa' nahan negko'o kalmagkok apketchek kelwán'ák nak ma'a egketchek apkelennay'a nak.

Nehemías 10:31

Apkelchexyekmek sa' agkok nahan énxet'ák apheykha nak se'e apchókxa nak ekhem sábado elsanták ma'a aqsok apkexeykekxa nak, tén han ma'a mók ektémakxa nak chá'a m'a aqsok ekyexna kélcheneykekxa, mólmehek sa', megkeyxek sa' ma'a ekhem sábado, essenhan ma'a mók ekhem kélessawássessamo nak chá'a; siete apyeyam sa' han chá'a kawomhok manlánéyak néltamheykha namyep, tén han negmassésseyam aqsa chá'a m'a apméyak aqsok nak chá'a egmók.

Nehemías 13:25

Élpaqhetchessegkek axta ko'o ekyennaqte, tén axta séltémo kaltemégwomhok exma ekmaso. Nápakha axta han chá'a élnápeykha, tén han seyápetchessama chá'a apwa'ák, keñe axta séltémo etnéssesek naqsók apkelpeywa nápaqto' Dios megyohok chá'a kalmagkok apketchek kelwán'ák tén han apkelennay'a m'a megkatnaha nak appeywomo xamo', tén han megyohok etnahagkok apnaqteyegka'a apketchek apkelennay'a m'a kelán'ák nak, tén han xa énxet'ák nak. Axta ekteme han sélanagkama s'e:

Nehemías 5:11

Éltamhók han ko'o kólmeyásekxak xapop apagkok se'e kaxwo' nak, tén han ma'a apkeneykekxexa nak anmen yámet, tén han apkeneykekxexa nak olivo, tén han ma'a apxanák nak, kólmassés sa' ma'a apkelméyak aqsok ekyetna nak kéxegke, cham'a selyaqye, hótáhap apaktek, vino, tén han pexmok égmenek.”